Read lunyore OKHURULA 23 Bible Online

OKHURULA 23 - lunyore bible

OKHURULA 23

¹“Oralandia obubehi khandi orakhonya omundu omubi khulwokhuba omukobokheli wobubehi tawe.

²Oralonda omukanda kwabandu olwa bakholanga obubi nohomba olwa bahaananga obukobokheli okhusiamia obulunji tawe.

³Orakhol'la omundu omutakha ebiela olwaba nayalwanga tawe.

⁴“Niwakhalola ing'ombe, noho epunda yomusukuwo nekor're omukalusisie.

⁵Ne epunda yiye neba nekwiye hasi khulwo obusiro bwemisiko, omukhonyel'le khulwo khutsibuusia, orabir'raho ochilekhe tawe.

⁶“Orabula okhukhol'la omundu omutakha akahabwene olwaba niyetsele musiina tawe.

⁷Murachikha omundu wosi tawe, khandi mureera omundu obula esikha tawe, okhuba ise ndikhalachila esiina omundu wosi okholanga ling'ana liibi singa yili.

⁸Orahuchil'la okhuhetswa tawe. Sichila esihetso sikholanga abandu okhuba ababofu khukahabwene ma sisiamia amang'ana komundu obula esikha.

⁹“Orasandia omucheni owamenyibwa tawe; inywe mwamanyilisia singa obwakali okhuba omucheni owamenyibwa, sichila inywe mwalinji abacheni bamenyibwa Emisiri.

¹⁰“Khulwemihika chisasaba muraache emikunda chienywe ma muchese ebiamo biamwo.

¹¹Nebutswa mumuhika kwakhane nakhataru mulekhe kukone ne murachesakhwo esindu siosi esiakhamelamwo tawe. Abatakha banyala okhulia siosi esiba nisikhulamwo ne tsinyama nabulimo tsinyala khulia esiabatakha baba nibalekhele. Khandi mukhole mbwo khumikunda chienywe chiemisabibu nende echiemiseituni.

¹²“Mukhole emilimo amatukhu kasasaba khwihonga, nebutswa murakhola emilimo khwitukhu liakhane nakhataru tawe, kho mbu abasumba benywe nende abacheni bamenyibwa abamukhalabananga bahuluukhe kata nende emiruko tsienywe, tsihuluukhe.

¹³“Murechelesie amang'ana kosi aka ise OMWAMI mal'le okhubool'la. Murasaayakhwo khubanyasaye bandi tawe; kata muraralakhwo amera kabwe tawe.

¹⁴“Mukhole amasabo kataru buli muhika khulwo okhumbelesie oluyali.

¹⁵Mumwesi kwa Abibu, omwesi kwamwarul'lamwo Emisiri, mukhole Lisabo lio Mukaati okuralimwo Amamela munjila yandamulaka.

¹⁶“Mwitsul'lenje okhukhola Lisabo lie Lichesa olwa muchiakanga okhuchesa ebiamo bienywe. “Mukhole Lisabo lia Mahindu nimumalilanga omuhika olwa mubunjelesianga halala emisabibu chienywe nende emiseituni nimuhinia mumikunda.

¹⁷Buli muhika olwa mukholanga amasabo kataru yaka, abasaatsa benywe bosi okhwola beetse okhundekayakaya ise OMWAMI Nyasaye Wenywe.

¹⁸“Murahaana omukaati kulimwo namamela olwa mukholanga omusango kwomuruko tawe. Emiruko emikhomefu echiamumban'na singa omusango mumasabo kataru yaka chiralekhwa tsikone okhwola litukhu lilondakhwo tawe.

¹⁹“Buli muhika muleerenje munyumba yo MWAMI Nyasaye wenywe obuswache obwamuranganga okhuchesa. “Muratekhela esimeme sielikondi nohomba sieimbusi mumabeele kanyina wasio tawe.

²⁰“Ndamurumila Om'malaika okhwemela imbeli wenywe khulwo khumulinda khuluchendo lwenywe nende okhumuleera habundu handamurechekhela.

²¹Mumuhulile ma mulonde amalako kaake. Muramukhol'la indiri tawe sichila ise mal'le okhumuruma, naye salamulekhela khulwe indiri singa iyo tawe.

²²Nebutswa nimuba nimumuhul'la ma nimuba nimukhola kosi akandakanga, namulwan'ne abasuku benywe bosi.

²³Om'malaika wanje nayemele imbeli wenywe ma namuleere okhwola musibala sia Abaamori, Abahiti Abaperisi, Abakanaani, Abahiwi, nende Abayebusi, nase nambamume.

²⁴Murenamila abanyasaye babwe kata murabekayakayakhwo tawe, khandi muralonda emiima chiedini yabwe tawe. Mulikul'le abanyasaye babwe ma mutuye etsisilo tsiabanyasiye tsana.

²⁵Nimwakhandekayakaya OMWAMI Nyasaye wenywe namulaamile ikhabi nimuhelesia ebiakhulia nende amaatsi khandi namuhiniekhwo obulwaye bwosi.

²⁶Musibala sienywe abulaho omukhasi owakharekukha munda nohomba owakhabula okhunyoola omwana tawe. Namuhelesie amatukhu amenji okhumenya musibala.

²⁷“Nambakhole abandu bamufukulanga inywe okhuuria ise; nandeere ingoyani khubandu abamulwananga n'nabo ma nambakhole abasuku benywe okhusukhana ma bamwilukhe.

²⁸Nakhole abasuku benywe okhuba noburi obukali; nanzilusie Abahiwi Abakanaani, Abahiti olwa muba nimwesundanga aha bali.

²⁹Sinambakhunge mumuhika mulala tawe; nikhola mbwo esibala siosi siakhasikala likunda ma tsinyama nabulimo tsitsulemwo mwo.

³⁰Musilenje yisio nambahiniemwo sihati sihati okhwola olwa muba nimwinjihile okhubukula esibala siabwe.

³¹Nakhole tsinzakho tsiesibala sienywe okhubambukha okhurula khu Nyanza Inzakhanyu okhwola khumuchela kwa Efurate nende okhurula khu Nyanza ya Mediterenia okhwola musitsiimi. Namuhe obunyali okhuba ikulu wabandu bene sibala, ne namubakhunge olwa namube nimwesundanga imbeli.

³²Murakhalombakhwo indakano yosi n'nabo nohomba abanyasaye babwe tawe.

³³Murahuchil'la abandu yabo bamenye musibala sienywe tawe; nimukhola mbwo nabachile inywe okhukhol'la obwoni. Nimwakhekayakaya abanyasaye babwe, kwakhaba omubero omubi khwinywe.”