Read lunyore OKHURULA 24 Bible Online

OKHURULA 24 - lunyore bible

OKHURULA 24

¹OMWAMI nabool'la Musa mbu, “Yanichila khusikulu witse ahandi ibe nende Haruni, na Nadabu, Abihu nende abemeli ba Isiraeli amakhumi kane nakataru; ne nimusili okhwola ahembi ahandi, mundekayakaye nimwinamile hasi.

²Ibe Musa wenyene witse ahembi ahandi ne abandi bosi kata mulala tawe. Abandu bandi sibakhoya okhwanichila khusikulu tawe.”

³Musa yatsia nabool'la abandu kosi ako MWAMI yali nalachile abandu bakhole; ne abandu bosi bakalusia mumwoyo mulala nibaboola mbu, “Khulakhola kosi ako MWAMI abooye.”

⁴Musa yahandika amalako ko MWAMI kosi. Mukamba tsuli litukhu elialondakhwo yombokha olusambwa ahembi nesikulu ma nasimikhaho amachina likhumi nakabili sielala khusiolwibulo khutsinzibulo tsia Baisiraeli likhumi na tsiibili.

⁵Ma naruma abasiani ababuukha, okhusamba emisango khu MWAMI ma nibalomba emisango chietsing'ombe singa emisango khu chiobuhambani.

⁶Musa yabukula enusu yamaatsi kemiruko yitsio ma nara mutsindaabo, ne enusu eyasikala nasundula khulusambwa.

⁷Ma nabukula esitapu sie Indakano omwa Amalako ko MWAMI kali nikahandichilwe, ma nakasoma imbeli wabandu nomwoyo omukali. Abandu nibaboola mbu, “Khwitsa okhuhulila OMWAMI ne khulakhola kosi aka akhulachile.”

⁸Ma Musa nabukula amaatsi akali mutsindaabo nakamiitsa khubandu. Naboola mbu, “Kano niko amatsahi kesiesuho sie Indakano eyo MWAMI yakhola n'nenywe olwa yahaana amalako kano.”

⁹Musa, Haruni, Nadabu, Abihu nende abemeli ba Isiraeli amakhumi kane nakataru banichila khusikulu

¹⁰ma nibalola Nyasaye wa Baisiraeli. Isi webilenje bibie sialiho esindu esiafwana singa esafira kwamachina keerangi ya buluu efwana singa likulu.

¹¹Nyasaye siyasaalisia abemeli babandu ba Isiraeli yaba tawe. Balola Nyasaye ma nibalia khandi nibanywa halala.

¹²OMWAMI yabool'la Musa mbu, “Yanichila esikulu witse ahandi, ne olwoba noli hano, nzia okhukhuhelesia amachina kabili amapapale akahandikwakhwo amalako kosi akandahandika okhwibaal'la abandu.”

¹³Musa nende omulondel'liwe Yoshwa berechekha ma Musa nachaaka okhwanichila esikulu esitsienukhu.

¹⁴Musa nabool'la abemeli mbu, “Mukhulinde mukambi muno okhwola olwa nakhukalukhe. Haruni nende Huri bali halala n'nenywe hano; ne wosi owakhaba neling'ana liosi atsie khuye okhulikol'losia.”

¹⁵Musa yanichila khusikulu sia Sinai ma elilumbesi nilifuunikha esikulu yisio.

¹⁶Obulafu obumanyianga okhubaho khwo MWAMI, bwekha khusikulu. Lilumbesi liafuunikha esikulu khulwa amatukhu kasasaba, ne khwitukhu liakhane nakhataru OMWAMI yalanga Musa okhubir'ra mwilumbesi.

¹⁷Khu Baisiraeli obulafu yibwo bwafwana singa omul'lo okwatukhanga khubutenje bwesikulu.

¹⁸Musa yanichila okhutsia khusikulu mumalumbesi. Yamenya khusikulu amatukhu amakhumi kane om'basu nobutukhu.