Read lunyore OKHURULA 25 Bible Online

OKHURULA 25 - lunyore bible

OKHURULA 25

¹OMWAMI yabool'la Musa mbu,

²“Bool'la Abaisiraeli balombe omusango ma bakuhaane khu ise. Ohuchil'le omusango kwosi kwosi okwomundu wosi yakhenya okhuhaana.

³Emisango yitsi okhwola chibe efetsa, etsahabu, omukasa;

⁴ekatani isiyikhu; obuusi bwa buluu, obusembe nende obwakhanyu; ingubo eyalombwa khubwoya bweimbusi;

⁵liseelo liesimeme sieimbusi elienikhwa murangi inzakhanyu; liseelo linyukhe; emisaala chiomuruba;

⁶amafura kokhutsukha mutsitaya; emisaala chiesuswa khulwa amafura kokhutsukhil'lwa nende obwali obuhunyanga obulahi;

⁷amachina keshohamu nende amachina kandi akobukusi obutinyu okhubiikhwa khungubo yo Mwesaalisi Omukhongo nende khusichengwa siokhusilifu.

⁸Okhwola abandu banombele liheema litsienukhu, kho nase menye hakari mubo.

⁹Mulilombe nende okhulisiaha singa nzia okhumumanyia.

¹⁰“Mulombe lisanduku okhurula khumusaala kwomusisia. Oburambi bwalio bube etsisentimita emia ndala nende likhumi, ne obuchiikha bwalio bube etsisentimita amakhumi kasasaba nachisasaba, ne okhutsia ikulu oburambi bube etsisentimita amakhumi kasasaba nachisasaba.

¹¹Wale efetsa isiyikhu mukari isiyikhu nende esioba ma khundulo khwalio murekhwo efetsa okhulibotokhana.

¹²Olombe tsingaka tsietsahabu etsiokhuluchinga ma mutsibohe khubilenje bialio bine, tsingaka tsibili khusiolubeka.

¹³Olombe emisaala chiokhuluchinga okhurula khumusisia ma ochihomekhwo efetsa

¹⁴ma ochinjisie mutsingaka khusiolubeka Lwe lisanduku.

¹⁵Emisaala yitsio tsibe mutsingaka ne tsirahinibwamwo tawe.

¹⁶Ma ore amachina amapapale kabili aka nzia okhukhuha akahandikwakhwo amalako.

¹⁷“Olombe esifuunikho siefetsa isiyikhu, esihela oburambi etsisentimita emia ndala nende likhumi, nende esihela obuchiikha bwasio etsisentimita amakhumi kasasaba nachisasaba.

¹⁸Mulombe ebilombe b'bili bietsimbaha ebialombwa okhurula khufetsa eyatuywa,

¹⁹silala khulubeka l'lala lwesifuunikho ne esindi khulubeka lundi. Mubilombe kho bibe ebinyala okhuba esindu silala nende esifunikho.

²⁰Ebilombe bietsimbaho yibio bihengane elubeka nelubeka khusifuunikho, ne tsimbaho tsiabio tsibambukhe nitsibifunikha.

²¹Ore amachina kabili amapapale mwisanduku mukari ma mulifunikhe.

²²Nambukane n'nawe okhwene yikhwo, ne okhurula ikulu wesifuunikho hakari webilombe b'bili bietsimbaha nakhuhelesia amalako kosi aka Baisiraeli.

²³“Olombe emesa okhurula khumusaala kwomusisia ehela oburambi etsisentimita amakhumi munanene namunane, ne obuchiikha amakhumi kane nachine, ne okhutsia ikulu etsisentimita amakhumi kasasaba nachisasaba.

²⁴Ochifuunikhekhwo efetsa isiyikhu ma ore efetsa khundulo khwayo okhuchibotokhana.

²⁵Olombe olupao oluhela obubambukhu bwetsimilimita amakhumi kane anakataru nachirano okhuchibotokhana, nende efetsa khundulu khwayo okhubotokhana.

²⁶Olombe tsingaka tsine tsiokhuchinginga okhurula khufetsa ma otsire mutsikona tsine ahebilenje biemesa bili.

²⁷Tsingaka tsiokhwinjisiamwo emisaala tsiokhuchinga emesa tsirebwe ahembi khulupao olwabotokhana emesa.

²⁸Olombe emisaala chiomusisia ma ochifuunikhekhwo efetsa.

²⁹Olombe etsisahani, ebikombe, etsihaari nende tsindaabo khulwo okhurumikhilwa okhuhaana omusango kwewaini. Yibi biosi bilombwe okhurula khufetsa isiyikhu.

³⁰Emesa erebwe imbeli we Lisanduku lie Indakano, ne khumesa yikhwo kubetsengekhwo omukaati omutsienukhu okuhanwanga khu ise.

³¹“Olombe esihani sietsitaya okhurula khufetsa isiyikhu. Olombe obwikhalo bwasio nende omwambo kwasio okhurula khufetsa eyatuywa; ne amahwa kokhusing'onia, halala nesimuli nende amakanikho kasio kabe esindu silala nende esihani tsana.

³²Tsisaka tsisasaba tsirule khumwambo kwasio tsitaru khulubeka l'lala ne tsitaru khulubeka lundi.

³³Siolusaka khutsisasaba yitsio lobe namahwa akokhulung'onia akelikondo singa inzoli yomusaala kwelitunde okulikho esimuli nende obwamu.

³⁴Omwambo kwesihani kube amahwa kane akokhusing'onia akafwana singa inzoli yomusaala kwelitunde okulikhwo esimuli nende obwamu.

³⁵Okhwola esimuli silala sibe isi wabuli tsisaka tsibili esiakhataru.

³⁶Esimuli, tsisaka nende esihani bibe esindu silala esialombwa okhurula khufetsa isiyikhu khandi eyatuywa.

³⁷Mulombe etsitaya tsine natsitaru etsiokhurebwa khubihani ma mutsirenjekhe tsibe etsinyala okhukhosia obulafu imbeli.

³⁸Olombe ebifumil'lo biasio nende tsindelu okhurula khufetsa isiyikhu.

³⁹Orumikhile efetsa isiyikhu ehela etsikilo amakhumi kataru natsirano okhulomba esihani nende ebindu bindi biosi ebilikhwo.

⁴⁰Ohenjelesie bulahi obilombe okhulondokhana nende obwa ndakhumanyia noli khusikulu.