Read lunyore OKHURULA 33 Bible Online

OKHURULA 33 - lunyore bible

OKHURULA 33

¹OMWAMI yabool'la Musa mbu, “Rula habundu hano, ibe halala nende abandu bawahinia Emisiri, ma otsie musibala siandasubisia okhuhelesia Aburahamu, Isaka nende Yakobo halala nabolwibulo lwabwe.

²Ise narume om'malaika khulwo khumwemel'la ne nakhunge Abakanaani, Abahiti, Abaperisi, Abahiwi nende Abayebusi okhurula musibala yisio.

³Mutsitsanga mwiloba lili nobunolu obwinji. Nebutswa sinzia n'nenywe tawe sichila muli abandu abarali abahulili ne haundi ndamumuma mwesi nimusili khuluchendo.”

⁴Olwabandu bahulila amang'ana yaka bachiaka okhwekhuula ma sibayebiikhakhwo ebimili khandi tawe.

⁵OMWAMI yali nalachile Musa okhubabool'la amang'ana yaka mbu, “Inywe muli abandu bemioyo emitinyu. Nindakhatsiye ninenywe, kata khulwe inyinga ndititi, khane ndakhamumuluye mwesi pe. Luno hinie ebimili biosi, ne ndalola elianyala okhumukhol'la.”

⁶Kho olwabandu barula khusikulu sia Sinai, Abaisiraeli sibayebiikhakhwo ebimili khandi tawe.

⁷Lwosi olwabandu ba Isiraeli bakhupanga ekambi habundu, Musa yabukulanga Liheema litsienukhu ne aliombokha olurambukho luti okhurula khukambi. Liali okhulangwa Liheema liokhubaho khwo MWAMI ne uyo wosi owali niyenya obwibaali okhurula khu MWAMI yarulanga mukambi ma atsiamwo.

⁸Olwa Musa yatsitsanga Mwiheema, abandu basinjilanga mumiliango tsiamaheema kabwe ne bahenga Musa okhwola olwa yenjila Mwiheema.

⁹Olwa Musa yali niyenjiye Mwiheema esiilo yelilumbesi yeekha okhurula mwikulu ma eba hamuliangokwe Liheema, ne OMWAMI yal'lomanga khu Musa okhurula mwilumbesi yilio.

¹⁰Khubwangu bwabandu balolanga esiilo yelilumbesi yilio hamuliangokwe Liheema balisikamilanga.

¹¹OMWAMI yal'lomanga khu Musa moni namoni, singa obwomundu al'lomanga khumulinawe. Ma Musa akalukha mukambi. Nebutswa, Omusiani omubuukha owali omukhonyel'li uwe, Yoshwa omusiani wa Nuni yasikalanga Mwiheema.

¹²Musa yabool'la OMWAMI mbu, “Lola ibe umbooleye nyemel'le abandu yaba okhurula Emisiri okhutsia musibala siawabahelesia nebutswa siwaimbool'la niwina owakhutsia n'naye tawe. Ibe ubooye mbu umanyile bulahi khandi osangasibwanga n'nase.

¹³Luno khusaayanga nikali khuyanzisianga, mbool'la akopaalanga okhukhola khe mbe onyala okhukhurumikhila ma nzilil'le okhukhuyanzisia. Orebil'la mbu wayela lihanga lino okhuba elilio tawe.”

¹⁴OMWAMI naboola mbu, “Nanzie n'nawe ma nakhuhelesie obulechi.”

¹⁵Musa nakalusia mbu, “Noratsia n'nefwe, oralekha ifwe khurule habundu hano tawe.

¹⁶Abulaho owanomanye mbu ibe wayanzisibwa nende abandu baabo halala n'nase norakhatsia n'nefwe tawe. Okhutsia khukhwo n'nefwe nakhuleere obwabukhani hakari wefwe Abaisiraeli nende abandu bandi bosi abali khusibala.”

¹⁷OMWAMI nabool'la Musa mbu, “Nzia okhukhola singa oreebele sichila ndakhumanya bulahi bwene khandi nyanzisibwanga n'nawe.”

¹⁸Kho Musa nareeba OMWAMI mbu, “Noyanza lekha khulole mubukhongo bubwo bwosi.”

¹⁹OMWAMI nakalusia mbu, “Nzia okhubir'ra imbeli uwo ma khumanyie obukasu bwanje bwosi khandi nzia okhukhuribul'la eliira lianje litsienukhu. Ise ndi OMWAMI ne manyianga tsimbabasi nende esirenda khu yabo bosi abaamal'le okhwela.

²⁰Sinambuchil'le inywe okhulola obweni bwanje tawe, sichila abulaho onyala khulola obweni bwanje ma abe mwoyo tawe,

²¹nebutswa hano buliho obukono ahembi khu ise ahonyala okhusinjila khulwanda.

²²Olwe ise mba nimbir'ranga imbeli wenywe ma mumanyie obulafu bwanje, nakhure mulwande lwolwanda ma khufuunikhe tsimoni okhwola olwa nambe nimbir're.

²³Kho nambinie omukhono kwanje mumoni mumwo ne nolole omukongo kwanje, ne tawe obweni bwanje.”