Read lunyore OKHURULA 35 Bible Online

OKHURULA 35 - lunyore bible

OKHURULA 35

¹Musa yalanga omukanda kwosi okwabandu ba Isiraeli ma nababool'la mbu, “Kano niko ako MWAMI alachile namukholenje:

²Muli namatukhu kasasaba akokhukhol'lamwo emilimo chienywe, nebutswa litukhu liakhane nakhataru libe litsienukhu, litukhu lioluyali eliokhuhuluukha eliahanwa khu ise, ouli OMWAMI. Omundu wosi owakhakhola omulimo kwosi litukhu yilio okhwola yerwe.

³Kata murakhabwanakhwo omul'lo munyumba tsienywe litukhu lie Sabato tawe.”

⁴Musa nabool'la abandu bosi Abaisiraeli “Kano niko ako MWAMI alakanga mukhole:

⁵Muhaane omusango khu MWAMI. Omundu wosi owenyanga okhuhaana omusango akhoyele okhuleera esihanwa siefetsa, etsahabu nohomba omukasa;

⁶nende ingubo yekatani, eyabuluu, isembe nende obwoya obwakhanyu nende ingubo eyalombwa khubwoya bweimbusi,

⁷liseelo lielikondi elienikhwa murangi inzakhanyu, liseelo lisiyikhu; emisaala chiomuruba.

⁸Amafura kokhutsukha mutsitaya, ebihunyanga bulahi khulwo khureebwa mumafura kokhubakha ebielwa bia Nyasaye, nende okhureebwa mubwali obuhunyanga bulahi;

⁹khandi amachina keshohamu okhureebwa khu kanzu nende ingubo yo mukari yo Mwesaalisi Omukhongo.

¹⁰“Abatiyi bosi abasitsa mu inywe betse balombe siesindu siosi esio MWAMI yalaka silombwe.

¹¹Balombe Liheema, esiokhulifuunikha nende esiofuunikhakhwo ikulu, tsingaka tsialio nende ebikhongo.

¹²Lisanduku lie Indakano, emisaala chialio, esifuunikho sialio nende etsipasia tsiokhulisinga;

¹³emesa, nende emisaala chiayo nende ebindu biayo biosi; emikaati echihanwanga khu Nyasaye;

¹⁴Esihani sietsitaya khulwobulafu nende ebirumikhilo biakhwo; etsitaya namafura katsio;

¹⁵olusambwa lwokhusamba obwali nende emisaala chiokhuluchinga, amafura kokhubakha esielwa sia Nyasaye, nende obwali obuhunyanga bulahi; epasia yomubwinjil'lo bwe Liheema:

¹⁶Olusambwa lwokhusambilakhwo emisango nende etsising'eng'e tsialwo tsiomukasa, emisaala chiokhuluchinga nende biosi ebirumikhangakhwo, ebeseni yokhwesaabilakhwo nende esierenjekhwangakhwo;

¹⁷etsipasia tsiokhusinga Liheema, ebikhongo biatsio nende epasia tsio mubwinjil'lo bwomulukaka lwe Liheema,

¹⁸ebibambo nende emikoye tsie Liheema nende ebiokhusira Liheema;

¹⁹nende tsingubo tsieing'ono indahi etsiabesaalisi okhwebikha olwa baba nibarumikhanga Habundu Hatsienukhu, tsingubo tsinzienukhu tsiomwesaalisi Haruni nende etsia basiani baabe.”

²⁰Kho Abaisiraeli bosi barula ha Musa yali nali,

²¹ne buli mundu wosi owali nobunaayi okhuhaana esihanwa khu MWAMI khulwo khwombokhela Liheema liokhubaho khwo MWAMI yakhola mbwo. Baleera buli sindu siosi esienyekha khulwokhwekayakaya nende esiokhulomba tsingubo tsiabesaalisi.

²²Buli musaatsa nohomba omukhasi owenya khuleera ebindu yibio, yaleera ebindu biokhung'onia singa ebikwasi, ebimili bio mumarwi, tsingaka, ebiyuma biomumakosi nende ebindu bindi biosi ebialombwa khutsahabu nibabihaana khu MWAMI.

²³Omundu wosi owali neingubo yekatani, eyabuluu, isembe nohomba obwoya obwakhanyu, ingubo eyalombwa khubwoya bweimbusi; liseelo lielikondi elienikhwa murangi inzakhanyu; nohomba liseelo lisiyikhu, yali okhuleera.

²⁴Yabo bosi abali abanyala khuhaana etsahabu nohomba omukasa baleera ebihanwa biabwe khu MWAMI, khandi yabo abali nemisaala chiemisisia echinyala okhurumikha khubutiyi baleera.

²⁵Abakhasi abasitsa mubunabi baleera obuusi bwekatani isiyikhu, obuusi bwabuluu, obusembe nende obwakhanyu obwa bali nibalombele.

²⁶Khandi balomba obuusi okhurula khubwoya bwetsimbusi.

²⁷Abemeli baleera amachina keshohamu obukali nikali mutsirangi tsiabukhan'ne khulwo okhureebwa khungubo ya efoti nende khusichengwa.

²⁸Khandi baleera ebindu bietaya nende amafura ketsitaya nende amafura kokhubakha ebielwa bia Nyasaye nende obwali obuhunyanga bulahi.

²⁹Abandu bosi Abaisiraeli abali nokhunaaya khwokhuhaana, baleera ebihanwa biabwe khu MWAMI khulwo omulimo kwo MWAMI yali nalachile Musa akukhole.

³⁰Musa nabool'la Abaisiraeli MBU, “OMWAMI wel'le Basaleli, Omusiani wa Uri ouli omwitsukhulu wa Huri okhurula mulwibulo lwa Yuda.

³¹OMWAMI umwitsusisie nobunyali bubwe, ma umuheye obusitsa, obuchesi nende okhumanyilisia kosi akakhenye kekhole,

³²khulwo okhuloosia amang'oole kobusitsa ma okhulombamwo ebindu biefetsa, etsahabu nende emikasa;

³³khulwo okhubaatsa amachina keshohamu kokhwombokha; nende okhubaatsa tsimbao nende omulimo kundi kwosi okwakhenya obusitsa.

³⁴OMWAMI umal'le okhuhelesia Basaleli halala nende Oholiabu omusaini wa Abisamachi okhurula mulwibulo lwa Dani, obuchesi bwokhwechia obusitsa bwabwe khubandi.

³⁵OMWAMI ubaheye obusitsa obwemilimo chiosi echieletanga khububaatsi; obungooli nende obunabi bwekatani isiyikhu, eyabuluu, isembe, inzakhanyu neingubo yindi yosi. Basaleli nende Oholiabu banyala khukhola emilimo chiosi khandi nabangooli abalahi.