Read lunyore OKHURULA 37 Bible Online

OKHURULA 37 - lunyore bible

OKHURULA 37

¹Besaleli yalomba Lisanduku lie Indakano okhurula khumusaala kwomusisia; liali noburambi obuhela etsisentimita emia ndala nende likhumi, ne obuchiikha etsisentimita amakhumi kasasaba nachisasaba, khandi oburambi bweikulu etsisentimita amakhumi kasasaba nachisasaba.

²Yatsifunikha nende efetsa isiyikhu mukari nende esioba ma natsibotokhania nende efetsa.

³Yalomba tsingaka tsifetsa tsine khulwo khulichinga ma nachiachikha khubilenje bialio bine, buli olubeka lwali netsingaka tsine.

⁴Yalomba emisaala tsiokhulichinga echia yalomba okhurula khumusisia ma nachifuunikhakhwo efetsa,

⁵ma nachinjisia mutsingaka khubuli lubeka lwe Lisanduku.

⁶Yalomba esifunikho siefetsa isiyikhu esiali noburambi etsisentimita emia ndala nende likhumi, obuchiikha amakhumi kasasaba nachisasaba.

⁷Yalomba ebilombe bie tsimbaha bibili ebialombwa khufetsa isiyikhu,

⁸sisilala khulubeka l'lala lwesifuunikho. Yabiongania biosi halala okhuba esitonye silala siesifunikho.

⁹Ebilombe bietsimbaha biahengana elubeka nelubeka khusifuunikho, ne tsimbaha tsiabio tsibambukhe nitsifuunikha esifuunikho.

¹⁰Yalomba emesa khumusisia, ne oburambi bwayo bwali etsisentimita amakhumi munane nende munane, obuchiikha bwali etsientimita amakhumi kane nachine, ne oburambi bwe ikulu bwali etsisentimita amakhumi kasasaba nachisasaba.

¹¹Yachifunikhakhwo efetsa isiyikhu na nabotokhaniakhwo olukhayayi lwefetsa.

¹²Yalomba olupao oluhela oburambi bwetsimilimita amakhumi kane nakataru nachirano, okhuchibotokhana ma nara efetsa khundulo khwolupao tsana.

¹³Yalomba tsingaka tsine etsiokhuchinga emesa okhurula khufetsa ma natsira mutsikona tsine ahebilenje biayo biali.

¹⁴Tsingaka tsiokhwinjisiamwo emisaala chiokhuchinga emesa tsiarebwa ahembi nende olupao.

¹⁵Yalomba emisaala tsana okhurula khumusisia ma nachifunikhakhwo efetsa.

¹⁶Yalomba ebindu biokhurumikhilwa khumesa okhurula khufetsa: nabio ne tsisahani, ebikombe, etsihaari, nende tsindaabo etsiokhurumikhila khumusango kwewaini.

¹⁷Besaleli yalomba esihani sietsitaya okhurula khufetsa isiyikhu. Yalomba obwikhalo bwasio nende omwambo kwasio okhurula khufetsa isiyikhu; amahwa akasiahwakhwo halala nebimuli nende obwamu biali esindu silala nesihani.

¹⁸Tsisaka tsisasaba tsiayaala okhurula mumbeka tsiasio, tsitaru khusiolubeka.

¹⁹Khusiolusaka khutsisaka tsisasaba, khwalikhwo namahwa kataru akasiahilwe bulahi singa inzoli yomusaala kwelitunde okulikhwo esimuli nende obwamu.

²⁰Omwambo kwesihani kwali namahwa akokhusiaha kane akasiahilwe singa inzoli yomusaala kwelitunde okulikhwo esimuli nende obwamu.

²¹Khwaliho nesimuli silala isi wabuli tsisaka tsibili esiakhataru.

²²Esimuli, tsisaka nende esihani sietsitaya biosi biali butswa esindu silala esialombwa khufetsa isiyikhu khandi eyatuywa.

²³Yalomba etsitaya tsine natsitaru okhureebwa khusihani, ma nalomba ebifumil'lo biasio nende tsindelu okhurula khufetsa isiyikhu.

²⁴Yarumikhila efetsa isiyikhu ehela etsikilo amakhumi kataru natsirano okhulomba esihani nende ebindu bindi biosi ebilikhwo.

²⁵Besaleli yalomba olusambwa khumusaala kwomusisia olwokhusambilakhwo obwali. Lwali oluhelanu oburambi nende obuchiikha mbu etsisentimita amakhumi kane nachirano oburambi khandi obuchiikha etsisentimita amakhumi kane nachirano, ne oburambi okhutsia ikulu bwali etsisentimita amakhumi karano nakane. Tsinzika tsialwo mutsikona tsine tsiali esindu silala nolusambwa tsana.

²⁶Yafunikha olusambwa yilwo netsahabu isiyikhu ikulu, tsimbeka tsiosi tsine nende tsinzika tsialwo ma nalubotokhania nolukhayayi lwetsahabu.

²⁷Yalomba tsingaka tsibili tsietsahabu khuluchinga ma nachira isi wolukhayayi khutsimbeka tsibili, okhwinjisia mwo emisaala echiokhuluchinga.

²⁸Yalomba emisaala yichio okhurula khumusisia ma natsifunikhakhwo etsahabu.

²⁹Khandi Besaleli yalomba amafura amatsienukhu khulwo okhutsukhil'la khubandu ba Nyasaye yel'le nende obwali obuhunyanga obulahi, obutsokanibwe singa amafura kokhwebakha.