Read lunyore OKHURULA 38 Bible Online

OKHURULA 38 - lunyore bible

OKHURULA 38

¹Khulwokhusamba emisango, Bisaleli yalomba olusambwa okhurula khumusisia. Lwali oluhelanu, mbu oburambi obuhela etsimiita tsibili nende ebisubi bibili, obuchiikha obuhela etsimiita tsibili nende ebisubi bibili ne oburambi okhutsia ikulu emita ndala nende ebisubi bitaru.

²Yalomba tsinzika ikulu wetsikona tsine ma nitsilomba esindu silala nolusambwa. Yalufuunikha lwosi nende omukasa.

³Khandi yalomba ebindu biosi ebibetsanga khulusambwa: mbu tsinzio, obunolu, tsindaabo, tsingaka nende ebifuria biokhutekhelakhwo. Ebindu yibi biosi bialombwa okhurula khumukasa.

⁴Yalomba esing'enge siomukasa ma nasira isi wolupao lwolusambwa, ma nilwola hakari woburambi bwolusambwa.

⁵Yalomba tsingaka tsine tsiokhuluchinga ma natsira mutsikona tsine.

⁶Yalomba emisaala chiokhuluchinga okhurula khumusisia, nachifunikhakhwo omukasa,

⁷ma nachinjisia mutsingaka khu buli lubeka lwolusambwa. Olusambwa lwalombelwa tsimbao ne lwali olwalamu.

⁸Besaleli yalomba ebeseni yomukasa nende ebikuru biayo okhurula khubilang'i biabakhasi okhwelol'lamwo. Abakhasi yabo barumikhanga habwinjil'lo bwe Liheema liokhubaho khwo MWAMI.

⁹Besaleli yasir'ra Liheema liokhubaho khwo MWAMI etsipasia tsiekatani isiyikhu. Khulubeka lwenandete, etsipasia tsiali noburambi obuhela etsimiita amakhumi kane natsine,

¹⁰nitsisungilwe khumisaala chiomukasa amakhumi kabili, mubikuru biomukasa amakhumi kabili, nebifuuli nende etsisimbo tsiomukasa.

¹¹Khandi olubeka lwesinyolu lwasirwa singa olwenandete.

¹²Khulubeka lwemasaba khwaliho netsipasia etsioburambi obuhela etsimiita amakhumi kabili natsibili nende ebikhongo likhumi nende ebikhuru likhumi halala nende ebifuuli nende etsisilo tsiomukasa.

¹³Khulubeka lwe ebukwe, ahobwinjil'lo bwali, etsipaswa tsiali noburambi obuhela etsimiita amakhumi kabili natsibili.

¹⁴Khu buli olubeka lwobwinjil'lo khwali netsipasia etsihela etsimiita tsisasaba nebisubi bisasaba halala nemisaala tsitaru nende ebikuru bitaru.

¹⁶Etsipasia tsiosi etsiasinga Liheema liokhubaho khwo MWAMI tsianabwa khukatani isiyikhu.

¹⁷Ebikhuru biebikhongo bialombwa khumukasa, ne ebifuuli, etsisilo, nende ebifuunikho biebikhongo bialombwa khutsahabu. Ebikhongo biosi ebiabotokhana Liheema bionganibwa halala netsisilo tsietsahabu.

¹⁸Epasia yomubwinjil'lo yanabwa khukatani isiyikhu eyanabilwa obuusi bwabuluu, obusembe nende obwakhanyu ma eyang'oonibwa nende amahwa. Oburambi bwayo bwali etsimiita tsirano natsine ne obuchiikha nibuba etsimiita tsibili singa etsipasia etsiabotokhana Liheema.

¹⁹Epasia iyo yaletel'lwa nende ebikhongo bine ebili mubikhuru bine ebiomukasa. Ebifuuli biabio, nebifuunikho biabio ebiokhwikulu, nende etsisiilo tsiabio bialombwa khutsahabu.

²⁰Ebibambo bie Liheema biosi nende olukaka olwasirwa esioba we Liheema bialombwa khumukasa.

²¹Buno nibwo obwinji bwebindu biebibia ebirumikhanga Mwiheema liokhubaho khwo MWAMI, ahoruchina orupapale rubili rwabikhwanga orwali nirwahandikwakhwo Amalako Likhumi. Ebindu bino bialakwa na Musa ma nibikholwa nende Abalawi abarumikhanga hasi wobwemeli bwa Itsamari omusiani wa Haruni owali omwesaalisi.

²²Besaleli, omusaini wa Uri omwitsukhulu wa Huri, okhurula mulwibulo lwa Yuda, yakhola amang'ana kosi singa OMWAMI yali nalachile.

²³Omukhonyel'li uwe Oholiabu, omusiani wa Ahisamaki okhurula mulwibulo lwa Dani niye owabikunza, nabing'ola ma nalukha ingubo yekatani isiyikhu khandi nende ingubo elimwo nende obuusi bwabuluu, obusembe nende obwakhanyu.

²⁴Etsahabu yosi eyali nehan'nwe khu MWAMI khulwe Liheema litsienukhu yali etsikilo ehelefu ndala okhulondokhana nobusiro obwahuchil'lwa.

²⁵Etsahabu eyarula khububali bwabandu yali etsikilo etsielefu tsitaru, tsimia tsine namakhumi kataru okhulondokhana nebusiro obwahuchil'lwa.

²⁶Obusiro bwamapesa yibu bwahelana nende obwabandu ababasibwa bali nibarunjile nibuchel'lwe khubusiro obwahuchil'lwa. Abandu bosi ababalwa nibahandiikwa amera abali nemihika amakhumi kabili nohomba okhubira bali etsielefu tsimia tsisasaba natsitaru, tsimia tsirano namakhumi karano.

²⁷Etsikilo etsielefu tsitaru netsimia tsine tsietsahabu tsiarumikhilwa okhulomba ebikuru emia ndala khulwe Liheema nende khulwe etsipasia, etsikilo amakhumi kataru nachine khubuli esikuru silala.

²⁸Besaleli yarumikhila etsahabu eyali nesikaye etsikilo amakhumi kataru okhulomba etsisiilo, ebifuuli biebikhongo, nende okhufuunikha ebirwe biemisaala.

²⁹Omukasa okwahanwa khu MWAMI kwali etsikilo etsielefu tsibili, tsimia tsine namakhumi kabili nachirano.

³⁰Besaleli yakurumikhila okhulomba ebikuru biobwinjil'lo bie Liheema liokhubaho khwo MWAMI, olusambwa lwomukasa nende esing'enge siomukasa, ebirumikhilo biolusambwa biosi,

³¹ebikuru biolukaka lwesioba nende biobwinjil'lo bwalwo, nende ebibambo biosi bie Liheema nende omuchitsi kwalio kwosi.