Read lunyore OKHURULA 40 Bible Online

OKHURULA 40 - lunyore bible

OKHURULA 40

¹OMWAMI yabool'la Musa mbu,

²“Khwitukhu liokhuranga osinjisie Liheema liokhubaho khwanje.

³Mure mukari mwalio Lisanduku lie Indakano elilimwo amalako likhumi ma ore epasia imbeli walio.

⁴Winjisiemwo emesa ma obiikhekhwo ebindu biakhwo biosi. Khandi winjisiemwo esihani ma obiikhekhwo etsitaya.

⁵Obiikhe olusambwa lwetsahabu olwokhusamba obwali imbeli we Lisanduku lie Indakano ma osunge epasia habwinjil'lo bwe Liheema.

⁶Obiikhe imbeli we Liheema olusambwa lwokhusambilakhwo emisango.

⁷Ore ebeseni yokhwesaabilakhwo hakali we Liheema nende olusambwa ma witsusiekhwo amaatsi.

⁸Obiikheho olukaka okhulibotokhana ma osunge epasia mubwinjil'lo bwalwo.

⁹“Ma ohaane Liheema nende ebindu bilimwo biosi khu ise OMWAMI khulwo okhulitsukhakhwo amafura amatsienukhu, nalio lilaba litsienukhu.

¹⁰Ma, ohaane khu ise OMWAMI olusambwa nende ebiokhurumikhilwakhwo biosi khulwo okhulutsukhil'lakhwo amafura nalwo lulaba olutsienukhu okhusila.

¹¹Khandi nimbwo olatsienula ebeseni yokhwesaabilakhwo nende ebikuru biayo.

¹²“Oleere Haruni nende abasianibe habwinjil'lo bwe Liheema ma obabool'la besinge mumaatsi amatsienukhu.

¹³Obiikhe Haruni tsingubo tsiobwesaalisi, omubakhe amafura ne munjila yiye omutsienule, mbu abe onyala okhuurumikhila singa omwesaalisi.

¹⁴Oleere abasiani baabe ma obabiikhe amasati.

¹⁵Ma obatsienule, singa obwa otsienula samwana wabwe, mbu babe abanyala okhuurumikhila singa abesaalisi. Okhutsienulwa yikhu khulabakhola abesaalisi mumatukhu kosi aketsanga.”

¹⁶Musa yakhola ebindu biosi singa obwo MWAMI yali namulachile.

¹⁷Kho khwitukhu liokhuranga khumwesi kwokhuranga khumuhika kwakhabili okhurula nibarula Emisiri, Liheema liokhubaho khwo MWAMI liombokhwa.

¹⁸Musa yarechekha ebikuru bialio, nalomba tsimbao tsialio, nakhoma tsisimbo, ma nasinjisia ebikhongo.

¹⁹Yaala khwiheema tsana esifuunikho ma nafuunikhakhwo khandi nende esifuunikho siakhabili ikulu wesifuunikho siokhuranga; singa obwo MWAMI yali namulachile.

²⁰Ma nabukula oruchina orupapale rubili narura Mwisanduku lie Indakano. Yenjisia emisaala mutsingaka tsie Lisanduku ma nalirakhwo esifuunikho.

²¹Ma nara lisanduku tsana Mwiheema ma nasunga epasia yokhulisinga. Munjila yiyi yasinga Lisanduku lie Indakano singa obwo MWAMI yali namulachile.

²²Yenjisia emesa Mwiheema, nachira khulubeka lwesinyolu esioba wepasia,

²³ma narakhwo emikaati echihanwanga khu MWAMI, singa obwo MWAMI yali namulachile.

²⁴Yara esihani Mwiheema, khulubeka lwenandete okhuhengana nende emesa,

²⁵ma habwene yaho imbeli wo MWAMI nahambia etsitaya, singa obwo MWAMI yali namulachile.

²⁶Yara olusambwa lwetsahabu Mwiheema imbeli wepasia,

²⁷ma nasamba obwali obuhunyanga bulahi, singa OMWAMI yali namulachile.

²⁸Yasunga epasia habwinjil'lo bwe Liheema,

²⁹ma imbeli wepasia tsana naraho olusambwa khulwokhusamba emisango. Khulusambwa tsana yahaanakhwo omusango omusambe nende okwobuswache, singa obwo MWAMI yali namulachile.

³⁰Yara ebeseni yokhwesaaba hakari we Liheema nende olusambwa ma natsukhakhwo amaatsi.

³¹Musa, Haruni, nende abasiani ba Haruni besaabanga amakhono nende ebilenje biabwe mubeseni yimwo,

³²buli lwosi olwa benjilanga Mwiheema nohomba olwa batsitsanga khulusambwa, singa obwo MWAMI yali namulachile.

³³Musa yasira lisisi okhubotokhana Liheema nende olusambwa ma nasunga epasia habwinjil'lo bwelisisi tsana. Kho yamala emilimo chiosi.

³⁴Ma lilumbesi liafuunikha Liheema ne obulafu obukhongo obumanyianga okhubaho khwo MWAMI nibwitsula Mwiheema.

³⁵Khulwe yaka, Musa siyaali onyala okhwinjila Mwiheema tawe.

³⁶Abaisiraeli basunda butswa ekambi yabwe sibeka olwelilumbesi liali nilirul'le Khwiheema lwonyene.

³⁷Oluhono olwelilumbesi lifuunikhanga Liheema sibasundanga ekambi yabwe tawe.

³⁸Mukhubokaboka khwabwe khwosi balolanga lilumbesi liokhubaho khwo MWAMI nilifunikhile Liheema munyinga yomubasu ne munyinga yobutukhu, balolanga omul'lo nikwatukhanga khulio.