Read lunyore OKHURULA 7 Bible Online

OKHURULA 7 - lunyore bible

OKHURULA 7

¹OMWAMI namubool'la mbu, “Nzia okhukhukhola ibe okhuba singa Nyasaye khumuruchi, ne omusiani wenywe Haruni alal'loma khuye singa omuroobi uwo.

²Obool'le Haruni kosi akanzia okhukhubool'la, naye nabool'le omuruchi alakhuule Abaisiraeli barule musibala sisie.

³Nebutswa nakhole omwoyo kwomuruchi okhuba omutinyu ne sinakhuhul'le tawe, kata nimba nikhola akamangalimwa amenji khusibala sie Misiri.

⁴Ma nandeere esinyasio esikali khusibala sie Misiri ma mbinie olwibulo lwabandu banje musibala yimwo.

⁵Nilwo olwa Abaamisiri nabamanye mbu ise ndi OMWAMI olwa nambahe esinyasio ne nimbinia Abaisiraeli musibala siabwe.”

⁶Musa nende Haruni bakhola aka OMWAMI yali nababooleye.

⁷Olwene yilwo olwa bal'loma khumuruchi, Musa yali nemihika amakhumi munane, ne Haruni yali nemihika amakhumi munane nachitaru.

⁸OMWAMI yabool'la Musa nende Haruni mbu,

⁹“Omuruchi naba namubool'la mbu mukhole akamangalimwa okhumanyia ninywe bena, obool'le Haruni abukule indabusi yiye ma achifuube hasi imbeli womuruchi nayo elakalukhana okhukwa inzokha.”

¹⁰Kho Musa nende Haruni batsia khumuruchi ma nibakhola ako MWAMI yali nababooleye. Haruni nafuuba indabusi yiye hasi imbeli womuruchi nende imbeli wabakhongo bomuruchi nayo nekalukhana okhukwa inzokha.

¹¹Kho omuruchi yalanga abachetsiyi baabe nende abafumu, nabo nibakhola singa mbwo nibarumikhilanga obufumu bwabwe.

¹²Bafuuba hasi tsindabusi tsiabwe, natsio tsiakalukhana okhukwa tsinzokha. Nebutswa indabusi ya Haruni nemila tsindabusi tsiabwe.

¹³Kata mbwo, omuruchi yatsilil'la okhutinyia omwoyo kukwe, singa butswa obwo MWAMI yali nabooye mbu omuruchi sinahul'le aka Musa nende Haruni.

¹⁴Kho OMWAMI nabool'la Musa mbu, “Omuruchi utinyisie omwoyokwe okhusila ma usuye okhulakhuula abandu banje batsie.

¹⁵Kho notsie okhwakaana n'naye mukamba tsuli olwa nabe natsitsanga khumuchela kwa Naili. Nobukule indabusi eyali okhukalukhana okhukwa inzokha notsie n'nayo, ma nomulindil'le haluchinga lwomuchela.

¹⁶Ma obool'le omuruchi mbu, ‘OMWAMI, Nyasaye wa Baheburania yarumile khubool'le olakhuule abandube batsie okhumwekayakaya musitsiimi. Nebutswa okhwola luno osili okhubalakhuula.

¹⁷Omwami, lola, Nyasaye aboolanga mbu witsa okhumanya ye niwina khumang'ana aka yetsa okhukhola. Lola nzia okhukhupaka amaatsi komuchela neindabusi yino, ne amaatsi ketsa okhukalukhana okhukwa amatsahi.

¹⁸Tsisuche tsitsa okhufwa, ne omuchela nakuhunye obukundu ma Abaamisiri nababule okhunywa amaatsi kakwo.’ ”

¹⁹OMWAMI nabool'la Musa, “Bool'la Haruni abukule indabusi yiye, anyiile omukhonokwe okhumanyia indabusi khumichela chiosi, khumayabo kosi nende amatubango kamaatsi kosi mu Misiri. Amaatsi ketsa okhukalukhana okhukwa amaatsi, ne siahabundu mu Misiri hetsa okhukwa amaatsi kata mumatanji ketsimbao nende akamachina.”

²⁰Ma Musa nende Haruni nibakhola ako MWAMI yali nabalachile. Haruni yachinga indabusi yiye ikulu imbeli womuruchi nende imbeli wabakhongobe ma nachitiaba khumuchela, ne amaatsi kosi mumuchela tsana nikakwa amatsahi.

²¹Tsisuche mumuchela tsana nitsifwa ne kwahunya obukundu obukali ma Abaamisiri sibakhanyweye amaatsi kakwo tawe. Amatsahi kali siahabundu hosi mu Misiri.

²²Ma abafumu bomuruchi nibakhola akafwana mbwo nibarumikhilanga obufumu bwabwe, ne omuruchi yatinyia omwoyokwe okhusila singa khasotso. Singa butswa obwo MWAMI yali nabooye, omuruchi yasuula okhuhulila Musa nende Haruni.

²³Musilenje yisio, yahunzukha okhukalukha hangohe hoburuchi narahendelakhwo akali nikekholekhenje.

²⁴Abaamisiri bosi bayabo khuluchinga lwomuchela okhunyoola amaatsi kokhunywa sichila sibali abanyala okhunywa amaatsi komumuchela tawe.

²⁵Amatukhu kane nakataru kahwa okhurula OMWAMI nakhupaka khumaatsi kokhumuchela.