Read lunyore OKHURULA 8 Bible Online

OKHURULA 8 - lunyore bible

OKHURULA 8

¹Ma OMWAMI, nabool'la Musa “Tsia khumuruchi omubool'le mbu OMWAMI aboolanga ‘Lekha abandu banje batsie okhundekayakaya.’

²Noba nosuula, nambaane esinyasio musibala sisio khulwo okhwitsusiamwo amaseelo.

³Omuchela kwa Naili nakwitsulemwo amasele ma nakarulemwo nikenjila hango haho; nakenjile mubikoti ebiokonangamwo, mulwalo lwesitanda sisio, mutsinyumba tsiabakhongobo nende etsiabandubo, kata nende mumachiko kokhutekha nende mubifuria bibio.

⁴Nakaruume khu iwe nende khubandu baabo halala nende abemeli belihanga lilio!”

⁵OMWAMI nabool'la Musa, “Bool'la Haruni achinguule indabusi yiye khumichela khumayabo nende khumatubango kamaatsi ma kachile amasele ketse okhwitsula musibala sie Misiri.”

⁶Haruni yachinguula indabusi yiye khumaatsi kosi ma amasele niketsula musibala sie Misiri.

⁷Nebutswa abafumu barumikhila obufumu bwabwe, khandi nabo nibaleera amasele khusibala.

⁸Omuruchi nalanga Musa nende Haruni ma nababool'la mbu, “Saaye khu MWAMI ahiinie amasele yaka Musibala nase nandekhe abandu batsie okhuhaana omusango khu MWAMI.”

⁹Musa nakalusia mbu, “Ndakhasangala okhukhusaayila. Mbool'la inyinga yanyala okhukhusaayila ibe nende abemelibo nende abandubo, ma amasele nakarule musibala siosi ne libulaho elianalisikale nikarali akali mumuchela kwa Naili.”

¹⁰Omuruchi nakalusia mbu, “Nausaayile mukamba.” Musa naboola mbu, “Nakhole akorebele ma nilwo olwa nomanye mbu khubulakhwo nende nyasaye undi narali OMWAMI Nyasaye wefwe.

¹¹Ibe nende abemeli baabo nende abandubo namuhinibwekhwo amasele, ne libulaho elianalisikale nikarali akali mumuchela kwa Naili.”

¹²Ma Musa nende Haruni nibarula khumuruchi ne Musa nasaaya khu MWAMI mbu ahiinie amasele aka yali naleer're khumuruchi.

¹³OMWAMI yakhola singa Musa yali nareebele ne amasele akali mutsinyumba, mumikitsi nende mumikunda nikafwa.

¹⁴Abaamisiri bakabunjikha mubifuumi ebikali ma esibala siosi nisihunya obukundu khulwako.

¹⁵Olwomuruchi yalola mbu amasele kafwiye, yatinyia omwoyo kukwe khandi, ne singa OMWAMI yali nabooye omuruchi siyahulila Musa nende Haruni tawe.

¹⁶Ma OMWAMI nabool'la Musa mbu, “Bool'la Haruni akhupe indabusi yiye hasi, ne musibala siosi esie Emisiri olukuukhi nalukalukhane okhukwa tsinda.”

¹⁷Kho Haruni yakhupa indabusi yiye hasi ne olukuukhi musibala siosi esie Misiri lwakalukhana okhukwa tsinda etsienjila mubandu nende mumiruko.

¹⁸Abafumu bateema okhurumikhila obufumu bwabwe okhuleera tsinda nebutswa sibanyala tawe. Khwaliho netsinda siahabundu hosi,

¹⁹ne abafumu babool'la omuruchi mbu, “OMWAMI niye okhol'le yaka!” Nebutswa omuruchi yatinyia omwoyo kukwe, ne singa OMWAMI yali nabooye omuruchi siyahulila Musa nende Haruni tawe.

²⁰OMWAMI nabool'la Musa mbu, “Nibusieye mukamba tsuli notsie okhwakan'na omuruchi natsitsanga mumuchela, ma omubool'le mbu OMWAMI aboolanga mbu, ‘Lakhuula abandu banje batsie okhundekayakaya.

²¹Khubool'langa mbu noba nosuula, nakhuler're tsisi singa esinyasio khuibe omwene nende abemelibo nende abandubo. Tsinyumba tsia Abaamisiri natsitsulemwo tsisi khandi natsitsule habundu hosi.

²²Nebutswa musibala sia Gosheni ahabandu banje bamenyanga sinareho tsisi tawe. Nakhole yaka kho nomanye mbu ise OMWAMI kholanga emilimo musibala muno.

²³Nareho olwakhwo hakari habandu banje nende abandu baabo. Ling'ana yili naliekhole mukamba!’ ”

²⁴OMWAMI yaruma emisinga emikali hango homuruchi nende mutsinyumba tsiabemelibe. Esibala siosi sifwabibwa netsisi.

²⁵Ma omuruchi nalanga Musa nende Haruni nababool'la mbu, “Tsie muhaane emisango khu Nyasaye wenywe hano musibala sianje.”

²⁶Musa namukalusia mbu, “Yako sikakhaba akahabwene tawe, sichila Abaamisiri bakhachonya mumakani khulwe emisango tsietsinyama etsia khuhaananga khu MWAMI Nyasaye wefwe. Nikhuba nikhurumikhila tsinyama yitsi ma khuchile Abaamisiri bachonye olwa khutsihaana habundu habanyala okhulola, beetsa okhukhulasa namachina ma bakhwire.

²⁷Okhwola khutsie oluchendo lwamatukhu kataru musitsiimi okhuhaana omusango khu MWAMI Nyasaye wefwe singa butswa yakhulaka.”

²⁸Omuruchi naboola mbu, “Namuhuchil'le okhutsia okhuhaana omusango khu MWAMI Nyasaye wenywe musitsiimi nikali simwakhatsia ehale okhurula hano tawe. Musaayile.”

²⁹Musa nakalusia, “Olwa nzia okhuba nirul'le hano nzia okhusaaya khu MWAMI mbu mukamba, tsisi natsirule khuibe, khubemeli baabo, nende khubandubo. Nebutswa orakhukaata khandi ma wikal'le abandu balekhe okhutsia okhuhaana omusango khu MWAMI tawe.”

³⁰Musa yarula khumuruchi ma nasaaya khu MWAMI,

³¹ne OMWAMI yakhola aka Musa yali namureebele. Tsisi tsiarula khumuruchi khubemeli babe nende khubandu babe; ebulaho kata ndala eyasikalakhwo tawe.

³²Nebutswa kata olwene yilu omuruchi yatinyia omwoyo kukwe ne khandi siyalekha abandu okhutsia tawe.