Read lunyore AYUBU 10 Bible Online

AYUBU 10 - lunyore bible

AYUBU 10

¹Njonyele okhumenya. Hulila okhwekaana khwanje okhululu okhusila.

²Orakhalachila esiina tawe, Nyasaye. Mbool'la! Nisina esiofunananga n'nase?

³Mbula ololanga nobulahi okhuba omululu khu ise, nende okhuchaaya esie ibe omwene walonga, ma oyanzisibwe amang'ana kabandu ababi noho?

⁴Tsimonitsio sitsili singa etsiomundu tawe; khandi sololanga ebindu singa obwomundu abilolanga tawe.

⁵Obulamubwo sibuli obwimbichiti singa obwefwe tawe.

⁶Kho nisina esichilanga norunilisia tsimbi tsianje tsiosi, nende okhukhabilisia obusiamu bwanje bwosi?

⁷Ibe wamanya ise mbula esikha, khandi abulaho onyala okhumbonia okhurula khuibe.

⁸“Amakhonoko niko akali okhungasia nikanomba, ne luno niko amatelwa tsana akaamumanga ise.

⁹Witsul'le mbu wanonga okhurula khwitoyi. Wenya okhungalusia mulukuukhi khandi noho?

¹⁰Ibe wanonga munda mwa mama wanje, singa esiachi silombwanga okhurula khumabele.

¹¹Wali okhulomba omubili kwanje namakumba nende emisi, ma nofunikha inyama nende likhoba khumakumba.

¹²Waimbelesia obulamu nende obuyanzi oburalilu; ne obutendibwo nibwo obuchilanga nindi mwoyo.

¹³Nebutswa luno ndakhamanya mbu tsinyinga yitsio tsiosi, waloosianga okhuusalisia masilisi.

¹⁴Nimba nikhola tsimbi, ibe undolanga, kata sionyala okhundekhela tsimbi tsianje tawe.

¹⁵Buli lwosi olwakhola tsimbi nyoolanga amanyakhano khu ibe, nebutswa, olwa mba nikhola amalunji sinzitsoomibwanga tawe. Ndi mukhutiima ma es'simba murwe sindiye.

¹⁶Nimba ninyoolakhwo amalahi kosi, nawe nohima obulamu bwanje singa esimba; ne okholanga akamakana khulwokhuusalisia.

¹⁷Buli khasotso obetsanga nabakobokheli bokhuufukula, oburimabwo khu ise bukhulanga nibumeetekha; buli khasotso oloosianga okhuuseera namang'ana amayia.

¹⁸“Nyasaye, esiachila nolekha ninzibulwa nisina? Bwakhabeye obulahi ndafwa omundu wosi naarandolakhwo tawe.

¹⁹Ndakharul'le butswa munda nende okhureebwa musilindwa, ma bwakhabeye butswa obulahi singa omundu oramenyakhwo.

²⁰Amatukhu kanje kasili matututu. Ndekha mbe, mbula, ndesangasiekhwo khutsinyinga tsiasili n'natsio yitsi.

²¹Naafwe bwangu yibu ne sinangalukhekhwo tawe - nanzie musibala esili esimwamu khandi esiilimu,

²²esibala esiilimu, esiesiinikha nende ingoyani, ahobulafu bwene bufwana esiilima.”