Read lunyore AYUBU 11 Bible Online

AYUBU 11 - lunyore bible

AYUBU 11

¹Ma Sofari okhurula Naamatsi yakalusia Ayubu naboola mbu,

²“Amang'ana amenji okhusila yaka kakhatakha likalusio? Mbula okhul'loma okhwinji yikhu khwakhakhukhola okhuba omulahi noho?

³Ayubu, opaalanga sikhunyala okhukhukalusia tawe? Amang'ana kaako keinzekhelesi yaka kakhachila khubune noho?

⁴Okhuba oboolanga mbu akobooye nakatooto; khandi oboolanga oli omusiyikhu mutsimoni tsia Nyasaye.

⁵Ndakhekombele makano Nyasaye alaba niye okhukalusia!

⁶Yakhakhubooleye mbu obuchesi nobwetsimbila tsinyinji; khuli nende ebindu ebieyinikhu ebio mundu orakhamanya. Nyasaye akhuhelesianga esinyasio esititi okhuyomba amabi kawakhola.

⁷“Wakhamanyilisia oburambi nende obubambukhu bwobukhongo nende obunyali bwa Nyasaye?

⁸Likulu silili nisio esihesi sia Nyasaye tawe, nebutswa likulu lili ahoranyala okhwola, Nyasaye wamanya esibala siabafu, nebutswa ibe siomanyile tawe.

⁹Obukhongo bwa Nyasaye nobubambukhu okhuyomba esibala, khandi nobubambukhu okhuyomba inyanza.

¹⁰Nyasaye niyakhakhufumila ma akhuleere okhuyaalwa, niwina owakhamwikal'la?

¹¹Nyasaye umanyile abandu barali matsami; khandi alolanga amabi kabwe kosi.

¹²“Nobutoro okhuruka inyama yomubulimo, okhuyomba okhukhola omuhingwa okhuba omuchesi.

¹³“Ayubu, tsienula omwoyo kukwo. Wole khu Nyasaye,

¹⁴obubi nende obutamanu obifuube ehale, okhurula mungo mumwo.

¹⁵Ma ohenge khusibala khandi noraliye khandi nolutswoni.

¹⁶Nawibil'le eminyakhano chichio chiosi, singa omukhulula kwamaatsi okumal'le okhubira, sila okhwitsul'lwa.

¹⁷Obulamubwo bulaakha okhubira mubulafu hakari; ne hobulamu buli musiilima esikali bulaakha singa obulafu bwem'mabwebwe.

¹⁸Olaba mulembe, nende obunaayi obukali; Nyasaye alakhusinga khandi akhuhelesie, abuhuluukhi.

¹⁹Siolaba noburi khubasuku baabo tawe, abandu abenji balakhureeba obukhonyi.

²⁰Nebutswa ababi balehenga tsimbeka tsiosi musihenda mwoyo, ma banyoola injila yokhuhonokokhelakhwo sieliho tawe. Ne injila ndala yobunaayi bwabwe eli mbu okhufwa khwitsanga.”