Read lunyore AYUBU 12 Bible Online

AYUBU 12 - lunyore bible

AYUBU 12

¹Ma Ayubu nakalusia naboola mbu,

²“Yee, inywe muli abandu bobuchesi ne olwa mwakhafwe obuchesi bwakhahwe.

³Nebutswa nase khandi ndi nobumanyilisi singa inywe; sindi omutu khwinywe tawe. Abandu bosi bamanya kosi akamubooye.

⁴Kata abalina banje banzekhel'langa luno; banzekhel'langa kata olwandi omundu omulunji khandi obula esikha; nebutswa kaliho amatukhu kandi olwa Nyasaye yakalusia amasaayo kanje.

⁵Inywe simuli neminyakhano tawe, ne nilwo olwa muukhol'langakhwo esihenyehenye, mutuyanga omundu oli ahembi okhukwa.

⁶Nebutswa abeebi nende abandu ababi bamenya m'mulembe, kata nikali nyasaye wabwe netsingufu tsiabwe tsionyene.

⁷“Nebutswa luno oreebe etsisolo, natsio tsilakhwechesia, reeba amanyonyi kokhwikulu, nako kalakhubool'la,

⁸kata oreebe ebilonje biokhusibala, nende tsisuche tsiomunyanza bikhwekesie obuchesi.

⁹Sili hena khu yibio biosi esiramanyile mbu OMWAMI niye owabilomba?

¹⁰Nyasaye niye owemel'langa obulamu bwabuli esindu esili mwoyo, ne obulamu bwabandu bosi buli mubunyalibwe.

¹¹Nebutswa singa butswa obwol'limi lulwo lutsanzamanga ebiokhulia, nimbwo esirwi nasio siyanzanga okhuhul'la amang'ana.

¹²Abasakhulu babetsanga nobuchesi, ne obumanyilisi bubetsanga khuyabo abamenya amatukhu amenji.

¹³Nyasaye ali nobuchesi nende obunyali, ali nobwibaali nende obumanyilisi.”

¹⁴Nyasaye naba niyakhalikul'la, abulaho owakhombokha obuhia, naba niyakhamuboha omundu, abulaho onyala okhumubohol'la.

¹⁵Yekal'langa amaatsi nako nikakhama, ne niyakhakeekul'la, omukhula nikubaho.

¹⁶Nyasaye nowetsingufu khandi omulechi khasotso, omukaati nende okaatungwa bali mubunyalibwe.

¹⁷Ahininjiaho obuchesi bwabaami, nakhola abemeli okhufwana ebihingwa.

¹⁸Ahininjia abaruchi khubwami, nabakhola okhuba ababohe.

¹⁹Akholanga abesaalisi okhwechieyia, nakoka hasi abetsingufu.

²⁰Asiling'aninjia yabo ababandu basubilanga, nanuula abakhulundu obuchesi.

²¹Asimbinjia yabo abali mubunyali omurwe, nahiiniaho obunyali bwabaami.

²²Afuunulanga amang'ana amebisu okhurula musiilima, naleera obulafu musiilima esimwamu t'ti.

²³Akaliyianga amahanga, khandi akamulula kosi, abambulanga amahanga, khandi akahiniaho.

²⁴Akholanga abemeli babandu okhuba ebihingwa, nabatiimia habundu habulaho netsinjila,

²⁵bahabasianga musiilima sila obulafu, nibahutuma singa omundu okhol'lwe namalwa.