Read lunyore AYUBU 13 Bible Online

AYUBU 13 - lunyore bible

AYUBU 13

¹“Lola, ndamala okhulola yako kosi, ngahuliye nende okhukamanyilisia.

²Aka mumanyile inywe, khandi nase ngamanyile, sililikhwoho eliaramanyile tawe.

³Nebutswa obusoolo bwanje buli khu Nyasaye, tawe khu ibe. Nyenyanga okhuhingana amang'ana kanje n'naye.

⁴Inywe mwenyanga okhufunikha amang'ana kamukorwe nende obubehi, muli singa abasilikhi baranyala khuhonia omundu wosi.

⁵Nosiling'ana ne omundu, apaala mbu oli omuchesi.

⁶“Hulile khukebifune bianje; reke amarwi khumang'ana komunyakhano kwanje.

⁷Esichilanga nimuboola ob'behi nisina? Mupaalanga ob'behi bwenywe buli nobukhala khu Nyasaye?

⁸Mutemanga khumusoola Nyasaye? Mulatsia khumuhan'na obukobokheli musiina noho?

⁹Nyasaye naba nakhuhengelesisia ahembi, lilikhwoho lilahi eliayakhanyoola mu ibe? Mupaalanga munyala okhumukhola Nyasaye omuhingwa singa mukholanga abandu abahingwa?

¹⁰Sialachweya okhumulul'la nimuba nimukhola ebiela m'mambiswi tawe.

¹¹Obunyali bubwe bulakhurisia, ne oburibwe bulakhutiila.

¹²Amang'ana kamul'lomelanga mutsingano kabula obukhala singa likokhe; amayingane katikhanga mubitonye singa litohi.

¹³Siling'ane, ma mundekhele obweyangu okhul'loma, ma mulekhe amakalusio kalabe singa obwakali.

¹⁴Busina ndere musibi, ma ngosie obulamu bwanje.

¹⁵Sindikhwo nobunaayi bwosi tawe, kho Nyasaye niyakhanzira sibulaho esiandakhakosia. Ndakhatsia okhuhaana obukobokheli bwanje khuye.

¹⁶Haundi okhwekhulumamia khwanje yikhu khulambonia, sichila omundu mubi siyakhasinjila imbeli wa Nyasaye tawe.

¹⁷Luno huyie singa nzia khwinoosia amang'ana kanje.

¹⁸Nderechekhele khwinosia amang'ana komuse kwanje, sichila manyile mbu ndi habwene.

¹⁹“Nyasaye ibe witsanga okhunzaala? Nikali witsanga, Ise nderechekhele okhusiling'ana tsi ma fwe.

²⁰Yanza khureebe amang'ana kabili, ne ohuchil'le khuko, ne sinzia okhwebisa okhurula khuibe tawe;

²¹olekhe khumbelesia esinyasio, khandi orarisia nebirisio ebikali tawe.

²²“Ranga ol'lome mbelio nase ndakhukalusia. Nohomba olekhe mboole mbelio, nawe ungalusie.

²³Tsimbi tsianje netsiliena? Nimabi sina akakhol'le? Nimakosa sina aka unzaalilanga?

²⁴“Busina undebisanga? Esichilanga niumbukula okhuba omusukuwo nisina?

²⁵Esichilanga noteema okhuurisia nisina? Ise ndi butswa singa lisafu; Ibe oseeranga esitonye sielisafu eliomu.

²⁶Ibe unzaal'lenamang'ana amalulu, kata nende amang'ana kandakhola nisili omwana.

²⁷Obohanga ebilenje bianje m'minyololo, nohichila tsinjila tsianje tsiosi kata nokol'losia ahebilenje bianje bisen'ne.

²⁸Khulwe yako, funikhanga mubitonye singa omusaala okwabola khandi singa ingubo eyamatsilili kaliye.”