Read lunyore AYUBU 14 Bible Online

AYUBU 14 - lunyore bible

AYUBU 14

¹“Omundu wosi owebulwa nomukhasi nowamatukhu mati, khandi noweminyakhano eminji.

²Akhulanga ma aniala bwangu singa esimuli, akoranga bwangu singa esiniini, narabbaho tawe.

³Mbula nawe Nyasaye wakhahenga khumundu ofwana ise, niundeema nende okhukhalachila esiina noho?

⁴Abulaho onyala okhuhiinia esindu esilafu okhurula musindu esimwamu singa abandu.

⁵Amatukhu kobulamu bwomundu kamala okhubalwa mbu nemiesi chianga echiayakhamenye. Ibe wamala okhukhalaka ne sikanyala okhukalukhanibwakhwo tawe.

⁶Kho khahenge elubeka ma omulekhe abe; lekha asangal'le obulamubwe obutinyu olwa asili mwoyo.

⁷“Omusaala kuli nobunaayi bwokhumenya, nikwakharemachilwa hasi, kulasebukha khandi, emisi chiakwo sichilafwa tawe.

⁸Kata emisi chiakwo nichiba nichiakhakhunguha, ne es'sina siakwo nisifwa mwiloba,

⁹nebutswa nikuba nikunyoola amaatsi, kulasebukha, singa omusaala omutoro.

¹⁰Nebutswa abandu bafwitsanga, ne isio nisio esihesi siabwe. Bafwitsanga kho nihena aha babetsanga?

¹¹Singa amaatsi kemichela kalekhanga okhubira, khandi singa amaatsi ketsinyanza kakhamanga,

¹²nimbwo abandu bafwitsanga, nibarabuukha tawe, sibakhabuukha oluhono olwe likulu lisiliho tawe; sibalasimukukhila, kata okhubusibwa mundoolo tawe.

¹³“Bwakhabeye bulahi olambisa musibala sie Makombe, undekhe ndebise okhwola olwo oburimabwo buba nibuhweye, ma olaba neinyinga yokhunzitsul'la.

¹⁴Abandu nibaba nibafwa, bakhanyala okhulamukha noho? Nebutswa ise nanindil'le amatukhu amalahi, okhwola olwe inyinga yeminyakhano yino nebe nehweye.

¹⁵Nilwo olwa naunange nase nambuchile, ne nasangal'le ise oli esilonjesio.

¹⁶Ma nilwo olwa naumengelesie hosi ahanzia, nebutswa sinaumenjelesie mutsimbi tsianje tawe.

¹⁷Naundekhele tsimbi tsianje ma notsihinie khu ise; khandi naweye obubi bwanje bwosi obwa ndakhola.

¹⁸Inyinga yakhetse olwebikulu biakhakwe hasi, khandi olwe tsinnyanda tsiakhahinibwe aha tsibetsanga.

¹⁹Amaatsi nako kakhakhweyule amachina, ne ifula inyingi yakhahilane liloba liesibala; nimbwo wononinjia obunaayi bwefwe obwokhumenya.

²⁰Oyembel'la tsingufu tsiomundu ma omuhiniaho khulwe inziayo. Okalukhaninjia mumonimwe, olwa abetsanga nafwiye.

²¹Abaanabe banyoolanga oluyali, nebutswa ye siyakhamanyakhwo tawe, khandi siabool'lwanga Olwa bakalusibwa hasi tawe.

²²Ahul'langa butswa obusalili bwomubilikwe bwonyene, niyebeleel'la omwene.”