Read lunyore AYUBU 15 Bible Online

AYUBU 15 - lunyore bible

AYUBU 15

¹Ma Elifasi okhurula Temani nakalusia Ayubu naboola mbu,

²“Omundu omuchesi yakhakalusia namang'ana koluhingwa noho? Nohomba, yakhaba niyetsula namang'ana amakhaya butswa noho?

³Sialiho omundu omuchesi owakhal'loma singa ibe ol'lomanga, nohomba okhwesoola omwene namang'ana akabulamwo esifune tawe.

⁴Olaba neinjila yiyo khane sialikhwoho owakhariye Nyasaye tawe; abulaho owakhasaayile khu Nyasaye tawe.

⁵Okhuba obumayanubwo bulolekhelanga mukoboolanga; oteemanga khwebisila mukhuboola khwobuchesi.

⁶Esifune sibulaho esichila khukhalachile esiina, ibe wekhalachiye esiina namang'ana koboolanga omwene.

⁷“Opaalanga niwe omundu wokhuranga mukhwibulwa noho? Mbula waliho olwa Nyasaye yalomba ebikulu?

⁸Wali niwahul'la aka Nyasaye yali niyaloosia okhukhola mumasilisi noho? Niwe owakhahebwa obuchesi bwabandu wenyene noho?

⁹Nimang'ana sina akomanyile ake ifwe khuramanyile? Nimakhuwa sina akohul'langa aka khuramanyile?

¹⁰Obuchesi bwefwe khwekanga khubasakhulu abetsimbutsi, abasakhulu bebulwa papawo nasili khwibulwa.

¹¹“Nyasaye akhuhelesianga abuhuluukhi, busina otsilil'langa khusuula? Khwamul'lomeye khuibe namang'ana kokhuhotselesia.

¹²Nebutswa ibe siwesimilisianga tawe, ne okhuhindul'langa tsimoni tsioburima.

¹³Nikachila nosuula Nyasaye mumwoyokwo, nohuchil'la amang'ana akafwana mbwo nikarula m'munwakwo?

¹⁴“Alikhwoho omundu owakhaba omusiyikhu tooto? Alikhwoho omundu omulunji imbeli wa Nyasaye?

¹⁵Nyasaye siasubilanga abamalaika babe tawe, kata sibali abasiyikhu mutsimonitsie tawe.

¹⁶Khandi omundu anywetsanga amabi singa onywetsanga amaatsi, yee, omundu wayonekha; khandi abula obukhonyi.

¹⁷“Luno umbuyie, nase ndakhwinosia, lekha khubool'le akandaluutsi.

¹⁸Abandu abachesi banzibaal'la akatooto akabeeka okhurula khubakuuka babwe, ma sibabisakhwo liosi tawe.

¹⁹Esibala siabwe sialekhwomwo abetsinzibulo tsindi tawe, sialikhwoho omundu wokhubahiinia khu Nyasaye tawe

²⁰“Omundu mubi osandianga abasie alaba mukhutsunwa obulamubwe bwosi.

²¹Amayoosi akokhurisia kalahulikha mumarwike, ne abanuuli bamuseera olwa paalanga ali m'mulembe.

²²Sialikhwo nobunaayi bwosi mbu yakhahonokokhe okhurula musiilima tawe, sichila olukanga lwokhumwira lumulindil'langa habundu hosi,

²³ne etsisori tsilindil'langa okhulia omubili kukwe. Umanyile mbu amatukhu kesiilima ketsanga:

²⁴Likhupako singa omuruchi wetsingufu, limulindanga okhumuseera.

²⁵“Yikwo nikwo omunyakhano kwomundu osungusilanga Nyasaye ingumu, nibamuchaaya uyo Owokhunyala Biosi.

²⁶Yelukhanga okhumulwana Nyasaye, nesikhumba es'siro khandi esibambukhu,

²⁷kata nikali wakhomela m'moni, khandi es'sienje sisie nesikali.

²⁸Wamenya mumatookho akasikala ameele, khandi mutsinyumba tsiabandu baramenyelemwo tsinyumba tsiabungulukha hasi.

²⁹Salahindihala khulwoluhono tawe; siosi esiali nasio sisilahindila tawe. Kata esiniini sisie silakora.

³⁰Salahonokokha okhurula musiilima tawe. Alafwana omusaala kwetsisaaka tsiakwo tsiasambwa nomul'lo, khandi okwesimuli siakwo siahilwa nomuyeka.

³¹Niyakhaba omuhingwa masubile mumabi, kho alanyoola esihanwa siobubi.

³²Inyinga yiye nesili khwola aloma, aloma singa olusaka lwomusaala khandi silulasebukha tawe.

³³Alafwana singa omusabibu kubungululanga emisabibu tsisili khwenga. Khandi singa omuseituni okubungulusianga esimuli siakwo.

³⁴Okhuba olwibulo lweyabo abaramuriitsanga Nyasaye lulakumbahala, omul'lo nakwo nikusamba, tsinyumba tsiombokhwa khulwobubatsa.

³⁵Yabo nibo abandu abaloosinjia amabi nende okhukhola obubi, emioyo chiabwe chiayitsulamwo abukaati.”