Read lunyore AYUBU 16 Bible Online

AYUBU 16 - lunyore bible

AYUBU 16

¹Ayubu nakalusia naboola mbu:

²“Ndahul'la amang'ana amenji akafwana yako, inywe mwesi muli abahotselesi bokhusambula.

³Mbula mulatsilil'la okhul'loma khulwe inziayo noho? Nohomba, mulabetsanga abokhuboola eling'ana liesihesi noho?

⁴Mulaba nimuli musilenje sianje nase nimba musienywe, Ndakhahambanisie amang'ana halala kokhumuchekula nende okhumwibaal'la. Ndakhasungusile omurwe kwanje mubuchesi, nimuchiikha amang'ana amenji.

⁵Ndakhamutinyilisisie namang'ana kobutsechiyi, ma nzilil'le okhul'loma khulwokhumuhotselesia.

⁶“Nebutswa, kosi aka n'nomanga kabula obukhonyi, ne okhusiling'ana khwanje sikhupoyianga okhutsunwa khwanje tawe.

⁷Siahene Nyasaye unjonyisie po, ulekhele abeinyumba yanje nibeer'rwa.

⁸Waifumila okhusila, ma oli omusuku wanje. Ndatora ma ndasikala amakumba, ma khulwako abandu bakabukulanga okhuba obukobokheli bokhumanyia esikha sianje.

⁹“Nyasaye wairandul'la muburimabwe, ma waisinyikhila, yandilanga amakhasi. Omusuku wanje yamenjelesinjia netsimoni tsinzochi.

¹⁰Abandu banzekhel'langa; bebunjikhanga halala nibambotokhana nende okhunzala oluwii khubweni.

¹¹Nyasaye waindekhela abandu ababi, niyambiikha m'makhono kabandu abasiamu.

¹²Ndamenyanga mumulembe, nebutswa Nyasaye yandiila mwikosi, yanzarania mubitonye ma niyandubula. Waikhola esindu siokhulasakhwo tsisele.

¹³Alasanga tsisele tsitsie okhurula tsimbeka tsiosi, tsisele tsifumiranga nitsisaalisia, ne kata mbwo samanyiangakhwo tsimbabasi tawe.

¹⁴Yasalisianga khase nakhase; yaseeranga singa omusikari woburima butil'le.

¹⁵Ndekhuulanga nindebikha ingubo yelikunia, nzikhalanga hasi mulukuukhi khulwo khulekwa.

¹⁶Tsimoni tsianje tsiayakhanya khulwa okhwikhuula, ne tsindol'lo tsianje tsisimbile. Khandi tsitsuyemwo esiilima esimwamu ti,

¹⁷nebutswa sindikhwo nesikha siobulwani tawe, ne okhusaaya khwanje khu Nyasaye nokhulunji.

¹⁸“Ibe esibala orafunikhila amabi kabandu bakhol'langa tawe, orakhalekha okhulakaya khwanje khwokhuruna obulunji khusiling'anibwe tawe.

¹⁹Kata luno, omukobokheli wanje ali mwikulu, naye niye owokhuusinjil'la niyangalukhila amang'ana kanje.

²⁰Abalina banje banzekhel'langa, tsimoni tsianje tsisundulanga amasika khu Nyasaye.

²¹Ndekombanga mbekhwo nomundu wokhusaayila khu Nyasaye, singa obwomundu ahombelanga omulinawe.

²²Olwemihika mitititi nachibe nichihweye, nanonde khunzila eya ndakhabule okhuchelela.”