Read lunyore AYUBU 18 Bible Online

AYUBU 18 - lunyore bible

AYUBU 18

¹Ma Bilidadi okhurula Shuhi yakalusia Ayubu naboola mbu,

²“Ayubu, abandu singa ibe sibanyala okhubunakhwo tawe? Noba nokhuha esirwi, nefwe khulal'loma n'nawe.

³Esichilanga ibe nokhulola singa tsing'ombe butswa nisina? Esichilanga nikhuba mumonitsio singa tsisolo tsisilu nisina?

⁴Ibe wesalisianga butswa omwene noburimabwo. Mbula abandu balelukha musibala khulwe lirimalio noho? Kata Nyasaye yakhasikula ebikulu khulwo khukhuyanzisia noho?

⁵Tooto obulafu bwababi bulasimibwa; olumemo lwomul'lo kwabwe silulaakha khandi tawe.”

⁶Obulafu bulakwa esiilima mwiheema liabwe, etaya yabwe eli ikulu wabwe nayo esimibwa.

⁷Injenda yabwe yalinji iralilu, nebutswa luno besikar'ranga; amebaalo kabwe abene kabakwisia.

⁸Bachendanga nibeyinjisia mwikoko, ma ebilenje biabwe bihambwa.

⁹Omubero kubatilanga ebisisilo ma kubahandakhwo.

¹⁰Omubero kufumbikhiywe ma kubisilwe, esileeka nasio sirechekhelwe munjila.

¹¹“Ebirisio bibarimula ikholo tsimbeka tsiosi, nibibalonda yaha ne yaha.

¹²Balinji abahinda, ne luno inzala ebalumanga; amakhupako kerechekhele kalindil'langa khulubeka lwabwe.

¹³Obulwaye obubi busalan'ne mumibili chiabwe, ma buchilanga amakhono kabwe nebilenje biabwe okhuboola.

¹⁴Barandul'lwanga nibahinibwa mumaheema akabamenyangamwo nomulembe, nibakhululwa okhuhilwa khumuruchi owolufu.

¹⁵Luno omundu wosi anyala okhumenya mumaheema kabwe, inyuma wobunora bumiitswamwo khulwo okhubahiinia.

¹⁶Emisi chiabwe chinial'le hasi, etsisaka tsiabwe natsio chiomele ikulu.

¹⁷Ifuma yabwe siesiliho ingo nende esioba tawe, abulaho kata mulala obetsul'langakhwo.

¹⁸Nabakhungwe okhurula musibala siabali mwoyo, nabakhungwe okhurula mubulafu okhutsia musiilima.

¹⁹Sibalikhwo no mwana kata olwibulo mubolwibulobe tawe, kata omundu wosi siyasikalakhwo mubandube tawe.

²⁰Okhurula ebukwe okhutsia emasaba bosi abahulila khukobutinyu bwabwe bachenya nibatechela khulwoburi.

²¹Yako niko amatinyu akabandu ababi babukaananga n'nako, amatinyu ake yabo abarahendelanga Nyasaye tawe.”