Read lunyore AYUBU 19 Bible Online

AYUBU 19 - lunyore bible

AYUBU 19

¹Ma Ayubu nakalusia naboola mbu,

²“Mulasandia omwoyo kwanje okhwola lina, nende okhundubula namang'ana?

³Buli khase muunyekanga, ma simulikhwo nesimba murwe munjila yamunyekelangamwo tawe.

⁴Kata nikaba mbu ndakhol'le obubi, eliibi yilio likhusalisianga mbwena?

⁵Mupaalanga muli abalahi okhunyomba, ma mubukula omunyakhano kwanje kumanyianga mbu ndi nesikha.

⁶Simulolanga mbu Nyasaye niye okhol'le yaka? Urekele omubero khulwo khundila.

⁷Kata nikhupa ekhwisi mbu, ‘Basalisisie!’ Sinyoolangakhwo likalusio liosi tawe. Abulaho ohulilanga okhulakaya khwanje khwokhwenya akatooto.

⁸Nyasaye wikaye tsinjila tsianje tsiosi, kho sindi onyala khubira tawe; ma ubisile injila yanje musiilima.

⁹Yali khunuula emiandu chianje chiosi ma unyononisie eliira.

¹⁰Yandiabanga tsimbeka tsiosi. Umal'le khwiya obunaayi bwanje bwosi, ma undekhele okhwoma nende okhufwa.

¹¹Nyasaye ali nelirima liibi khu ise, ma yakhol'langa singa omusuku uwe omukali.

¹²Arumanga abasikari baabe okhuseera; bayabanga emitaro okhubotokhana liheema lianje nokhufumbila.

¹³“Nyasaye akhol'le abaana befwe okhuusula, kata abandamanya beyahuuye khu ise pe.”

¹⁴Abeekho banje nabalina banje banzilukhile.

¹⁵Abalinji abacheni munyumba yanje banzibiliye; abakholi banje abakhaana bandolanga okhuba singa omucheni khandi owabaramanyile.

¹⁶Olwa nanganga omurumikhili wanje, siahuchil'langa tawe, kata olwa musaayanga mbu yakhonye.

¹⁷Omukhasi wanje siali onyala okwefila okhuhunya khwomunwa mwanje tawe; kata abasiani befwe sibali abakhesunda ahembi khu ise tawe.

¹⁸Abaana abat'ti bandekelesianga, khandi banzekhel'langa olwa bandolanga.

¹⁹Abalina banje bokhumwoyo basinyikhilanga. Yabo abandali okhuyanza bangalukhan'ne nibafukula.

²⁰Amakumba kanje kalolekhelanga mwikhoba. Sikaliye butswa hati okhufwa.

²¹“Mumbeele tsimbabasi, mumbeele tsimbabasi inywe abalina banje, okhuba omukhono kwa Nyasaye kundiabile.

²²Esichila mukhupie esibi singa Nyasaye yakhupianga nisina? Musili khusalisia omubili kwanje okhuhela?

²³“Makano alabakhwoho omundu wokhwitsul'la amang'ana kanje ma akahandike musitapu!

²⁴Kalang'oolwa khulwanda inziayo nekalamu yesibia namasasi.

²⁵Manyile mbu omununuli wanje aliho mwoyo, ne olwokhumal'likha yakhetse okhusoola.

²⁶Kata olwe likhoba lianje lilaba niliononibwe nolufu, ndilimulola Nyasaye nisili m'mubili kuno.

²⁷Ndakhamulole netsimoni tsianje omwene, ne siyakhalolekhe omucheni tawe.” Omwoyo kwanje kwali khwesikoka sichila obooye mbu,

²⁸“Khwakhasalisia mbwena omubili kukwe?” Murunilisianga esifune siosi esichila khuseere.

²⁹Nebutswa luno murie olukanga - olukanga lwokhuleera oburima bwa Nyasaye khutsimbi, kho mumanye mbu aliho owokhukhalaka esiina.