Read lunyore AYUBU 21 Bible Online

AYUBU 21 - lunyore bible

AYUBU 21

¹Ma Ayubu nakalusia naboola mbu,

²“Hulile amang'ana kanje, ma yibwo bube obuhotselesi bwenywe khu ise.

³Mumbe obweyangu nase mboole, ne nimal'le okhuboola munyala okhunzekhel'la.

⁴Okhwekaana khwanje sikhuli khubandu tawe; kho ndi nesifune esilahi esichila mbule khwesimilisa.

⁵Mumenje, ma mung'ang'aala nimufuunikha omukhono khumunwa.

⁶Olwampaala khu yako akali khwekholekha khuise, njenyanga mamba neindenga ingali nende okhutechela

⁷“Esichilanga Nyasaye nalekha ababi, nibatsilil'la okhumenya, nende okhusakhula khandi nibametekha okhuhindihala nisina?

⁸Bali nende abaana nende abetsukhulu, ma bamenyanga nibalola nibakhulanga.

⁹Nyasaye sialerangakhwo esinyasio khutsinyumba tsiabwe tawe; kata sibamenyangakhwo nokhurisibwa tawe.

¹⁰Yee, tsing'ombe tsiabwe tsiibulananga, khandi tsinyoolanga ebimoosi sila okhulokosa.

¹¹Abaana babwe belukhanga nibasina singa ebimeme.

¹²Basinanga olwa amalele nende obukhana bikhupanga.

¹³Bamenyanga obulamu bwabwe mulembe, ma bafwa butswa kalaha sila okhunyakhana.

¹⁴“Ababi babool'langa Nyasaye alekhe babe khubwabwe; sibenya khumanyilisia akobulalilo bwa Nyasaye khubo tawe.

¹⁵Bapaalanga bubulaho obukhala bwosi okhumurumikhila Nyasaye tawe, kata esiabakhanyoola khulwo khumusaaya.

¹⁶Baboolanga banyoolanga amalahi khulwe tsingufu tsiabwe, nebutswa ise simbuchilisanianga namapaalo kabwe tawe.

¹⁷“Mbula etaya yababi yasimibwakhwo? Mbula mulala khubo wanyoolakhwo likhupako? Mbula Nyasaye wabahelesiakhwo esinyasio muburimabwe?

¹⁸Mbula bapulusibwakhwo singa omukhuutsi m'muyeka, nohomba okhuchingilwa mumbumbuyeka singa olukuukhi noho?

¹⁹“Muboolanga mbu Nyasaye ahaananga esinyasio khumwana khulwe tsimbi tsia samwana. Tawe, lekha Nyasaye ahaane esinyasio khubakholi betsimbi bene; amanyie mbu akholanga mbwo khulwe tsimbi tsiabwe.

²⁰Lekha abetsimbi bene betukhe esinyasio siabwe; lekha bahul'le obululu bwelirima lia Nyasaye Owokhunyala Biosi.

²¹Olwobulamu bwabandu bubetsanga nibuhweye, mbula bahendelangakhwo nikali abaana babwe bakhabe nobusangali nohomba tawe?

²²Aliho owakhamwechesia Nyasaye obumanyi, ye okhalachilanga kata yabo abali abakhongo?

²³“Abandu balala bafwitsanga nibali nobuhinda obwinji, nabafunikhilwe habundu halahi homulembe.

²⁴Olwe mibili chiabwe chili emineru, ne amakumba kabwe nikalimwo obwali obunji.

²⁵Abandi nabo bafwitsanga nibarali nobusangali, bamenyanga ma bafwa nemioyo emisinyikhu.

²⁶Nebutswa bosi bafwitsanga ma bayabilwa, khandi bafuunikhwanga netsinyende.

²⁷“Lole, manyile obwa mupaalanga, khandi obwa muloosia okhuukhol'la obubi.

²⁸Mureebanga mbu, ‘Tsinyumba tsiabandu abakhongo abalinji okhukhola obubi tsili hena?’

²⁹Simwal'lomakhwo nende abandu babiranga khunjila? Simuhuchil'langa obukobokheli bwabwe?

³⁰Litukhu lia Nyasaye ali noburima ma ahaane esinyasio, ababi bamalanga bahonokokha.

³¹Abulaho onyala khubool'la abandu ababi amabi kabakholanga, kata okhubarunga khumabi kabwe kosi.

³²Balachingwa nibahilwa khung'ani; ahebilindwa biabwe bialindwa,

³³Abandu etsielefu balakooba emibili chiabwe, abalala nibali imbeli ne abandi inyuma, kata amaloba sikaminanga emibili chiabwe tawe.

³⁴Kho mwakhanemia mbwena namang'ana amakhaya? Amakalusio kenywe kosi nobubehi obukhaya.”