Read lunyore AYUBU 22 Bible Online

AYUBU 22 - lunyore bible

AYUBU 22

¹Elifasi okhurula Temani yakalusia Ayubu naboola mbu,

²“Mbula omundu yakhaba nobukhala khu Nyasaye noho? Kata omundu omuchesi yakhabakhwo namalahi kosi kokhumukhol'la noho?

³Mbula kali sichila omuriitsanga, kata obulahi bubwo, mbula bwakhamukhonyakhwo esindu noho?

⁴Mbula okhwekayakaya khwamwekayakayanga niikhwo okhuchilanga nakhuha esinyasio, nende okhukhukhalachila esiina noho?

⁵Tawe, kali sichila tsimbi tsiawakhola netsinyinji; khandi obubi bwawakhola nobwinji.

⁶Khulwokhuhachia omusiani wenywe okhurunga amapesa akayakopa khuibe, wamunaabula tsingubo ma nomulekha esihechenye.

⁷Wabeema amaatsi yabo abali nibachonyile, wabeema ebiokhulia yabo abali nibali neinzala.

⁸Warumikhila obunyali bubwo, nende eliira lilio okhubukula liloba liosi.

⁹Wasuula okhukhonya abakhasi abalekhwa; khandi nonuula abaana ababisandu emiandu chiabwe ma nobasandia.

¹⁰Niko akachila urekelwe tsimbeka tsiosi, ma oburi bukhutil'le bungoyingoyi.

¹¹Obulafu bukhukalukhaniiye esilima, ma sionyala okhulola tawe, ma omukhula kwamaatsi kukhuyembeleye.

¹²“Mbula Nyasaye siamenyanga ikulu mwikulu nahenga hasi khutsinyininyini kata olwa tsili ikulu okhusila?

¹³Nawe oreebanga mbu, ‘Esia Nyasaye amanyile nisina? Ye waibisa mumalumbesi — kho yakhanyala mbwena okhukhukhalachila ifwe?’

¹⁴Opaalanga mbu amalumbesi amasiro kamwikal'langa okhulola olwa ye ali ikulu wesibala.

¹⁵“Wenyanga okhulonda khunjila tsiakhale etsiabandu ababi balondakhwo noho?

¹⁶Kata olwe inyinga yabwe yali nesili okhwola, bahilanwa nomukhula kwamaatsi.

¹⁷Abene yabo nibo abasuula Nyasaye, ma nibasubila mbu sibulaho esia yakhanyala okhubakhol'la.

¹⁸Nebutswa Nyasaye niye owachila nibahindihala. Ise sinyala okhumanyilisia amapaalo kababi tawe.

¹⁹Abalunji balalola okhumumwa khwabwe nibasangala, ababula esikha balabatsekhel'la nibaboola mbu,

²⁰‘Siahene abasuku befwe bamuluywe, ne omul'lo kusambile emiandu chiabwe chiosi.’

²¹“Ayubu lomba omulembe na Nyasaye luno, ma olekhe okhumulola singa omusuku. Nokhola mbwo, nilwo olwa naye nakhulaamile tsikhabi.

²²Ohuchil'le amebaalo akaye akhuhelesianga, nobiikha amang'anake mumwoyokwo.

²³Yee, okhwola wetutuyie ma omukalukhile Uyo Owokhunyala Biosi, ma wikal'le amabi kosi akakholwanga munyumba yiyo.

²⁴Ofuube etsahabu yiyo ehale; khandi ofuube etsahabu isiyikhu mumuchela okwakhamamwo amaatsi.

²⁵Lekha Nyasaye Owokhunyala Biosi abe niye etsahabuyo, khandi lekha abe efetsayo eyakuulwa khulwe ibe.

²⁶Ma nilwo olwa nosubile mu Nyasaye khasotso, khandi olanyoola mbu obusangalibwo burulanga khuye.

²⁷Olasaaya khuye, naye alakhukalusia, nawe olahesia ebiesuhobio.

²⁸Olanyoola tsikhabi mukosi akokhola, ne obulafu bulaakha khunjilatsio.

²⁹Nyasaye atuutuyinjia abeloli, ne ahoninjia abetutuyi.

³⁰Alakhuhonokosia noba nobula esikha, alakhuhonia nikali akokholanga nakahabwene.”