Read lunyore AYUBU 24 Bible Online

AYUBU 24 - lunyore bible

AYUBU 24

¹“Busina Nyasaye araraho inyinga yokhuhaana obukhalachi, nende litukhu liobukhalachi bwahabwene khu yabo abamurumikhilanga?

²“Abandu basundanga ebikhoni khulwokhunyoola liloba likali; beebanga amakondi nibakara mubiayo biabwe abene.

³Babukulanga etsipunda tsiababisandu; khandi babukula ing'ombe yomukhasi omulekhwa okhwola olwa arunga likobi.

⁴Bekal'langa abatakha okhunyoola aka bakwana okhunyoola, nibahakia abatambi okhwilukha nibebisa.

⁵“Kho abatakha, singa tsinyama tsiomubulimo, bakhaabanga ebiokhulia musitsiimi esiomu; sibanyala okhunyool'la abaana babwe ebiokhulia habundu handi tawe.

⁶Batakhwanga okhuchesa mumikunda echirali echiabwe, nibaruluma emisabibu mumikunda tsiababi.

⁷Bakona esihechenye obutukhu bwosi sila ingubo, nibabula esiokhwefuuma obusindu.

⁸Batsilisibungwa neifula ekwitsanga mubikulu; bebisanga mumachina nibarunanga obwikamilo.

⁹“Abandu babi babukulanga abaana ababisandu nibabakhola abasumba, nibabukula abaana babamanani khulwo khurunga amakobi.

¹⁰Nebutswa abamanani okhwola bachenda esihechenye sila ingubo okhwola bahonge inzala kata olwa bachesanga ingano.

¹¹Batuyilanga emiseituni musinu khulwokhunyoola amafura, ne baminanga tsinzabibu khulwokhunyoola ewaini, ne kata mbwo obuluho bubahambanga.

¹²Okhubinda khwabafwitsanga khuhulilikhanga okhurula mumatookho, ne yabo abafumir'rwe balakayanga nibaruna obukhonyi, nebutswa Nyasaye siyenya okhuhul'la amasaayo kabwe tawe.

¹³“Baliho abandu abasuulanga obulafu, sibamanyanga esifune siabwo, kata sibatsitsanga aha bubakhosisianga tawe.

¹⁴Omwiri abuukhanga mumabwebwe mbu yeere omutambi nende omutakha; ne mubutukhu ali butswa singa omwibi.

¹⁵Omundu omuheyi naye alindanga isi emwame, yefuunikhanga m'moni mbu omundu wosi alekhe okhumulolakhwo.

¹⁶Musiilima abeebi bafunakanga tsinyumba, nebutswa m'mubasu bebisanga nibaria okhulolekha mubulafu.

¹⁷Khubene yabo bosi olweisi emwamanga, nilwo olwa bubetsanga nibubasieleye mukamba tsuli, okhuba bo nabalina bebirisio biemusiilima esimwamu.

¹⁸[4]“Ababi bahilanwanga nende amaatsi komukhula, ne liloba liobulaame bwabwe lili musilaamo sia Nyasaye. Ababi sibasitsia okhukhola emilimo, mumikunda chiabwe chiemisabibu tawe.

¹⁹Singa butswa etsaluchi ekhamulukhanga munyinga yoluuya nende eyomusimi, nimbwo abetsimbi bakhamulukhanga okhurula musibala siabali mwoyo.

²⁰Kata abamama babwe sibalabetsul'lakhwo tawe; tsinyende tsibalitsanga nibamumwa singa, emisaala echikwiye hasi.

²¹Yaka kekholanga sichila bakhol'la abakhasi barali nabaana obubi, khandi sibamanyiakhwo tsimbabasi khubalekhwa tawe.

²²Nebutswa, Nyasaye, mutsingufutsie amululanga abakufu, Nyasaye akholanga akelichoomolie — ma ababi bafwa.

²³Nyasaye anyala okhubalekha bamenye mumulembe, nebutswa abarelanga imoni tsinyinga tsiosi.

²⁴Ababi banyoolanga emiandu khulwe inyinga ndititi butswa, ne olunyuma banialanga singa ebiraakwa, khandi singa ebirwe biobuswache ebikhalachilwe.

²⁵Nikaba nikarali mbwo tawe, niwina owakhaboola mbu ndi omubehi? Niwina owakhabula okhunyoola obwatooto mumang'ana kanje?”