Read lunyore AYUBU 26 Bible Online

AYUBU 26 - lunyore bible

AYUBU 26

¹Ayubu yakalusia Bilidadi naboola mbu,

²“Mako obwokhonyele uyo obula obunyali! Mako obwokhonyele omundu omutakha obula tsingufu!

³Mako obwochetsiyisie omundu obula obuchesi, ma umuhelesisie obwibaali obulahi!

⁴Niwina okhukhonyele okhuboola amang'ana yaka? Niwina okhwitsusisiemwo omwoyo kwokhuboola singa mbu?

⁵[5]“Emioyo chiabafwa chitechel'langa mumaatsi akali isi wesibala.

⁶Emakombe eli esihechenye imbeli wa Nyasaye; ne Abaadoni[6] ebulakhwo esifuunikho siosi.

⁷Nyasaye yabambula likulu liesinyolu, khandi yahachikha esibala ahesindu siosi sirali.

⁸Nyasaye niye owitsusianga amaatsi mumalumbesi, ma akhola amalumbesi kalekhe okhurandukha khulwo busiro.

⁹Abisanga omwesi omuchima inyuma welilumbesi.

¹⁰Yabukhania obulafu okhurula khusiilima neingara eyafumbwa ikulu weinyanza.

¹¹Olwa akondokhelanga etsisiilo etsiatiila likulu, tsirenganga nitsitechela khulwoburi.

¹²Khulwobunyalibwe yaleka inyanza, ne khulwobusitsabwe yaleka Rahabu, okunyama kwomunyanza.

¹³Emiiya tsitsie nitsio etsiachila likulu nililaba, ne omukhonokwe nikwo okwera okuyokha okwali nikwilukhanga.

¹⁴Nebutswa yako nimatititi khukebikhole bibie; aka khuhul'langa khuye namamonyi butswa. Niwina onyala okhumanya obwa Nyasaye ali omukhongo siahene?”