Read lunyore AYUBU 27 Bible Online

AYUBU 27 - lunyore bible

AYUBU 27

¹Ayubu yameeta okhuboola mbu,

²“Ndesuhanga muliira lia Nyasaye oli mwoyo, Uyo Owokhunyala Biosi, osuuye okhukhol'la akahabwene, ukhol'le obulamu bwanje okhuba obululu;

³oluhono lwa Nyasaye asimbelesia emiiya,

⁴tooto mwene omunwa kwanje sikulaboola akarali habwene; kata ol'limi lwanje okhul'loma okobukaati tawe.

⁵Sindakhaboolekhwo mbu abandu inywe muli habwene tawe; ndatsilil'la okhuboola mbula esikha okhwola litukhu lianje liokhufwa.

⁶Sindakhalekhe okhuboola mbu ndihabwene tawe; oluhono lwasili mwoyo, sindakhakalukhane tawe.

⁷“Abandu bosi abaafukulanga nibanwana, bahebwe esinyasio singa esia abandu babi abarali abalunji.

⁸Abanasibala bali nabunaayi sina, munyinga ya Nyasaye yenyanga obulamu bwabwe?

⁹Nyasaye alahulila okhulanjisiakhwe, olwa amasila kamukwila noho?

¹⁰Bakhekombele obusangali bwa Nyasaye ahaananga; khane bakhasaayile khu Nyasaye amatukhu kosi.

¹¹“Lekhe mwechesie okhumanya singa obunyali bwa Nyasaye buli obukhongo, khandi nyinoosie aka Nyasaye Wokhunyala Biosi yaloosia.

¹²Lole, inywe abene mwesi, muluutsi; kho esichilanga nimul'loma amang'ana koluhingwa nisina?

¹³[7]“Kano niko aka Nyasaye yaloosia okhukhol'la abandu ababi, ake uyo Wokhunyala Biosi yakhahelesie abasandi.

¹⁴Banyala khwibula abasiani abenji, nebutswa bosi baleer'rwa mwihe. Abaana babwe sibakhabekhwo nebiokhulia ebibahela tawe.

¹⁵Yabo abasikala, oluumbe lulabeera; ne abakhasi abalekhwa sibalabeekhuula tawe.

¹⁶Abandu ababi banyala okhuba nefetsa inyinji eranyala okhuhwa khandi tsingubo tsinyinji etsiomundu arakhenya;

¹⁷nebutswa abandu abalahi banyala okhwebikha tsingubo tsana khandi abasubilwa balahebwa efetsa y'yo.

¹⁸Abandu ababi bombokhanga tsinyumba tsiafwana tsinyumba tsietsimbubi, nohomba singa esitsu siomusumba olindanga omukunda.

¹⁹Litukhu elala liokhumal'likha bakhakone nibali abahinda, ne olwa babuukha, balinyoola obuhinda bwabwe nibubulaho.

²⁰Likhupako lilabakhupa singa omukhula kwamaatsi; ne imbumbuyeka nayo elabeeba mubutukhu.

²¹Omuyeka kwebukwe omuyiu kulabachinga, nikubahila ehale; kulabahinia mutsingo tsiabwe.

²²Kulabakhupa, sila okhubabeela tsimbabasi, olwa bateemanga okhwilukha tsingufu tsiakwo.

²³Omuyeka kubahutsila olwa bateemanga okhwilukha, nikubarisia nobunyali bwokhubamumia.