Read lunyore AYUBU 28 Bible Online

AYUBU 28 - lunyore bible

AYUBU 28

¹“Khuliho nende etsikware ahefetsa eyabwanga, khandi khuliho nahabundu ahetsahabu esal'lusibwanga netsienulwa.

²Abandu bayabanga esibia okhurula mwiloba, khandi basal'lusianga omukasa kwomubona okhurula khumachina.

³Abandu bakhabilisianga musiilima esimwamu ti. Barunilisianga musi mukari mweliloba, khandi balimanga okhukhaaba amachina musiilima.

⁴Abandu beekulanga amayabo kebibia ehale okhurula ahabandu bamenyanga nende ahabachendanga. Ebwene iyio bakholanga emilimo musisoma, nibeleela khumikoye chiomumako.

⁵Ebiokhulia binyoolekhanga okhurula mwiloba, nebutswa isi weliloba tsana yarandukha ma yatubulwa.

⁶Amachina keliloba nihabundu ahemisafira[8] chili, ne olukhuukhi lwalio lulimwo etsahabu.

⁷Libulaho likhongotsa elinyala okhulola injila yokhutsia mumayabo ne ebulaho esori enyala okhupulukha ikulu wako.

⁸Esimba yosi kata etsisolo tsimbalaba, tsisili okhubir'rakhwo khunjila y'yo.

⁹“Abayabi bebibia bayabanga tsinyanda etsiatinya k'ka, bayabul'langa ebikulu nibabikoka hasi.

¹⁰Olwa babetsanga nibaara tsinjila mutsinyanda, ne nibanyoolamwo amachina kobukusi obutinyu.

¹¹Bayabanga okhwola mumoni mwemichela; nibara habulafu esiali nisiebisa.

¹²Nebutswa nihena ahobuchesi bulanyoolekha? Nihena ahakhunyala okhweka obumanyilisi?

¹³“Obuchesi sibunyala okhunyoolwa nabandu tawe; abulaho owamanya obukhala bwabwo tawe.

¹⁴Tsindungu tsietsinyanza tsiboola mbu, obuchesi sibulimwo tawe.

¹⁵Kata obuchesi sibunyala okhukulwa netsahabu tawe; obukusi bwabwo sibunyala okhuchelwa khufetsa tawe.

¹⁶Sibunyala okhuchelanibwa nende etsahabu isiyikhu, kata nende amachina kobukusi obutinyu tawe.

¹⁷Etsahabu nohomba esilang'i sibinyala okhuhelana n'nabwo tawe; kata sibukulaanibwa ebimili bietsahabu isiyikhu tawe.

¹⁸Obukusi bwobuchesi buyomba obukusi bwamakongolo singa esilang'i, nende obwamachina amang'inang'inu nende obwetsilulu.

¹⁹Etopasi ya Etsiopia sienyala okhuchelanibwa n'nabwo tawe; kata etsahabu isiyikhu sienyala okhuchelanibwa n'nabwo tawe.

²⁰“Kho obuchesi burula hena? Nihena ahakhunyala okhweka obumanyilisi?

²¹Sibulaho khubilonge ebili mwoyo esinyala okhubulola. Kata amanyonyi akokhwikulu sikanyala okhubulola tawe.

²²Kata olufu nende Abaadoni biboolanga mbu, biahul'la butswa amamonyi kabwo.

²³Nyasaye yenyene niye omanyile injila yabwo; wamanya habundu ahabunyala okhunyoolekha,

²⁴Sichila alolanga okhwola khusihesi siesibala, nalola biosi ebili hasi welikulu.

²⁵Olwa Nyasaye yahelesia omuyeka obunyali, khandi nachela obuheli bwetsinyanza;

²⁶Olwa Nyasaye yeela nihena aheifula enyala okhukwa, nende injila yoluheni lunyala okhwanukhilakhwo;

²⁷nilwo olwa yalola obuchesi ma nachela obulahi bwabwo; yabuhuchil'la ma naburalisia.

²⁸“Nyasaye nabool'la abandu mbu ‘Nimwenyanga okhuba abachesi okhwola murie OMWAMI. Nimwenyanga okhuba nelimanyilisia okhwola mulekhe okhukhola obubi.’ ”