Read lunyore AYUBU 3 Bible Online

AYUBU 3 - lunyore bible

AYUBU 3

¹Inyuma we yako, Ayubu yachaaka okhul'loma ma nara esilaamo khwitukhu eliayebul'lwakhwo.

²Ayubu yaboola mbu,

³“Lilaamwe litukhu liandebul'lwakhwo, nende obutukhu obwa ndabelekhelwa mwo.

⁴Lekha litukhu yilio likwe esiilima. Nyasaye owe ikulu aralitsul'lakhwo tawe, kata obulafu buraakha khulio tawe.

⁵Lekha libe litukhu liesibeela nende esiilima, lekha amalumbesi kalifuunikhe ne eliuba lirakhakhwo tawe.

⁶Lekha obutukhu yibwo bube nesiilima esikali, burabbal'lwakhwo mumatukhu komuhika yikwo tawe, kata burabbal'lwakhwo mumatukhu kemiesi tawe.

⁷Yee lekha obutukhu yibwo bukumbahale, ne amayoosi kobusangali karakhahul'likhakhwo mwo tawe.

⁸Lekha yabo abali nobunyali bwobufumu nende yabo abanyala okhuruka Lewiatsani,[2] balaame litukhu yilio.

⁹Lekha tsinyininyini tsiom'mabwebwe bwelitukhu yilio tsiilime, lekha linaaye okhunyoola obulafu, nilirabunyoola tawe, kata liralola amamulamule kamukamba tsuli tawe,

¹⁰sichila lialekha ninzibulwa, ma nikachila nindola amanyakhano nesibeela.

¹¹“Nisina esiachila nirafwa olwa ndebulwa? Nisina esiachila nirarula munda mwa mama wanje nifwiye?

¹²Nisina esiachila mama niyandela khumakuluke? Nisina esiachila niyanunia tsimbeele tsitsie?

¹³Ndaba nindafwa olwene yilwo, khane mbuluukhanga luno.

¹⁴Ndakhakon'ne singa abaruchi nende Abaami be sibala, abombokhanga obuhia tsinyumba tsiabaruchi bakhale.

¹⁵Khandi ndakhabeye ningonanga singa abaana babaruchi abetsusia tsinzu tsiabwe nende etsahabu nefetsa,

¹⁶nohomba busina rakhabeeye singa omwana owibuywe nafwiye, singa omwana omutoro oralolakhwo obulafu?

¹⁷Musilindwa, ababi balekhanga obubi bwabwe, ne yabo abachonyele bahulukhanga.

¹⁸Ababohe banyoolanga mwo omulembe, sibahul'langa okhukondokhelwa khwomunyapala tawe.

¹⁹Abatitiiti nabakhongo bosi bali ebwene y'yio, ne omusumba naye abetsanga omulakhuule khu mwamiwe,

²⁰“Busina obulafu buhanwanga khuyabo abandu abali musibi? Busina obulamu buhanwanga khu yabo abali musibeela?

²¹Bekombanga olufu nebutswa sibafwitsanga tawe; bayabanga hasi okhulukhaaba singa obwabakhabanga etsahabu.

²²Basangalanga nibamal'le okhufwa nende okhuyabilwa.

²³Nyasaye atsilil'langa okhubisa amatukhu kobulamu bwabwe, khandi abafumbilanga tsimbeka tsiosi.

²⁴Ndekhuulanga musilenje siokhulia, ne okhubinda khwanje khusundukhanga singa amaatsi.

²⁵Yako aka ndali okhuria kamal'le okhungwila, yako akali okhuurisia okhusila kamal'le okhwekhola.

²⁶Mbula omulembe nende abuhuluukhi, amanyakhano kanje sikahwetsanga tawe.”