Read lunyore AYUBU 30 Bible Online

AYUBU 30 - lunyore bible

AYUBU 30

¹“Nebutswa luno abandu abali ababuukha khu ise baakhol'langakhwo esihenyehenye! Yabo ababapapa babwe baralikhwo esindu khu ise tawe, kata sindakhabahuchiliye okhukhonyana netsimbwa tsianje okhulinda amakondi tawe.

²Tsingufu tsiamakhono kabwe tsiakhangasila sina, abandu betsingufu tsiabwe tsihweeye?

³Balinji abatakha okhusila khandi abeinzala, kata balitsanga emisi emiomu mubutukhu, mbali musitsiimi esikhaya kuru.

⁴Beehanga likuku nibanoka amasafu kemubulimo nibabilia, kata nende emisi chiemisaala chiameyo.

⁵Abandu bosi bali okhubakhunga nibabakhupila liyoka singa abayochelanga abeebi.

⁶Bamala bamenye mutsimangaywa, nende mumako akayabwa munyanda.

⁷Baananga singa etsisolo nibali mubisakha, nibebumba halala mubisakha.

⁸Bo nabandu abahingwa khandi okhusila ababula oluyali! Banywekhwa nibakhungwa musibala.

⁹“Ne luno betsanga khu ise nibanzekhel'la, ma ngwiye owokhukhol'lwakhwo omusino.

¹⁰Mbasinyile, bebisanga okhurula khuise; nibandola ne, nibafuutsila amare.

¹¹Sichila Nyasaye ukhol'le okhuba omutofu oranyala esindu siosi, betsanga khu ise nelirima liabwe liosi.

¹²Omukanda kwababi yiku kuuseeranga okhurula imbeli; banondel'langa; barechekhanga obuseeri bwokhumal'likha.

¹³Bekal'langa injila yanje yokhuhonokokha, nibateema okhumuma; ne abulaho owokhubakaya.

¹⁴Abenji benjil'la mumiluhu chiamasisi kokhuninda, nibeetsa okhusen'na hasi.

¹⁵Ebirisio binyembeleye; oluyali lwanje lukor're singa omuya okuhil'lwe nomuyeka; obuyinda bwanje buhweye singa lilumbesi elimal'le okhubira.

¹⁶“Ne luno ndi ahembi okhufwa; sindikhwo nobuhuluukhi mukhukhupa esibi khwanje tawe.

¹⁷Mubutukhu amakumba kanje kakhomaka obululu; obusalili obunumanga sibubunangakhwo tawe.

¹⁸Nyasaye atilanga ingubo yanje mwikosi netsingufu; aborolanga ingubo tsana niyimika.

¹⁹Nyasaye yafuubanga mumatohi; ngwiye butswa olukhuukhi nelikokhe.

²⁰“Nanganga khuibe, E Nyasaye, nebutswa siungalusisie tawe, ne olwa saayanga, ibe sohuyianga tawe.

²¹Ukholeye obubi niundul'la; ukhupinjia esibi nobunyali bubwo bwosi.

²²Ibe olekhanga omuyeka kumbilane nikufuuba ehale; urundanga mumbumbuyeka.

²³Manyile mbu underanga ahembi khulufu, khusibi esilindil'langa abandu bosi.

²⁴Nisina esichilanga ibe noseera omundu oli musibi, oranyala okhukhola esindu siosi nikhurali okhusaba tsimbabasi?

²⁵Sindalakayila yabo abali mumatinyu, khandi nimbelel'la yabo abali mubutakha?

²⁶Olwa ndakhaaba amalahi, amabi niko akeetsa, olwa ndalindil'la obulafu, esiilima nisio esieetsa.

²⁷Ebiomunda bihiye pa, sibihuluukhangakhwo tawe; amatukhu kesibi kangwiliye.

²⁸Njendanga nimbeleye musiilima sila omubasu kwosi. Sinjilanga imbeli womukanda nireeba obukhonyi.

²⁹Omwoyo kwanje nomubelelu khandi kuli es'soma, singa okhulakaya khwebibwe nohomba amahuto.

³⁰Likhoba lianje limwamile ti, omubili kwanje kuhiye pa khulwomurengo.

³¹Aha ndahul'langa tsinyembo tsiobusangali khale, leelo mbulilanga okhwekhuula khwonyene nende okhulakaya.”