Read lunyore AYUBU 31 Bible Online

AYUBU 31 - lunyore bible

AYUBU 31

¹“Ndamala khwesuha siahene mbu, sindakhahengekhwo khumukhaana khulwo khumwekomba tawe.

²“Nisina esia Nyasaye wokhunyala Biosi akhukhol'langa? Nyasaye arunganga mbwena ebikholwa biabandu?

³Arumanga likhupako nende obumululwi khu yabo abakholanga amasiamu.

⁴Nyasaye wamanya kosi akakholanga; alolanga hosi aha senanga.

⁵“Ndesuhanga mbu sili okhukholakhwo obubi, khandi sili okhukaatakhwo abandi.

⁶Lekha Nyasaye yambime khusichelo siatooto, ne yetsa khulola singa ise rali nesikha.

⁷Nikali ndayebera okhurula khunjila yahabwene, nohomba nindayanzisibwa nende amabi, kata esipala sietsimbi nisilikhwo khumakhono kanje,

⁸kho lekha ebiraakwa bianje bimululwe, nohomba abandu bandi balie ebiraakwa biandaraaka.

⁹“Nikali ndakhayilwakhwo omukhasi womurende, ma nimulinda nende okhwebisa esioba womuliangokwe,

¹⁰kho lekha omukhasi wanje atekhele omusaatsa undi ebiokhulia khandi akone musitanda siomusaatsa undi.

¹¹Owakhola amabi yako akhoyele okhwirwa.

¹²Kafwana singa omul'lo okumululanga, nikusamba ebindu biosi ebiandi nabio.

¹³“Olwa mulala khubakholi banje yakhandekan'nakhwo, ndahuyia khukaake ma mukhol'le obulahi.

¹⁴Nirakhakhola mbwo, khe ndakhasinjila mbwena imbeli wa Nyasaye? Ndakhakalusia mbwena olwa Nyasaye yetsa okhukhalachila esiina!

¹⁵Nyasaye mulala wali khunomba, khandi niye owalomba omurumikhili wanje.

¹⁶“Sindasuulakhwo okhubakhonya abamanani tawe; sindalekhakhwo omukhasi omulekhwa okhwesikoka tawe

¹⁷kata okhulekha ababisandu okhuba inzala nase nindia tawe.

¹⁸Mubulamu bwanje bwosi ndabahendela bosi.

¹⁹“Nimba nindola omundu otakhiywe, omutakha oranyala okhukula tsingubo,

²⁰muhetsanga tsingubo etsialombwa khubwoya, obwarula khusiayo siamakondi kanje. Ne anyala khufumia nomwoyokwe kwosi.

²¹Nimba nindakaatakhwo omubisandu, nimanyile mbu namuleke musiina,

²²kho emikhono chianje chifunakwe; chikhalakwe okhurula khumabeka kanje.

²³Sichila ndaria esinyasio sia Nyasaye ahaananga, sindakholakhwo akafwana yako tawe.

²⁴“Sindara obusubili bwanje mubuhinda tawe, khandi sili okhusubil'lakhwo mutsahabu.

²⁵Sili okhwekhoyelakhwo emiandu chiandi nachio nohomba kata ebindu ebiandanyoola.

²⁶Sindayekayakayakhwo eliuba ndibalanga, nohomba omwesi mubukondo bwakwo obulahi tawe.

²⁷Sindakosibwakhwo okhuhaana oluyali khubio, khulwo khutsunzuna omukhono okhuhaana nimbiekayakaya tawe.

²⁸Owakhola imbi singa yiyi okhwola yerwe; sichila efukulanga Nyasaye.

²⁹“Ise sisangalangakhwo olwa abasuku banje basalilanga, kata okhuyanzisibwa olwa banyoolanga esibi tawe.

³⁰Nebutswa sindahuchiil'la omunwa kwanje okhwona, khulwo khusabila obulamu bwabwe esilaamo siokhufwa tawe.

³¹Abasaatsa bosi abarumikhilanga bamanya, mbu ise nyinjisianga abacheni.

³²Mbenjisianga ababiri munyumba mwanje, sindekhanga bakone khumihanda tawe.

³³“Abandu bandi bateemanga okhubisa tsimbi tsiabwe, nebutswa ise simbisanga tsimbi tsianje tawe.

³⁴Ise siriitsanga akabandu bakhaboola tawe; s'sili khusiling'anakhwo nohomba okhwebisa munzu, sichila riye amanyeko kabwe.

³⁵“Sialiho owokhuhuyia khukamboolanga tawe? Ndesuhanga mbu buli ling'ana neliatooto. Lekha Nyasaye Wokhunyala Biosi yangalusie. “Kalaba amang'ana kabasuku banje baboolanga khu ise kahandiikwa khe ngalole,

³⁶ndakhakachingile khwibeka nomwekhonyo, ma ngebiikhe khumurwe singa olusimbi.

³⁷Ndakhabooleye Nyasaye kosi akandakhola, ma sinjile silunji imbeli uwe.

³⁸“Nikali ndeeba omukunda kwanimangamwo, ma nindabukula okhurula khubenekwo -

³⁹nikali ndalia khubiakhulia biarula m'mukunda imwo, ne nindekha abalimi bakulima okhuba neinzala,

⁴⁰kho amarakalu kamele musilenje sieingano, ne elibanze musilenjesie eshayiri.” Amang'ana ka Ayubu kahweye.