Read lunyore AYUBU 32 Bible Online

AYUBU 32 - lunyore bible

AYUBU 32

¹Kho abandu bataru yabo balekha okhumukalusia Ayubu sichila yelola okhuba omulunji mumonitsie omwene.

²Nebutswa omundu undi yali nasinjiyeho olangwanga Elihu siyali onyala okhutsilil'la okhwesimilisia muburimabwe tawe, sichila Ayubu yekhola omulunji ne natula Nyasaye. (Elihu tsana yali omusiani wa Barakeli owolwibulo lwa Busi musilibwa sia Ramu.)

³Khandi yahamba abalina ba Ayubu bataru yabo oburima. Sibali nibanyooye injila yokhukalusisiamwo Ayubu tawe, ma yako nikafwana mbu Nyasaye niye owali namakoso.

⁴Elihu yalinda okhwola olwa bandi bosi bali nibamal'le okhubool'la Ayubu amang'ana sichila yali omubuukha khubo bosi.

⁵Olwa Elihu yalola mbu abandu bataru yabo sibaali nelikalusio eliabakhabooleye Ayubu tawe, oburima bwamuhamba

⁶ma nachaakia okhul'loma naboola mbu: “Ise ndi butswa omubuukha, nenywe muli abasaakhulu muno; niko akachil'le niiria okhumubool'la akandi n'nako.

⁷Ndali okhwebool'la omwene mbu inywe mukwana okhul'loma, mbu inywe abakhulundu mumihika mukwana okhuboola akobuchesi bwenywe.

⁸Nebutswa nomwoyo kwa Nyasaye Wokhunyala Biosi, okwitsanga mubandu ma kubahelesia obuchesi.

⁹Sikali nokhuba omusakhulu wemihika eminji okhuchilanga abandu nibaba abachesi, nohomba okhuchilanga nibamanya amalunji tawe.

¹⁰Kho luno nyenyanga mumbuyie; lekhe mubool'le akampaalanga.

¹¹“Ndali okhusiling'ana nimbuyia olwa mwakhal'lomanga; ninindil'la olwa murunilisiiye amang'ana kobuchesi.

¹²Tooto ndali okhumurechisia amarwi, ne lole, siyalikhwo mwinywe omufukuuye Ayubu tawe, kata okalusisie amang'ana mwinywe tawe.

¹³Mwakhaboola mbwena mumal'le okhunyoola obuchesi? Nyasaye okhwola ahelesie Ayubu likalusio, tawe abandu.

¹⁴Ayubu al'lomelenje khwinywe tawe khu ise, nebutswa sindakhamukalusie singa obwa mukhol'le tawe.

¹⁵“Ayubu, amang'ana kabaramile; babula elia bakhakhukalusia.

¹⁶Nase nzilil'le okhulinda sichila babun'ne tsi noho? Basinjiye yaho butswa nibaralikhwo neling'ana lindi liosi elia banyala okhuboola khandi tawe.

¹⁷Tawe, ise nzia okhuhaana likalusio lianje luno, ma mubool'le akampaalanga.

¹⁸Sinyala okhubula okhul'loma tawe. Sinyala okhwikal'la amang'ana tawe.

¹⁹Niranyoola obweyangu bwokhul'loma, nzia okhwatikha singa esimuka esiitsuyemwo ewaini indoro.

²⁰Okhwola mboole, kho nyoole okhusakulukha okhwola nzikule omunwa ningalusia amang'ana;

²¹sindayekhelakhwo omundu wosi tawe, kata sinzia okhubehelesia omundu wosi tawe.

²²Sindamanya okhubehelesia tawe, Nyasaye yetsukhan'na niyambelesia esinyasio esibi nimba nikhola mbwo.”