Read lunyore AYUBU 33 Bible Online

AYUBU 33 - lunyore bible

AYUBU 33

¹“Nebutswa ibe Ayubu, yanza ohulile aka mboolanga; rechelesia amang'ana kanje kosi.

²Lola, nderechekhele okhuboola akali mumapaalo kanje.

³Amang'ana kanje kosi kali habwene, khandi ise mboolanga akatooto.

⁴Omwoyo wa Nyasaye niye owanonga; omuuya kwe Uyo Owokhunyala Biosi kwambeelesia obulamu.

⁵Noba nonyala, ungalusie amang'ana kanje; werechekhe ma umbotselesie.

⁶Lola, ise n'nawe khufwanana imbeli wa Nyasaye; fwesi khwalongwa khwitoyi.

⁷Kho obula esifune esichila urie ise, sindi onyala khuleka tawe.

⁸“Mbuliye akobooye, amang'ana kosi akol'lomele ngahuliye olwobooye mbu,

⁹‘Ise mbula esikha; sibulakhwoho esindu esibi siakhol'le. Ise mbula esikha khandi mbula tsimbi tsiosi.

¹⁰Nebutswa Nyasaye unyooye akachila yanyinjil'le, ma yakhol'langa singa omusukuwe.

¹¹Abohanga ebilenje bianje m'minyololo; ahenjelesianga tsinjila tsianje tsiosi.’

¹²“Ayubu khubool'langa sioli habwene tawe. Nyasaye ayomba abandu bosi.

¹³Nisina esichilanga noboola mbu, Nyasaye siakalusianga amekaano kabandu?

¹⁴Kata nikali Nyasaye al'lomanga ali akhenji, ne abulaho obukulangamwo obukono.

¹⁵Butukhu abandu nibakonanga tsindoolo, Nyasaye al'lomelanga mumalooro nende amabisulo.

¹⁶Nyasaye akholanga abandu okhuhuyia khu okaboolanga, ne batekesibwa nende amachetsiyio kaake.

¹⁷Nyasaye al'lomanga kho balekhe okhukhola tsimbi khandi okhubahonia balekhe okhwelola.

¹⁸Nyasaye siahuchil'langa bamumwe tawe; abasoolanga okhurula mukhufwa.

¹⁹Nyasaye akol'losianga abandu khulwo khubarumila obulwaye, khandi khulwo okhwitsusia omubilikwe nobutsunwe.

²⁰Abalwaye omwoyo kurulanga khubiakhulia, kata esiakhulia esilahi silolekhanga esibi.

²¹Emibili chiabwe chitoranga; ma kata amakumbake kosi kalolekha;

²²babetsanga nibali ahembi okhufwa, babetsanga nibali ahembi okhutsia Emakombe.

²³“Haundi Om'malaika aletsa okhubakhonyel'la — mulala khubamalaika ba Nyasaye abetsusianga abandu akabakhoyele okhukhola.

²⁴Khulwe tsimbabasi om'malaika alaboola mbu, ‘Mulakhule! Sibakhoyele khutsia emakombe tawe. Omurungo kwokhubanunula ngwokuno.’

²⁵Kho omubili kukwe kulakalukhamwo obulamu nende tsingufu khandi;

²⁶ma basaaye Nyasaye, naye nabahuchiil'la, balamwekayakaya Nyasaye nobusangali, Nyasaye alabakasisia tsinjila tsiabwe bulahi khandi.

²⁷Mulala khubo yembanga imbeli wabandu naboola, ‘Ise ndakhola tsimbi nisiamia akali amalunji, nebutswa sindanyoola esinyasio esia ndakwana okhunyoola tawe.

²⁸Waanunula omwoyo kwanje kulekhe okhwikha musilindwa; ise sili omulamu.’

²⁹“Lola, yako kosi Nyasaye okhol'langa abandu, ali akhenji;

³⁰ahonianga obulamu bwomundu, ma amuhe obulamu bwokhwesangasia.

³¹“Hulila bulahi, Ayubu, urechele amarwi; buna tsi, nase mboole.

³²Noba noli neling'ana, kho ungalusie, ndakhasangala okhumanyia mbu oli habwene.

³³Ne nikarali mbwo tawe, osiling'ane ma umbuyie, nase ndakhwechesia obwokhuba omuchesi.”