Read lunyore AYUBU 34 Bible Online

AYUBU 34 - lunyore bible

AYUBU 34

¹Khandi Elihu naboola mbu,

²“Abandu inywe muli abachesi khandi abalwenyukhu; hulile luno ake ise mboolanga,

³sichila singa obwesirwi siteemanga amang'ana, nimbwo ol'limi lutsanzamanga khubiokhulia.

⁴Chende khwele akali habwene, chende khwahule akali amalahi ifwe abene.

⁵Ayubu ubooye mbu ye abula esikha, mbu Nyasaye usuye okhumukhol'la aka akhoyanga.

⁶Aboolanga mbu, ‘Ise ndakhabeha mbwena nimboola ndi nesikha? Ise fumir'rwe obubi bwene nebutswa sindi netsimbi tawe.’

⁷“Mbula mwalolakhwo omundu owakhafwanana nende Ayubu uyu? Sahelesianga Nyasaye oluyali lwosi tawe.

⁸Ye wayanza okhuba halala nabandu ababi, ne nachenda nabandu betsimbi.

⁹Aboolanga mbu sibulikhwoho obulahi bwosi, okhuteema okhukhola obulalilo bwa Nyasaye tawe.

¹⁰“Khulwe yako, mumbulile, inywe abobumanyilisi! Mbula Nyasaye Wokhunyala Biosi yakhanyala okhukhola amasiamu noho?

¹¹Akabul'langa abandu omukabwa okhulondokhana nebikhole bia buli mundu; nabakhol'la singa obwa bakwanana okhukhol'lwa.

¹²Tooto mwene, Nyasaye Wokhunyala Biosi siakholanga obubi bwosi tawe; khandi siakholangakhwo akarali akahabwene khumundu wosi tawe.

¹³Niwina owaheelesia Nyasaye oburuchi khusibala siosi? Kata niwina owamura okhusinjil'la esibala esilamba?

¹⁴Nyasaye naba nahinia emiiya okhurula mubandu,

¹⁵kho abandu bosi abali mwoyo balafwa ma bakalukhe khulukuukhi.

¹⁶“Luno umbulile noba noli nobuchesi.

¹⁷Mbula omundu obihil'lwanga amalunji yakharuka noho? Mbula wakhakhalachila Nyasaye omulunji khandi Owokhunyala Biosi esiina noho?

¹⁸Nyasaye akhalachilanga abaruchi nende Abaami esiina, olwa bali ababi khandi ababula obukhala.

¹⁹Sakholanga ebiela nakalukhila Abaami tawe. Kata sayanzanga abahinda nasuula abamanani tawe. Okhuba ye niye owabalomba bosi.

²⁰Omundu anyala okhufwa bungoyingoyi mubutukhu hakari. Nyasaye yeeranga abandu ma batiba; khandi yeeranga abobunyali sila okhurumikhila tsingufu tsinyinji.

²¹Ahengelesianga tsinjila tsiefwe; nalola injenda yefwe yosi.

²²Sikhulikhwoho nesiilima esimwamu ti, esiakhanyala okhubisa omukholi wetsimbi okhurula khu Nyasaye tawe.

²³Nyasaye satakhanga okhurechekha inyinga eyeifwe okhutsia okhukhalachilwa esiina n'naye tawe.

²⁴Satakhanga okhureebelesia amang'ana, kho ahinieho abemeli ma areho abandi musilenje siabwe tawe.

²⁵Sichilaye wamanya akebikhole biabwe, abahinianga mubwemeli nabatubula mubutukhu.

²⁶Ahaananga esinyasio khubakholi betsimbi ahabandu bosi banyala okhulola,

²⁷sichila balekha okhumulonda, khandi bachaaya amalakoke.

²⁸Bahachia abatakha okhulakaya khu Nyasaye, naye nahulila okhulakaya khwabwe nibarunanga obukhonyi.

²⁹“Nyasaye naba nabuna sila okhukhola ling'ana liosi abulaho owakhamuchekula. Naba niyebisa, ifwe fwesi khwakhabula obukhonyi.

³⁰Sibula esiamahanga kakhakakhol'le, khulwokhwikala abandu babi okhukaruka tawe.

³¹“Ayubu, mbula ibe wayeyama tsimbitsio khu Nyasaye, ma nomusubisia mbu sinokholekhwo tsimbi khandi tawe?

³²Wareebele Nyasaye akhumanyia tsimbi tsitsio, ma nouchil'la mbu sinotsilil'le okhukhola obubi tawe?

³³Wenyanga Nyasaye akhole ake ibe wenyanga, sichila osuulanga omurungokwe noho? Ibe omwene wahule, ise tawe; khubool'le luno akopaalanga.

³⁴“Abandu bobumanyilisi balahuchil'lakhwo; kata yabo bosi abali abachesi abambul'la balaboola

³⁵mbu, ‘Ayubu aboolanga mukhukorwa, khandi amang'anake kabula obuchesi.’

³⁶Paalekhwo khumang'ana kosi aka Ayubu aboolanga; mulalola mbu al'lomanga amang'ana singa omundu omubi.

³⁷Ameetanga indiri khutsimbi tsitsie, akhol'langa Nyasaye inzekhelesi imbeli wefwe fwesi.”