Read lunyore AYUBU 35 Bible Online

AYUBU 35 - lunyore bible

AYUBU 35

¹Khandi Elihu natsilil'la okhuboola mbu,

²“Sikali habwene ibe okhuboola mbu obula esikha imbeli wa Nyasaye tawe,

³nohomba okhureeba Nyasaye mbu, ‘Tsimbi tsianje tsikhusalisianga mbwena? Nisina esiandatoola khulwo okhubula okhwona?’

⁴Ise ndakhukalusia, halala nabalina baabo.

⁵“Henga likulu, ma olole; lola singa amalumbesi akali ikulu!

⁶Noba niwonoona, yako sikasalisianga Nyasaye tawe. Kata obubi bubwo nibwinjihibwa, oba nomukholeeye sina?

⁷Noba omulunji, oba nomuheelesiye sina? Sibulaho esia Nyasaye yenyanga okhurula khuibe.

⁸Omundu wasio niye osalilanga khulwe tsimbi tsitsio. Khandi amalahi kokholanga kamukhonyanga.

⁹“Abandu nibakhupibwa esibi babindanga; balakayilanga omundu wokhubasoola okhurula khubandu bobunyali.

¹⁰Nebutswa sibamulanganga Nyasaye, Owabalomba tawe; obahelesianga obukhonyi mutsinyinga tsindinyu.

¹¹Sibatsitsanga khu Nyasaye, ochilanga nikhuba abachesi, abachesi okhuyomba tsinyama tsiosi nende amanyonyi.

¹²Balakayanga nibareeba obukhonyi, nebutswa Nyasaye siabakalusianga tawe, sichila nabandu abeloli khandi ababi.

¹³Nyasaye sahulilanga okhulakaya khwabutswa tawe; Owokhunyala Biosi siabukulangamwo obukono tawe.

¹⁴“Ayubu, oboolanga sioli onyala khulola Nyasaye; nebutswa wefwile okhulindil'la — omusekwo kuli imbeli uwe.

¹⁵Opaalanga mbu Nyasaye siali onyala khuhaana esinyasio tawe, khandi siabukulangakhwo obukono mubetsimbi tawe.

¹⁶Kali butswa ibe okhutsilil'la okhul'loma; kali kololi siomanyile esioboolanga tawe.”