Read lunyore AYUBU 36 Bible Online

AYUBU 36 - lunyore bible

AYUBU 36

¹Elihu nameeta okhuboola mbu,

²“Undefwile hatititi, ma ohulile aka nzia okhuboola musilenje sia Nyasaye.

³Obuchesi bwanje nobubambukhu; nzia okhurumikhila akandamanya okhumanyia mbu Nyasaye, Omulonji wanje akholanga akahabwene.

⁴Kosi ake ise khubool'langa sikali akobubehi tawe; owololanga imbeli uwo nomundu obuchesi.

⁵“Lola obwa Nyasaye ali owetsingufu! Ye sachaayangakhwo omundu tawe; libulaho elia ye aranyala okhumanyilisia tawe.

⁶Saalekhanga abakholi betsimbi okhumenya oluhono tawe, ne aheelesinjia abakhupibwanga esibi akabakhoyele okhunyoola.

⁷Asoolanga yabo abali abalunji; abakholanga okhwamiha singa abaruchi nabakhola okhunyoola oluyali lweinziayo.

⁸Ne abandu nibaba nibabohwa khuminyololo, nibakhupa esibi khulwa akabakhol'le,

⁹Nyasaye abamanyianga tsimbi tsiabwe nende esunga yabwe.

¹⁰Khandi yeekula amarwi kabwe bahul'le amachetsiyioke; khandi abalakanga balekhe okhukhola amabi.

¹¹Nibaba nibahul'la Nyasaye ma nibamurumikhila, balamenya obulamu bwabwe mumulembe nende mubwale.

¹²Ne nibaba nibarahul'la tawe, baleerwa nolukanga ma bafwile mukhukorwa musibala sie Makombe.

¹³“Yabo abarali abalunji batsilil'langa okhubiikha oburima; ne kata olwa banyoolanga esinyasio sibasaayanga bakhonywe tawe.

¹⁴Bafwitsanga nibasili ababuukha, obulamu bwabwe bukhalikhilanga musifwabwi.

¹⁵Nebutswa Nyasaye yekesianga abandu okhubir'ra mukhukhupa esibi khandi arumikhilanga obusandi okhwikula tsimoni tsiabwe.

¹⁶“Nyasaye yakhuhinisie ibe okhurula mumatinyu, nakhukhola okhusangal'la omulembe; emesayo yetsusibwakhwo nebiokhulia ebinji.

¹⁷Nebutswa luno onyoolanga esinyasio esikhukwan'ne.

¹⁸Ohenge bulahi, khase ebihetso bilakhukaata, nohomba obuhinda bulakhukosia.

¹⁹Okhulakayakhwo sikhulakhuhonia tawe, kata obunyali bwosi bwetsingufutsio sibulakhukhonya tawe.

²⁰Oreekomba obutukhu bwitse, olwa abandu baakamibwa habundu wabwe tawe.

²¹Ohenge bulahi, orakhola obubi tawe; okhukhupa esibikhwo khurumilwe khuibe kho olekhe okhukhola obubi.

²²“Witsul'le mbu obunyali bwa Nyasaye nobukhongo; ye niye omwibaali oyombele abandi bosi.

²³Abulaho onyala okhubool'la Nyasaye eliakhola, nohomba onyala okhumuyaala khulwokhukhola amabi.

²⁴Yetsoomibwanga khulwe milimochie; nawe okhwola omwitsoomie.

²⁵Abandu bosi balolanga aka amal'le okhukhola; nebutswa ifwe khuchilol'langa ehale.

²⁶Sikhunyala okhumanya kosi akobukhongobwe tawe, nohomba okhubala obwinji bwemihikachie tawe.

²⁷“Nyasaye niye obukulanga amaatsi okhurula khusibala, nakakhola okhuronya okhurula mwikulu singa ifula.

²⁸Achilanga ifula nekwa okhurula mumalumbesi, neekwila abandu bosi musibala.

²⁹Abulaho omanyile obwamalumbesi kachendanga, nohomba obwetsimbeni tsihanukhanga okhubir'ra mwikulu aha Nyasaye amenyanga.

³⁰Arumanga tsimbenitsie mwikulu liosi, nebutswa tsindungu tsieinyanza tsisikalanga musiilima.

³¹Nimbwo akhalachilanga abandu, nabahelesia ebiokhulia mubwinji.

³²Atilanga oluheni namakhonoke, nalulaka okhukhupa aha yenya.

³³Okhuhukuma khwelikulu khubuulanga okhwitsa khweifula yeimbumbuyeka ne kata tsing'ombe tsimanyanga eli ahembi.”