Read lunyore AYUBU 37 Bible Online

AYUBU 37 - lunyore bible

AYUBU 37

¹“Okhuhukuma khwelikulu khuchilanga omwoyo kwanje ngukhupa bwangu singa okwenya okhurula.

²Mwesi hulile omwoyo kwa Nyasaye, omuhukumo okhurula mumunwakwe.

³Arumanga olweni okhalania likulu, okhurula khundulo khwesibala o'khwola elubeka lundi.

⁴Olunyumakhwo okhuhukuma khwomwoyo kukwe khuhul'likha, omwoyo kwa Nyasaye kuhukuma nomwekhonyo, ne tsinyinga tsiene yitsi tsiosi olweni lutsilil'langa okhwakha.

⁵Olwa Nyasaye alaka, ebindu biokhuchenya bikholekha, ebindu biamakana ebiakhuranyala khumanyilisia.

⁶Okhuba abool'langa etsaluchi okhukwa khusibala, khandi aruma ifula inyinji okhutsinzibia esibala.

⁷Yekal'langa abandu okhukhola emilimo, Khe babe abanyala okhumanya emilimochie.

⁸Etsisolo tsiomubulimo tsitsia mutsinyanga.

⁹Imbumbuyeka yomuyeka erula enandete, ne obusindu obunyifu burula esinyolu.

¹⁰Emiya chia Nyasaye tsikhola amaatsi okhuba etsaluchi, ma kakwa ebarafu inyomu singa elichina.

¹¹Yetsusinjia amalumbesi nende amaatsi, ma alekha olweni okhwakha muko.

¹²Kachendanga khulwobulalilo bwa Nyasaye, kakholanga aka Nyasaye alakanga habundu hosi musibala siosi.

¹³Nyasaye arumanga ifula okhutsilisia esibala; anyala khuruma ifula okhusaalisia abandu, nohomba okhumanyia obuyanzi bubwe.

¹⁴Esimilisiekhwo hati Ayubu, ma opaale khukebikhole biamakana bia Nyasaye akholanga.

¹⁵Umanyile obwa Nyasaye ahaananga amalako, ma achila oluheni nilwakha okhurula mumalumbesi?

¹⁶Umanyile obwa amalumbesi kelemanga khwikulu, yichio nemilimo chiokhuchenya echia Nyasaye.

¹⁷Olwo omuyeka kwenandete kusambanga liloba, tsingubotsio tsilakhusaalisia khulwoluya.

¹⁸Onyala okhukhonya Nyasaye okhubambula likulu, ma olikhole okhuba eliomu singa esibia esiaruutwa noho?

¹⁹Okhwibaal'le akakhunyala khubool'la Nyasaye; okhuba obwongu bwefwe bubulamwo esindu.

²⁰Sinzia okhureeba n'nome na Nyasaye tawe; busina muhelesie obweyangu yamume?

²¹“Abandu sibanyala okhukoola khuliuba tawe, sichila lili nobulafu obwinji; omuyeka kweyele likulu lilabile.

²²Okhwakha khufwana etsahabu khulolekhelanga esinyolu; ne obukhongo bwa Nyasaye bukhwitsusisie noburi.

²³Obunyali bwa Nyasaye nobukhongo okhusila, sikhunyala khwesunda ahembi khuye tawe; nomulunji khandi owatooto mukhurumikha nabandu.

²⁴Niko akachila abandu bosi nibamuria; ma khandi wachaaya yabo bosi ababoolanga mbu nabachesi.”