Read lunyore AYUBU 38 Bible Online

AYUBU 38 - lunyore bible

AYUBU 38

¹Ma OMWAMI namukalusia Ayubu okhubir'ra mumbumbuyeka namubool'la mbu:

²“Ibe niwina orasubilanga akobuchesi bwanje, khulwokhureeba amang'ana kobusilu amakhaya?

³Luno sinjila silunji singa omusaatsa, ma ungalusie amang'ana akanzia okhukhureeba.

⁴Wali hena olwa ndalomba esibala? Umbool'le noba nokamanyile okhusila.

⁵Niwina owasichel'la obukali bwasio? Niwina owasipima nomukoye? Mbula ibe umanyile amakalusio kosi?

⁶Nisina esiletel'langa etsisiilo etsiesibala? Niwina owara lichina liomukona mwesibala?

⁷Mumabwebwe mwelitukhu yilio, tsinyininyini tsiembela halala, ne ebilonje biomwikulu biakhupa liyoka khulwobusangali.

⁸Niwina oweekala emiliango khulwokhwikal'la inyanza, olwa yarulikha nerula mulubelekhelo lwesibala?

⁹Nise owafuunikha inyanza namalumbesi, ma ninziboha musiilima.

¹⁰Ndaara olwakho lweinyanza, nirakhwo ebikal'lo nemiliango.

¹¹Ndatsibool'la mbu, ‘Ahawola ngaha solabiraho tawe! Tsingufu tsiebikubulibio okhwola tsiakame hano.’

¹²Ayubu, mbula ibe mumatukhu kobulamubwo kosi, walakakhwo litukhu okhukwa mukamba noho?

¹³Walakakhwo omukamba okhufumila esibala, ma notechesia ababi nibarula ahabebisanga?

¹⁴Om'basu kuchilanga ebikulu nende amabona okhulolekha singa amakhanya keingubo, bilolekhanga obulahi singa amang'oole akokhundabu yalongwa.

¹⁵Obulafu bwelitukhu nobukhongo okhusila khubabi; ne bubekal'langa okhukhola amang'ana kobulwani.

¹⁶“Ibe wayolakhwo khubitaho ebili musi mweinyanza? Wachendakhwo mulwalo lweinyanza ingali?

¹⁷Mbula omundu wakhumanyiakhwo ebilibwa ebikalanga esibala esimwamu sie Makombe?

¹⁸Mbula wamanyakhwo obukali bwesibala? Ungalusie noba nomanyile yako kosi.

¹⁹“Mbula umanyilekhwo ahobulafu burulanga? Nohomba ahesiilima sirulanga?

²⁰Onyala okhubimanyia ahabinyala okhutsia ma biole, nohomba okhubikalusie ahabirul'le noho?

²¹Ibe wamanya sichila wali niwebulwa olwene yilwo, emihikachio neminji okhusila!

²²“Ibe wainjilakhwo mumabiikhilo keetsaluchi, kata okhulola amabiikhilo kamachina keifula noho?

²³Ise ndabibikha bierechekhele tsinyinga tsieminyakhano, nende amatukhu kobulwani nende akelihe.

²⁴Ibe wayolakhwo aheliuba lirulanga, nohomba habundu homuyeka kwebukwe omuyiu pa kurulanga?

²⁵“Niwina owalombela ifula yolucheka omutalo, khandi nalombela ikhupa eyomwikulu injila?

²⁶Niwina okwisianga ifula khusibala ahabandu babula; khandi musitsiimi, omwa omundu baramenyanga?

²⁷Niwina onyul'lusianga amaatsi khwiloba eliomu k'ka, ma kho obunyasi bumelekhwo?

²⁸Ifula elikhwo nende samwana? Niwina oweebula ebironyelesi bieliime?

²⁹Niwina mama webarafu nende lifumbi,

³⁰ebikwisianga amaatsi okhuba amachina, nende okhunyisia khutsinyanza ikulu?

³¹Ibe wakhanyala okhuboha Amayika halala kata okhutendeyia lifundikhilo lie Inimilo?

³²Ibe wakhanyala okhwemel'la tsinyininyini tsia Matsarotsi[9], buli munyinga yatsio? Nohomba wakhanyala okhwemel'la Eliaka likali nende abaana balio?

³³Mbula wamanya amalako akalindanga likulu, ne wakhanyala okhukakhola karumikhe khusibala?

³⁴“Wakhanyala okhuhaana amalako khumalumbesi, ma okakhole kakhutsukhil'le amaatsi keifula?

³⁵Ne noba nolaka oluheni okhwanukha, mbula lwakhetsa ma lukhubool'le mbu, ‘Ndi hano okhukhurumikhila?’

³⁶Niwina owara obuchesi mumwoyo mukari? Kata niwina owaheelesia amakani obumanyilisi?

³⁷Niwina oli omuchesi onyala okhubala amalumbesi, ma akeenamie hasi okhusundula ifula,

³⁸ifula ekalukhanianga olukhuukhi okhukwa obutoyi?

³⁹“Wakhanyool'lakhwo etsisimba ebiokhulia, nolisia etsisimba tsimbuukha nitsikura

⁴⁰olwa tsiebisa mumangaywa tsiatsio, nohomba olwa tsiebisa nitsiekonekha mubuko bwatsio?

⁴¹Niwina ohelesinjia amakhokho ebiokhulia olwa kanyakhananga neinzala, khandi olwabaana bako bandakayilanga nibenya ebiokhulia?”