Read lunyore AYUBU 39 Bible Online

AYUBU 39 - lunyore bible

AYUBU 39

¹“Mbula wamanya olwe tsimbusi tsiomubikulu tsibulwanga? Omalanga okoola ebitsusu nibibulanga?

²Wakhamanya emiesi chiabimalanga nabaana babio munda? Wakhamanya litukhu liabiabul'langamwo?

³Ibe umanyile olwa biakhereke hasi ma bibule abaana?

⁴Abaana babio bakhulanga netsingufu m'mitsuru; barulangaho ma sibakalukhanga tawe.

⁵“Niwina owalakhuula etsisikhili okhutsia mubulimo? Niwina owatsibolola khumikoye nalekha nitsiechendachenda?

⁶Ndali okhutsiha esitsiimi sibe hango hatsio, ma nindekha tsimenye musipaapi siechumbi.

⁷Tsiamenya ehale okhurula khwiyoka lielitookho, ma sialiho onyala okhutsiruka ma atsikhole tsitiye tawe.

⁸Ebikulu niho ahobwayilo bwatsio buli, ahatsikhabanga obunyasi bwosi obubisi khulwo khulia.

⁹“Imboko yakhahuchil'la okhukhurumikhilanga? Yakhahuchil'la khukona munyumba yawachiombokhela?

¹⁰Onyala okhuboha imboko khwichoki ma ekhulimile? Nohomba ekhulombele tsinyaali m'mukunda?

¹¹Wakhasubil'la tsingufu tsiayo tsingali khulwokhukhola emilimo emitinyu?

¹²Osubilanga enyala okhukhuleer'ra amacheseko, nende okhubunjelesia obuswache okhurula mulutse?

¹³“Tsimbaha tsielihuto tsikhupanga bwangu. Nebutswa lihuto siliakhapulukha bwangu okhuyomba ekhonye tawe.

¹⁴Lihuto lilekhanga amayayi kalio hasi, khulwoluya lwamaloba okhukaha oluya.

¹⁵Silimanyanga mbu esilenje sinyala okhukatubula, nohomba esolo yakhakasena tawe.

¹⁶Likholanga singa amayayi sikali akalio tawe, khandi silibukulangakhwo mwo obukono mbu tsingufu tsialio tsitsiye butswa tawe.

¹⁷Ise Nyasaye walikhola okhuba lihingwa, khandi sindalikabul'la obuchesi tawe.

¹⁸Olwa lichingukha okhwilukha, lilukhanga bwangu okhusila, ma litsekhel'la esululi nende uyo ochend'akhwo.

¹⁹“Niwe Ayubu, owaheelesia etsisululi tsingufu tsiatsio, khandi notsihelesia amaswa kelela khwikosi?

²⁰Niwe otsinyal'langa okhuruumachila singa isiche, khandi okhuriisia abandu khulwo khufura emiiya.

²¹Tsituyatuyanga tsimbakayu tsiatsio hasi mwibanda; ma tsilukha okhutsia khulwana netsingufu tsiatsio tsiosi.

²²Sitsiriitsangakhwo esindu siosi, kata olukanga silunyala okhutsikalusia inyuma tawe.

²³Ebilasan'nwe biabachendelanga khu esululi, bachinganga, bikhupanga liyoka nende okhwakha khuliuba.

²⁴Okhutekela nende okhubula khwesimilisia, etsisululi tsitsilil'langa okhwilukha nitsia imbeli; ne olwe tsinzika tsikhupanga, sitsiesimilisiangakhwo.

²⁵Buli lwosi olwolwika lukhupwa, ne tsifura emiiya; tsihul'langa obulwani nibuhanya nitsisili ehale; khandi tsihul'langa abemeli nibahaananga amalako.

²⁶Mbula likhongotsa liekanga okhupulukha okhurula khu ibe, olwa libambulanga tsimbaha tsialio nilihengisie enandete noho?

²⁷Mbula Inditsu elindil'langa otsilake kho ebe enyala okhwombokha esitsu siayo musikulu noho?

²⁸Elombanga obumenyo bwayo khulwanda oluli hekulu okhusila ma elomba amachina amarambi okhuba oluhinga lwayo.

²⁹Habwene yaho, ehengelangaho ahembi nende ehale esienyala okhwira nende okhulia.

³⁰Ahe inyama efwiye tsinditsu tsiebunjikhangaho; ne abaana batsio nibanywa amatsahi.”