Read lunyore AYUBU 4 Bible Online

AYUBU 4 - lunyore bible

AYUBU 4

¹Ma Elifasi okhurula mwitookho lia Temani nakalusia mbu,

²“Omundu naba nateema okhul'loma n'nawe, wakhasinyikha noho?” Nebutswa niwina owakhabula okhul'loma?

³Lolako, Ibe waibaal'la abandu abenji, khandi watinyilisia amakhono amatekhele.

⁴Amang'anako kaletel'la yabo abakwitsanga, khandi watinyilisia amasikamo amatekhele.

⁵Ne leelo nakaako okhuba musibi, nawe siwefwiliye tawe, kakhwol'lekhwo, nawe utecheye.

⁶Okhuria Nyasaye khukhwo, sikhuli nikhwo okhuchilanga nokufuhala? Ne esilongoolesio, sisili nisio, esichilanga noba nende okhunaaya?

⁷“Paalakhwo luno, niwina oraalikhwo nesikha, ma natiba? Kata nihena ahabalunji bamululwakhwo?

⁸Singa obwa ndalola yabo abalimanga obubi, ne nibaraaka obumayanu bachesanga ebiene yibio.

⁹Khulwe emiiya chia Nyasaye batibanga, khandi abamululanga muburimabwe singa imbumbuyeka.

¹⁰Ababi bahuumanga nibakhasa singa etsisimba, nebutswa Nyasaye abasiling'anianga, nafunaka ameno kabwe.

¹¹Singa esimba arali nende esioluhiitsi, bafwitsanga, ma abaana babwe nibakor'ra mubulimo.

¹²“Ndaleer'rwa ling'ana masilisi, esirwi sianje nisihul'la amamonyi kalio,

¹³ndali nindooranga amalooro amabi, olwe etsindoolo tsinyinji tsiyilanga abandu.

¹⁴Ma indenga niyimamba, halala nokhutechela, nikachila amakumba kanje kosi nikarenga.

¹⁵Obusindu bwabir'ra m'moni mwanje, ma eliiswi lianje nilisinjila khumurwe kwanje.

¹⁶Ndalola esindu nisisinjila tiili, sindamanyilisia likondo liasio tawe. Esiinini siasinjila imbeli wanje. Isi yasiling'ana tsi ma nimbul'la omwoyo nikuboola mbu

¹⁷“Omundu wosi yakhanyala okhuba omulunji imbeli wa Nyasaye noho? Omundu yakhanyala okhuba omusiyikhu imbeli Womulonjiwe noho?

¹⁸Nyasaye sabasubilanga kata abamalaikabe bene tawe. Abanyoolangamwo amabi.

¹⁹Kho opaalanga nasubile abandu nabandu abalongwa khwitoyi, abobuchiachilo bwabwe buli olukhuukhi abatubulwanga singa likuyukuyu.

²⁰Bamululwanga hakari wa mukamba tsuli nende mukolooba, batibanga inziayo, omundu wosi narahendelakhwo tawe.

²¹Kosi aka bali n'nako nikaba nikahinibwa khubo, bakhafwa sila obuchesi bwosi.”