Read lunyore AYUBU 40 Bible Online

AYUBU 40 - lunyore bible

AYUBU 40

¹OMWAMI yatsilil'la okhubool'la Ayubu mbu,

²“Ayubu, ibe wali okhundula ise Nyasaye Wokhunyala Biosi; mbula olalekha okhundula nohomba olangalusia?”

³Kho Ayubu yakalusia OMWAMI naboola mbu,

⁴“Lola ise ndal'loma butswa mukhukorwa, ndakhakhukalusia sina? Sinzia okhuteema okhuboolakhwo ling'ana lindi liosi tawe.

⁵Mal'le okhuboola okhuyomba akaakhoyele okhuboola.”

⁶Ma OMWAMI nakalusia Ayubu okhurula mumbumbuyeka naboola mbu,

⁷“Luno sinjila silunji singa omusaatsa, ma ungalusie amang'ana kanzia okhukhureeba.

⁸Mbula oteemanga okhumanyia mbu ise sindi habwene tawe noho? Mbula wakhambikhakhwo amabi, ne nawe niwekhola omulunji noho?

⁹Mbula wakhabakhwo netsingufu singa etsianje noho? Kata wakhahukumakhwo nomwoyo omukali singa okwanje noho?

¹⁰Nikakhaba mbwo, sinjila omanyie oluyalilwo nende obunyalibwo; webiikhe obukhongo nende olukoosi.

¹¹Ohenge khu yabo abali nende esunga; obatukhile muburimabwo ma obatutuyie.

¹²Yee, henga khubo ma obeesie hasi; seen'na ababi hasi aha basinjiye.

¹³Obayabile bosi hasi m'maloba; babohele musibala sie makombe.

¹⁴Ma ise nambe owokhuranga okhukhwitsoomia nimbuchil'la mbu ibe wenyooleye obulechi omwene.

¹⁵“Henga khu Behemotsi[10] okunyama kwemumatsi, nise owakulonga singa obwa ndakhulonga ibe, kwayanga obunyasi singa ing'ombe.

¹⁶Lola, tsingufu tsiakwo tsili mumubili kwakwo, nobunyali bwakwo buli mumisi echiomunda.

¹⁷Kwominjia omusila kwakwo singa omusiita; emisi chietsibatswa tsiakwo chiatiilana halala.

¹⁸Amakumba kakwo namatinyu singa omukasa, ebilenje biakwo bifwana singa esibia.

¹⁹“Nisio esilonje sianje esiokhuhuka mubiosi! Ise omulonji wakwo sienyene nise onyala okhukuleka.

²⁰Obunyasi bwakwayanga bumelanga khubikulu ahetsisolo etsiom'bulimo tsisin'nanga.

²¹Yeyalisianga musiinikha siemisaala chiebisisia, niyebisa mumatundu komwitubwi.

²²Ebisisia tsana halala nelikuku liom'mwalo, bikuhetsanga esiinikha siachio.

²³Kata omuchela nikuba nikwitsula ma nikuhilana ebindu, Behemotsi sikutechesibwangakhwo tawe; kwesimilisianga olwa maatsi ka Yorodani kakutiabanga mutsimoni.

²⁴Niwina owakhanyala okhukubofusia ma akutiile? Nohomba niwina onyala okhutiila amoolu kakwo neingaka?