Read lunyore AYUBU 41 Bible Online

AYUBU 41 - lunyore bible

AYUBU 41

¹“Wakhaluba Lewiatsani[11] neingaka, nohomba okhuboha olulimi lwayo nomukoye noho?

²Wakhara omukoye mumoolu kayo, kata okhuchifutula oluseya neingaka?

³Eli eyakhakhusaaya ochilekhe noho? Elakhureeba ochibeele tsimbabasi noho?

⁴Elalomba n'nawe indakano mbu ochibukule ebe omusumbawo khulweinziayo noho?

⁵Mbula olachiboha ebe singa linyonyi eliarukwa, ebe singa esindu siokhuyanzisia abakholibo abakhaana noho?

⁶Mbula abalubi balachikhupila ebeyi noho? Mbula abakhala balachikhalania khulwokhuchikusia noho?

⁷Wakhetsusia likhoba liayo nende amafumo kokhulubila, nohomba okhufumira omurwe kwayo namakhano noho?

⁸Chitilekhwo l'lala ne siolitemakhwo khandi tawe, siwakhebil'le obulwani bwayo khandi tawe!

⁹“Lola, omundu wosi ololanga Lewiatsani, ahambwanga noburi ma akwa hasi.

¹⁰Olwa ebusibwanga, ebetsanga imbalaba; sialiho onyala khusinjila imbeli wayo tawe.

¹¹Niwina oumbanzangakhwo esindu siosi mbu okhwola murunge? Ebindu biosi ebili hasi welikulu nebianje.

¹²“Lekha khubool'lekhwo khukebilenje bia Lewiatsani, ma khwinoosie singa ali omukhongo khandi owetsingufu.

¹³Abulaho onyala khuhinia khuyo likhoba lieikulu. Nohomba okhufutula ebitsengwa bia yesinganga khumubili kwayo?

¹⁴Niwina owakhanyala okhung'abula omunwa kukwe okwabotokhanwa nameno kokhuriisia?

¹⁵Omukongo kwayo kwalombwa netsimbaso tsiebikhumba, ebiahambanibwa halala ma biatinya singa lichina.

¹⁶Buli silala siahambanibwa khusindi butinyu, kata omuuya sikunyala okhubira hakari wabio tawe.

¹⁷Biosi biahambanibwa halala butinyu, sisiliho esinyala khubiabukhania tawe.

¹⁸Niyasamula, ne obulafu bumulikha, netsimoni tsiayo tsiakhanga singa eliuba elirulanga.

¹⁹Omul'lo kwatukhanga mumunwa kukwe, netsinzekhele tsiomul'lo nitsiruuma okhurula mumunwa kukwe.

²⁰Omwosi kurulanga mumolu kaake, singa omwosi kurulanga mumakokha katukhanga yisi weindabu.

²¹Omuuya kwayo kuhambia amaanda, olumemo lurulanga m'munwa kwayo.

²²Likosi liayo lili netsingufu tsinyinji; ma bosi abakaana n'nayo barisibwa.

²³Abulakhwo habundu khwikhoba lilie hali hatoro, likhoba liayoma kaa singa esibia.

²⁴Omwoyo kwayo nomutinyu singa lichina, sikufunikhanga tawe, khandi nomutinyu singa lichina lierekoreko.

²⁵Olwa echinguukha, kata abetsingufu bariitsanga; babula okwabanyala khulwoburi.

²⁶Lubulaho olukanga olunyala okhuchisalisia; kata lifumo, nohomba olusele, kata esibabi sibinyala okhuchisalisia tawe.

²⁷Khuye esibia nesitekhele singa amakata, ne omukasa nomutofu butswa singa olubao olwabola.

²⁸Lubulaho olusele lunyala khumwilusia tawe; amachina akalaswanga khuyo kafwana amakokha.

²⁹Khuye esikulume sifwana amakokha, ne atsekhanga olwabandu balasanga amafumo.

³⁰Amakamba akali khunda khwayo kafwana ebikonjio, kakhuranga liloba liamatohi singa inyundo yabakhuyilanga.

³¹Atuubuulanga inyanza singa amaatsi akabililanga; ma achila inyanza epapachila singa indabu elimwo amafura.

³²Alekhanga injila ing'inang'inu inyuma wayo ma akalukhania inyanza okhuba lifilo.

³³Khusibala siosi sibulaho esihelana n'nayo, nesilonje esibula oburi.

³⁴Echaayanga tsinyama tsieinjinia; niye omuruchi wetsinyama tsiomubulimo tsiosi.”