Read lunyore AYUBU 42 Bible Online

AYUBU 42 - lunyore bible

AYUBU 42

¹Ma Ayubu nakalusia OMWAMI naboola mbu:

²“Manyile mbu ibe OMWAMI oli nobunyali bwosi; mbu onyala okhukhola amang'ana kosi akawenya.

³Oreebanga esichilanga ise nirasubila obuchesibwo, olwa nase ramanyile esindu siosi. Mbooyenje aka ramanyile tawe, amang'ana akamangalimwa, akali amakhongo okhusila ake ise ramanyilekhwo tawe.

⁴Umbooleye mbu mbuyie nawe nol'loma; ma ndeeme okhukhukalusia amareeboko.

⁵Hanyuma yaha ndamanyile butswa aka ndahuliyenje okhurula khubandi, nebutswa luno mal'le okhukhulola moni namoni.

⁶Khulwe yako simbile omurwe nende akambooye kosi, ne ndepuulanga olukuukhi nende likokhe khulwokhweyama tsimbi tsianje.”

⁷Olwo MWAMI yali namal'le okhubool'la Ayubu amang'ana yako, yabool'la Elifasi okhurula Temani mbu, “Khutiliye lirima likali ibe nende abalinabo babili, sichila simubooye khu ise amang'ana katooto, singa omurumikhili wanje Ayubu tawe.

⁸Kho luno bukule etsichulukhi chine nachitaru, nende amamiiku kane nakataru, mutsie khumurumikhili wanje Ayubu, ma mubihaane singa omusango omusambe khulwe tsimbi tsienywe. Ayubu alamusaayila nase nzia okhuhuchil'la okhusaayakhwe, ma ndekhe okhumusimbia omurwe singa mukhoyele okhukhol'lwa. Simubooye khu ise amang'ana katooto singa obwa Ayubu abooye tawe.”

⁹Kho Elifasi nende Bilidadi nende Sofari bakhola kosi ako MWAMI yali nabalakile; okhukhola, ma OMWAMI nakalusia amasaayo ka Ayubu.

¹⁰Kho olwa Ayubu yali namal'le okhusaayila abalinabe bataru yabo, OMWAMI yamukhola omuhinda khandi ma namuha emiandu echihela ebindubie biakhale esiakhabili.

¹¹Ma abamwabobe, ababotsonyene, nende bosi abali nibamumanya khale nibeetsa okhumukonya, nibalia lisabo n'naye munyumbamwe. Bamuhotselesia, nibamulemia omwoyo khusibi siosi esio MWAMI yali namuleereye. Buli mulala khubo yomuhelesia amapesa nende ingaka yetsahabu.

¹²Kho OMWAMI yalaamila Ayubu tsikhabi mumihika chiokhumal'likha chiobulamubwe kata okhuyomba obwa yali niyamulaamila olwokhuranga. Ayubu yali namakondi etsielefu likhumi natsine, netsingamia etsielefu tsisasaba, netsing'ombe etsielefu tsibili, netsipunda elefu ndala.

¹³Khandi yali nabaana abasiani bane nabataru nende abakhaana bataru.

¹⁴Omukhaana wokhurunga yamukulikha Yemima, neliira eliowakhabili liali Kesia; ne eliowakhataru liali Kereni Hapuki.

¹⁵Ne musibala siosi sibanyoolekhakhwomwo abakhaana belikondo singa abakhaana ba Ayubu tawe. Papa wabwe yabakabila obulaame halala nabasiani babwe.

¹⁶Olunyuma lwe yako, Ayubu yamenya emihika chindi emia ndala namakhumi kane, naluha nalola abaanabe, nabetsukhulube okhwola khunzibulo tsine.

¹⁷Ma Ayubu yafwa naali omusakhulu wamatukhu amenji.