Read lunyore AYUBU 5 Bible Online

AYUBU 5 - lunyore bible

AYUBU 5

¹Luno olange, ma olole naba naliho ohuchiil'langa. Alikhwoho om'malaika owonyala okhwilukhilakhwo?

²Lirima liiranga omuyingwa, ne imbalikha yiiranga omusilu.

³Ndalola abahingwa nibaralilanga, ne nonoho tsingo tsiabwe tsiali musibi.

⁴Abaana babwe sibali nomulembe tawe, ne abulaho osinjilanga okhubasoola musiina.

⁵Abali neinzala balitsanga amacheseke, bakabukulanga kata okhurula khumahwa. Nabo abobuluho bakhaayilwa emianduchie.

⁶Amatinyu sikarulanga mulukuukhi tawe, kata amasila sikasenukhanga mwiloba tawe.

⁷Siahene, omundu yebulwanga khulwokhunyoola amanyakhano, singa obwe tsinzekhele tsirumanga ikulu okhurula m'mul'lo.

⁸“Nindakhabeye ibe ndakhelukhiye khu Nyasaye, nimbaana amang'ana kanje khuye.

⁹Akholanga amang'ana amakhongo akaranyala okhumanyikha, amang'ana kamakana akaranyala okhubalikha.

¹⁰Ahaananga ifula khusibala siosi, naruma amaatsi mumikunda.

¹¹Achinguulanga yabo abetutuyianga, nabaha obusangali yabo abali musibeela.

¹²Akoyanianga tsinjila tsiababatsa, kho kosi aka bakholanga karanyala esindu siosi tawe.

¹³Atilanga abachesi mububatsa bwabwe, ne obuloosie bwabakalakala abuhiniangaho bwangu.

¹⁴Balolanga esiilima munyinga yom'mubasu, ne bahabasianga m'mubasu hakari singa mubutukhu.

¹⁵Nebutswa Nyasaye ahoninjia ababisandu okhurula khulufu, ahoninjia abatakha okhurula khuyabo ababasandianga.

¹⁶Ahaananga obunaayi khubabisandu, niyekala eminwa chiabasiamu.

¹⁷“Lolako, noweikhabi owa Nyasaye akol'losianga. Orasinyikha olwa akhukondokhela tawe.

¹⁸Nyasaye abohanga esitonda esiayaremaka. Afumiranga nebutswa khandi ahoninjia amafumire tsana.

¹⁹Alakhuhonia mumasiila kasasaba, kata kabe kane nakataru, liibi liosi sililakhusalisiakhwo tawe.

²⁰Mumatukhu keinzala alakhuhonia mukhufwa, ne mumatukhu keliihe, alakhuhonia khukhwirwa.

²¹Nyasaye alakhusoola khukhuchikhwa khwol'limi, alakhuhonia olwe sibi siitsa.

²²Olatsekha olwe esibi nende inzala biitsa, kata siolaria etsisolo tsiomubulimo tawe.

²³Emikunda chiolimanga sichilabamwo amachina tawe, kata etsisolo chiomubulimo sichilakhusaalisia tawe.

²⁴Nawe olabetsanga mwiheemalio nomulembe, olakonyanga esiayosio, noranyoola omuruko kwosi nikukor're tawe.

²⁵Khandi olalola mbu abetsukhulubo balaba abenji, khandi abolwibulolwo balaba abenji singa obunyasi bwokhusibala.

²⁶Olahilwa musilindwa emihika chiobukhulundubwo nichiol'le, singa ingano ekhomeye elindil'langa okhwola okhucheswa.

²⁷Kho kano kosi nakakhwarunilisiye, ne nakatooto. Okahul'le ma kabe akobukhonyi khuibe.”