Read lunyore AYUBU 6 Bible Online

AYUBU 6 - lunyore bible

AYUBU 6

¹Ma Ayubu nakalusia naboola mbu,

²“Amanyakhano kanje nikaba nikachelwa obusiro bwako, khandi amasiila kanje nikaba nikakharebwa khusichelo,

³obusiro bwabio bwakhayomba omuyekhe kwetsinyanza. Kho amang'ana kanje kokhwerobotsa karakhuchenyia tawe.

⁴Nyasaye Owokhunyala Biosi ufumir're netsisele tsiamanyakhano, obusungu bwatsio busalananga m'mubili kwanje kwosi. Nyasaye warechekha ebirisio bibie khu ise.

⁵“Epunda yomubulimo yakhaana neeli nobunyasi noho? Kata ing'ombe yakhaanakhwo neeli neliswa noho?

⁶Mbula esiliibwa esiralimwo esinosi siakhanyala okhulibwa sila echumbi noho? Nohomba ni ob'buulu sina obuli mwiyayi lilafu?

⁷Omwoyo kwanje sikwenya ebiokhulia bifwana mbwo tawe, ebiokhulia ebia nditsanga biosi biikhulumanga khumwoyo.

⁸“Busina Nyasaye arambelesia esiasabanga? Busina arakalusia amasaayo kanje?

⁹Bwakhabeye bulahi Nyasaye alandubula, khandi bwakhabeye bulahi alanzira.

¹⁰Yaka kakhanemisie omwoyo, ndakhasangaliye obusalilu obwinji, sichila sili okhwambakhanakhwo amang'ana ake uyo oli Omutsienukhu tawe.

¹¹Ndi nangufu sina etsiakhachila nzilil'le okhumenya? Nisina esiakhachila nzilil'le okhumenya nirali nende obunaayi?

¹²Khali lichina noho? Omubili kwanje kukhali omukasa noho?

¹³Siahene mbula tsingufu tsiokhwesoola, kata abulakhwoho ahanyala okhunyoola obukhonyi.

¹⁴“Mumasila singa yaka ndakhanga abalina abasubilwa, kata nikaba ndaebala Nyasaye nohomba tawe.

¹⁵Abalina banje bangaat'te singa emichela chiokhumwalo echikhamanga olwe ifula erakwitsanga.

¹⁶Ebarafu nende etsaluchi bikaliye emichela okhubira,

¹⁷nebutswa mumatukhu akoluuya, biosi b'bili nibikhamulukha, ne muusi mwemichela nichioma.

¹⁸Abemikanda abali khuluchendo bakora nibakhaaba amaatsi, bayeyema y'yi ney'yi musitsiimi ma nibafwilamwo.

¹⁹Abemikanda okhurula Tema barunilisianga, ne abemikanda okhurula Sheba bali nobunaayi,

²⁰nebutswa bafwa emioyo hamichela echiralimwo amaatsi.

²¹Nenywe muli singa emichela yichio khu ise, mulolanga esibi esingwiliye ma mukalukha inyuma khulwo buri.

²²Mbula ndamusabilekhwo esihanwa, nohomba ndamureebelekhwo muhekhwo omundu wosi esiomufusi khulwe ise?

²³Kata ndamureebelekhwo mbu muusoola okhurula khumusuku wanje, nohomba okhununula okhurula khubasandi noho?

²⁴“Kho munzibaal'le ma mumanyie amabi kanje. Nase nzia okhubuna tsi ma muhulile.

²⁵Amang'ana katooto kali netsingufu tsingali; nebutswa inywe muboolanga akobusilu.

²⁶Inywe mupaalanga mbu amang'ana akamboolanga kali butswa obusindu. Kho esichilanga nimungalusia khumang'ana kanje kokhwesikoka nisina?

²⁷Mufwananga abanyala okhukhupila omubisandu imbulu, nimunyool'la obukhala khubalina benywe!

²⁸Luno mumenje, sindaboolakhwo obubehi imbeli wenywe tawe.

²⁹Mukhol'le amabi okhusila. Muratsilil'la okhukhola amabi tawe, murangondokhela tawe. Amang'ana kanje nakatooto.

³⁰Nebutswa mupaalanga mbu ise mbehanga. Mupaalanga sindi onyala khwabukhania amalahi nende amabi tawe.”