Read lunyore AYUBU 7 Bible Online

AYUBU 7 - lunyore bible

AYUBU 7

¹“Obulamu bwomundu musibala, bufwana singa omundu ohakibwanga okhurumikha mihe khandi bufwana obulamu bwokhutiya emilimo emitinyu,

²bufwana singa omuhambe owekombanga esiinikha, khandi bufwana singa omukholi olindil'langa omurungokwe.

³Buli mwesi obulamu bwanje bubula obukhala okhumenyelakhwo; buli butukhu bunder'ranga esibeela.

⁴Olwa nzitsanga hasi okhukona reebanga mbu, ‘Nabusie lina naambuukhe?’ Rengetsanga obutukhu bwosi nindekomba mbu nabusie lina.

⁵Om'bili kwanje kwitsuyekhwo tsinyende; kwitsuyekhwo amakamba, amafila kanyalukhanga okhurula mumabondo tsana.

⁶Amatukhu kanje kabiranga bwangu sila obunaayi bwosi, kabiranga bwangu okhuyomba likurutumu liomulukhi wetsisweta.

⁷“Witsul'le E Nyasaye obulamu bwanje nobwimbichiti singa omuya; obusangali bwanje bwool'le khusihakamo.

⁸Olandolakhwo luno, nebutswa siwakhandolekhwo khandi tawe. Niwakhaarune, sindakhabeho tawe.

⁹Singa lilumbesi lihweetsekhelanga nilikhamulukha, nimbwo omundu ofiitsanga natsia emakombe, orakalukhanga khandi tawe.

¹⁰Sakalukhanga munzuwe khandi tawe, kata abandu behango hahe sibalamumanya khandi tawe

¹¹“Tawe! Sinyala khusiling'ana tawe! Ndi nelirima nende obululu, okhwola n'nome.

¹²“Esichilanga niumengelesia nisina? Opaalanga ise ndi okunyama kwomunyanza?

¹³Ngonanga hasi khulwo okhuhuluukha, khabanga esinyala okhumbonia obutsune bwanje.

¹⁴Nebutswa ibe uriisianga namalooro kaako; under'ranga amabisulo nende amalooro

¹⁵okhwola olwa omwoyo kwanje kwakhahula okhwesunga, nokhufwa, okhuyomba okhutsilil'la okhumenya m'mubili kuno.

¹⁶Mbinisiekhwo omwoyo; njonyele nelimenya, lekha mbe mbwo, sindolanga esichila menye tawe.

¹⁷Esichilanga nohelesia omundu oluyali nisina? Esichilanga nobukula obuha mukakholanga nisina?

¹⁸Omuhenjelesianga buli mukamba tsuli nokhumuteema khase na khase.

¹⁹Sioli owakhahengakhwo elubeka khulwo luhono, kho mbe onyala okhumilakhwo amare tawe?

²⁰Kata nimba nikhola tsimbi, kakhusalisisie mbwena, ibe omuhenji wabandu? Busina niukhola okhuba owokhupimilwakhwo esaba? Busina ndi omusiko khuibe?

²¹Busina orandekhela tsimbi tsianje? Busina oralekhela amabi kakholanga, khubwangu yibu nambe musilindwa mwanje olwa naukhaabe sinaunyoole tawe.”