Read lunyore AYUBU 8 Bible Online

AYUBU 8 - lunyore bible

AYUBU 8

¹Ma Bilidadi okhurula Shuhi nakalusia naboola mbu,

²“Olatsilil'la okhuboola amang'ana yaka okhwola lina? Amang'anako nakabutswa singa obusindu.

³Nyasaye asiaminjia obukhalachi bwahabwene noho? Kata uyo Owokhunyala Biosi yakhasiamia obulunji noho?

⁴Okhwola abaanabo babe nibakhol'le tsimbi imbeli wa Nyasaye, ma khulwako Nyasaye yabaheye esinyasio esibakwan'ne.

⁵Nebutswa luno kalukhila Nyasaye, ma osaaye khu Uyo Owokhunyala Biosi,

⁶noba noli omusiyikhu khandi omusubilwa, kho Nyasaye aletsa khuibe ma akhuhabine, nakhukalusisia emiandu chichio singa omukabwakwo.

⁷Emianduchio chiosi echiokosisie sinachibekhwo esindu okhufwananibwa nende echia Nyasaye nakhuhelesie tawe.

⁸“Yanza orunilisie khukamatukhu kakhale, ma okanakane khu yako akabakuka barunilisia nibanyoola.

⁹Obulamu bwefwe nobwimbichiti, sikhumanyile esindu siosi tawe, khubiranga butswa singa ebiniini khusibala.

¹⁰Nebutswa lekha abakuka abachesi bakhwibaal'le, hulila khu akabakhabooye kano:

¹¹“Amatundu sikanyala okhumela ahaesitondoyi siamaatsi sirali tawe, kata likuku silinyala okhumela ahamaatsi karali tawe.

¹²Amaatsi nikaba nikakhama, nibio ebiranga okhuniala, olwa biba nibisili ebitoro ebiranyala okhuremwa ma birumikhilwe.

¹³Nimbwo obwetsinjila etsia yabo ebebiil'la Nyasaye tsifwana, obunaayi bwomundu omubi bulatiba.

¹⁴Basubilanga oluusi — oluli inyumba yolububi.

¹⁵Nibaba nibesetamia khuluusi, mbula lwakhabakhonya okhusinjila noho? Nibaba nibesetamia khuluusi mbula lwakhabakinga noho?”

¹⁶“Ababi baneranga singa omuboka m'mubasu, khandi singa omuboka okulandanga m'mukunda kwosi.

¹⁷Emisi chiakwo chibotokhananga khumachina, ma chitinya k'ka khutsinyanda.

¹⁸Nebutswa nichiba nichiihwa, abulaho owakhamanyakhwo mbu chialinjiho.

¹⁹Yee, yibwo nibwo obusangali obwabandu babi bali n'nabwo; ne abandi betsanga nibabukula obukono bwabwe.

²⁰“Nebutswa Nyasaye sialakhupa omundu omusiyikhu omukongo tawe, ne sialakhonyel'la abakholi bobuti tawe.

²¹Alakhukhola otsekhe nende okhukhupa liyoka liobusangali,

²²nebutswa alasimbia omurwe, yabo abakhubihil'lwanga, ne tsingo tsiababi tsiakhamululwe.”