Read lunyore AYUBU 9 Bible Online

AYUBU 9 - lunyore bible

AYUBU 9

¹Ma Ayubu nakalusia naboola mbu,

²“Siahene manyile nimbwo kali, nebutswa omundu namundu yakhanyala mbwena okhuba omulunji imbeli wa Nyasaye?

³Omundu yakhahing'ana mbwena n'naye? Anyala okhureeba amareebo elefu ndala akomundu wosi arakhakalusia tawe.

⁴Nyasaye nomuchesi, khandi nowetsingufu; niwina owakhamwomela imoni ma ahindile?

⁵Ahininjia ebikulu mubukono bwabio nibiramanya tawe, abikokanga hasi muburimabwe.

⁶Atechesianga esibala, nasisimula mubukono bwasio, khandi atechesianga etsisiilo tsialeta esibala.

⁷Anyala khwikal'la eliuba lilekhe okhwakha, khandi yekal'le tsinyininyini tsilekhe okhwakha butukhu.

⁸Sialiho owamukhonya okhubambula likulu tawe, kata okhusen'na omukongo kwokunyama kwomunyanza tawe.

⁹Nyasaye yara tsinyininyini mubukono bwatsio mwikulu. Natsio ni Eyasulwe, Amayika, Inimilo, nende etsinyininyini tsienandete.

¹⁰Akholanga amang'ana amakhongo akabira nobumanyilisi bwosi, nende amang'ana kamakana akaranyala okhubalikha tawe.

¹¹“Lola Nyasaye yambirakhwo, nase niramulola tawe, atsitsachil'la imbeli, nase niramanyakhwo tawe.

¹²Abukulanga esia yenya, ne abulaho onyala khwimwikal'la, Abulaho onyala khumureeba mbu, ‘Okholanga sina?’

¹³Nyasaye sakalukhanianga lirimalie tawe. Atubulanga abasuku babe, abakhonyel'langa Rahabu,[3] okunyama kwomunyanza, okumufukulanga.

¹⁴Kho nase, ndakhamukalusia mbwena? Ndakhanyoola hena amang'ana kokhumukabusia?

¹⁵Kata nindi omulunji, eliandakhakhola, nokhureeba tsimbabasi okhurula khu Nyasaye omukhalachi wanje.

¹⁶Kata niyakhahuchil'la n'nome, sindi nobusubili yakhahul'la akamboolanga.

¹⁷Yandubulanga neimbumbuyeka, nameetania amafumire kanje sila esifune siosi tawe.

¹⁸Siyandekhelakhwo obweyangu okhuhelana tawe, waitsusia mubulamu bwanje obutsunwe.

¹⁹Nikali nokhuba netsingufu, Nyasaye nowetsingufu. Nikali namang'ana kokhumuyaala, niwina owakhamubool'la atsie musiina?

²⁰Ise mbula esikha khandi ndi omulunji, nebutswa amang'ana kanje kahul'likha okhuba amabi kata nirali nesikha ol'limi lulakhalachila esiina.

²¹Ndi omusiyikhu, nebutswa sindebalangakhwo omwene, okhuba esindu tawe, sinyikhilanga obulamu bwanje.

²²Kosi nimalala butswa, niko akachila nimboola mbu, Nyasaye atibinjia abalunji nende abarali abalunji.

²³Olwa omundu orali nesikha afwitsanga matetekhana, Nyasaye atsekhanga likhupako yilio.

²⁴Nyasaye wahaana esibala Khubabi, wabamwamia abakhalachi tsimoni. Ne Nyasaye narakhola mbwo, niwina owakhola?

²⁵“Amatukhu kanje keelukha bwangu, ne libulakhwo litukhu lilahi tawe.”

²⁶Obulamu bwanje bubira bwangu singa amaaro akelukha butinyu, bwilukha singa inditsu ekwitsanga khubiminywi.

²⁷Nimba nimboola mbu, “Ndalebil'la okhwekaana khwanje, ma ngalukhanie lihenga lianje ma mwenye!”

²⁸Riitsanga obusalili bwanje bwosi, okhuba manyile mbu Nyasaye alakhalachila esiina nisifwila.

²⁹Sichila baikhalachila esiina, kho busina nyakhananga butswa?

³⁰Ebulaho esabuni enyala okhusaaba tsimbi tsianje.

³¹Nyasaye yafuuba mubuko bwesifwabwi, ne etsingubo tsianje omwene tsiali okhuusinya.

³²Nyasaye alaba nali omundu singa ise, khane ndakhamukalusisie, khane khwakhatsiye musiina n'naye okhukol'losia oburambane bwefwe.

³³Abulaho omukayili hakari wefwe, abulaho owakhanyala okhuyaala Nyasaye nende ise.

³⁴Lekha okhumbelesia esinyasio, E, Nyasaye, obikhe ebirisio bibio ehale.

³⁵Sindi noburi tawe. Nzia okhul'loma sichila ndamanya omwoyo kwanje.