Read lunyore ETSISABURI 10 Bible Online

ETSISABURI 10 - lunyore bible

ETSISABURI 10

¹Osinjilanga ehale yiyo busina E OMWAMI? Busina webisanga munyinga tsiesibi?

²Ababi nabekhonyi ne bakhupianga ababisandu esibi; obatiile mumibero etsia balombele abene.

³Omundu omubi yepaakanga khulwobwekombi bubwe obubi, omulangu naye anyekanga nafukula OMWAMI.

⁴Omundu omubi sakhaabanga Nyasaye tawe, musunga yiye aboolanga mbu “Nyasaye sialiho tawe.”

⁵Omundu omubi anyoolanga kosi akarunanga. Sanyala okhumanyilisia obukhalachi bwa Nyasaye tawe. Achayilisianga abasukube bosi.

⁶Aboolanga mumwoyo kukwe mbu, “Ise sindisimulwa tawe; khunzibulo tsiosi sindiakanakhwo nesibi tawe.”

⁷Amang'anake amenji nebilaamo, obubehi nende ebirisio; nomwangu okhul'loma amang'ana kokhubihia nende akobusiamu.

⁸Yekonekhanga mumataala, nalindil'la okhwira abandu abarali nesikha. Ahichil'langa omutambi mambiswi.

⁹Ahichilanga mambwisi singa esimba mulwangaywa lwayo; akonekhanga nalindil'la ababisandu, abetsumbanga mumuberokwe ma abakhwesa nabahila ehale.

¹⁰Abatambi bayekhanga nibatubulwa, tsingufu tsiababi tsibalekele.

¹¹Omubi aboolanga mumwoyo kukwe, “Nyasaye sahendelanga tawe! Ufunikhile tsimoni tsitsie ne sianyala okhundola tawe.”

¹²OMWAMI Nyasaye, hana esinyasio khubandu babi yabo, ne orebil'la abakhupanga esibi tawe.

¹³Omubi yakhachaaya mbwena Nyasaye, ne naboola mumwoyo kukwe mbu, “Nyasaye salambelesia esinyasio tawe?”

¹⁴Nebutswa ibe ololanga omunyakhano nende okhukhupa esibi ne werechekhele okhuukhonya khasotso. Omutimi yehananga omwene khuibe, ibe okhonyanga abatambi khasotso.

¹⁵Ofunake obunyali bwabatamanu nende ababi; obahe esinyasio khulwa amabi aka bakhol'le okhwola olwa balekha okhukakhola.

¹⁶OMWAMI nomuruchi inziayo, Yabo abekayakayanga abanyasaye bandi balatiba okhurula khusibala.

¹⁷OMWAMI Olahuyia amasaayo kabetutuyi; olabahelesia ikholo.

¹⁸Olahulila okhulakaya khwabasandibwanga nende ababisandu; Olabakhalachila esiina khulwo bulunji bwabwe, kho abandu abarahindilanga balekhe okhuleera ebisiirio khandi.