Read lunyore ETSISABURI 102 Bible Online

ETSISABURI 102 - lunyore bible

ETSISABURI 102

¹Ohulile okhusaaya khwanje E OMWAMI, ohulile okhulakaya khwanje okhureebanga obukhonyi. Orakhupa omukongo!

²Olwamba nindi mumanyakhano! Umbulile ise, ma ungalusie.

³Obulamu bwanje bukhamulukhanga singa omwosi, omubili kwanje kuhitsanga singa omul'lo.

⁴Ise ndiabiywe hasi singa obunyasi obwomu; omwoyo kwanje sikwenya ebiokhulia tawe.

⁵Mbindanga butinyu; ne omubili kwanje nelikhoba nende ebikumba.

⁶Ise fwana esori musitsiimi, khandi singa likhule eliamenya habandu basambula.

⁷Ngonanga nimenga; ise fwana linyonyi elili lionyene khusilama sieinyumba.

⁸Omubasu kwosi abasuku banje banyekanga; ne yabo abanzekhel'langa barumikhilanga eliira lianje okhuboola ebilaamo biobubi.

⁹Okhuba ise nditsanga likokhe singa omukaati, ninzokania esiokhunywa sianje nende amasika. Ibe wambukula ma niufuuba.

¹¹Obulamu bwanje bufwana singa esiniini siamukolooba; nialanga singa obunyasi.

¹²Nebutswa ibe, E Omwami, omuruchi weinziayo tsinzibulo tsiosi tsilakhwitsul'la.

¹³Ibe olabukha ma obeele Sayuni esirenda; inyinga yakhola eyokhubeela Sayuni tsimbabasi, ino niyo inyinga eya habwene.

¹⁴Kata nikali Sayuni liayononibwa, abarumikhi baabo baliyanza, kata nikali liakwa likunda balibelel'langa.

¹⁵Abamahanga nabarie OMWAMI; abaruchi bosi abokhusibala nabarie obunyali bubwe.

¹⁶Olwo OMWAMI nayombokhe Sayuni obuhia, namanyie obukhongo bubwe.

¹⁷OMWAMI alarekia esirwi khubandu babe aba yali niyebil'la, ma khandi alahulila okhusaaya khwabwe.

¹⁸Handika hasi khulwolwibulo olwitsanga, bamanye ako MWAMI yakhola, kho abandu abasili khwibulwa luno baletsoomie OMWAMI.

¹⁹OMWAMI yahenga hasi nali ikulu hatsienukhu hahe, yahenga hasi khusibala nali mwikulu.

²⁰Yahul'la okhubinda khwababohe, ne nabalakhula yabo abali nibakhalachilwa okhufwa.

²¹Eliira lio MWAMI liribulwe mu Sayuni, ma naye nayetsoomibwe mu Yerusalemu

²²olwa bamahanga nende abobwami betsa halala, khulwo khumwekayakaya OMWAMI.

²³OMWAMI wainomba okhuba omutekhele olwa siili omubuukha. Watutuhia emihika chiobulamu bwanje.

²⁴E Nyasaye wanje, orahinia obulamu bwanje luno, olwa sili okhuba omundu mukhulundu tawe. E OMWAMI, ibe omenyanga inziayo.

²⁵Ibe walonga esibala mumatukhu kakhale, khandi namakhono kaako omwene walomba likulu.

²⁶Biosi bilatiba, ne ibe olatsilil'la okhumenya; bosi balakhunguha singa tsingubo. Olabafuuba singa tsingubo ma bosi bakore.

²⁷Nebutswa ibe oli singa obetsanga khasotso, ne obulamu bubwo sibuhwetsanga tawe.

²⁸Abaana befwe, ifwe abarumikhilibo, khulamenya habundu halindwa butinyu hasi hobulindi bubwo, ne olwibulo lwabwe lulanyola obwikamilo.