Read lunyore ETSISABURI 103 Bible Online

ETSISABURI 103 - lunyore bible

ETSISABURI 103

¹Witsoomie OMWAMI, ibe omwoyo kwanje! Biosi ebili mwise, bifumie eliira lilie lietsienukhu!

²Witsoomie OMWAMI, omwoyo kwanje; ne orebil'la singa obwali owetsimbabasi tawe.

³Yandekhelanga tsimbi tsianje tsiosi, khandi yambonianga obulwaye bwanje bwosi.

⁴Yanzikal'langa okhuyabilwa musilindwa, ma yanamilanga ikhabi yobuyanzi nende tsimbabasi.

⁵Nzikuranga khulwe ebindu ebilahi ebia yambelesianga, kho mbe onyala okhumenya singa omubuukha khandi wetsingufu singa indisu.

⁶OMWAMI akhalakanga esiina nabeela abakhupibwanga esibi, nabahelesia akabakhoyele khunyola.

⁷Yabisula akobuloosie bubwe khu Musa, ma niyenya abandu ba Isiraeli balole ebikholwa bibie ebiobunyali.

⁸OMWAMI nowetsimbabasi khandi nowobuyanzi, sahambungwa nelirima bwangu tawe, ma waitsula nobuyanzi oburalilu.

⁹OMWAMI siakondokhanga khasotso tawe, siabetsanga nelileko inziayo tawe.

¹⁰Siakhusalisinjia ifwe singa kakhoyele, nohomba kata okhukhurunjia es'sialia okhuhelana nende tsimbi tsiefwe nende obubi bwefwe tawe.

¹¹Singa likulu lili ehale okhurula khusibala, nimbwo obuyanzibwe buli obukali khuyabo abamuhetsanga oluyali.

¹²Singa ebukwe eli ehale okhurula emasaba, nimbwo or'rambukho lwo MWAMI okhuhiinia tsimbi tsiefwe luli.

¹³Singa samwana abeelanga abaana babe, nimbwo OMWAMI abeelanga yabo bosi abamuhetsanga oluyali tsimbabasi.

¹⁴Ye umanyile esindu esiakhwalombwa okhurulakhwo, yetsul'langa mbu ifwe khuli olukhuukhi.

¹⁵Nefwe, obulamu bwefwe bufwana singa obunyasi. Khulanga ma khunera singa amahuwa komubulimo;

¹⁶ne olwomuyeka kuhungutsanga khuko ne koma, ne sialiho olilolanga khandi tawe.

¹⁷Ne yabo abahelesianga OMWAMI oluyali, obuyanzi bubwe bubetsanga khubo inziayo, khandi obulahi bubwe buhindilanga khutsinzibulo tsiosi.

¹⁸Etsie yabo abahesianga indakano yiye, nende yabo abalondanga amalako kaake.

¹⁹OMWAMI waralisie oluruba lulwe mwikulu; niye omuruchi wabandu bosi.

²⁰Mwitsoomie OMWAMI inywe abamalaika betsingufu nende abobunyali, abalondanga amalako kaake, abahulilanga amang'ana kaake.

²¹Mwitsoomie OMWAMI, inywe bene bunyalibwo mwikulu inywe abarumikhili babe, abakholanga akobulalilo bubwe.

²²Mwitsoomie OMWAMI, ebilonje biosi, habundu hosi aha yamihanga. Witsomie OMWAMI ibe omwoyo kwanje!