Read lunyore ETSISABURI 104 Bible Online

ETSISABURI 104 - lunyore bible

ETSISABURI 104

¹Witsoomie OMWAMI, ibe omwoyo kwanje! E OMWAMI Nyasaye wanje, ibe oli omukhongo okhusila! Ibe wabiikhile olukoosi nende obukhongo;

²wefumanga obulafu singa ingubo yokhuchendela. Obambulanga likulu singa liheema,

³ma wombokha inyumba yiyo khumaatsi keikulu. Okholanga amalumbesi okhuba singa likari lilio, ma ochendela mutsimbaha tsiomuyeka.

⁴Okholanga omuyeka okhuba singa abarumwa baabo, ne okhwakha khwolweni singa abarumikhili baabo.

⁵Wara esibala khumusinji kwetsingufu, ne sisiakhasundwekhwo tawe.

⁶Ibe waala inyanza khusibala singa ingubo irambi, ma amaatsi nikafunikha ebikulu.

⁷Olwa wakondokhela amaatsi, kelukha, kahangulukha bwangu olwa kahul'la okhuhanzukha okhwokhukalaka.

⁸Amaatsi kakongoma okhurula khubikulu, nikatsia mumabanda, habundu aha wali niwakalombela.

⁹Walomba olwakho olwa karanyala okhubira, okhukekal'la kalekhe okhufuunikha liloba khandi.

¹⁰Walomba ebitaho okhutsukha amaatsi mumabanda, ne emichela chichendanga hakari hebikulu.

¹¹Tsinyama tsio m'bulimo tsinyoolanga amaatsi okhurula mumichela, imwo nimwo omwetsipunda tsiomubulimo, tsinywetsanga amaatsi khulwo okhukhwisisia obuluho.

¹²Mumisaala echili ahembi nomuchela, amanyonyi kombokhanga ebitsu biako nende okhwembela mwo.

¹³Okhurula mumalumbesi okwisianga ifula khubikulu, ma esibala sitsula mwo netsikhabi tsitsio.

¹⁴Ochilanga obunyasi nibukhula khulwe tsing'ombe okhwaya, ne ebiraakwa nibikhula khulwomundu okhurumikhila, khe abe onyala okhuraaka ebiraakwa bibie,

¹⁵ma alombe ewaini yokhumuyanzisia, nende amafura kokhunia, nende omukaati kwokhumuhelesia tsingufu.

¹⁶Emisiita chia Lebanoni tsinyoolanga ifula inyinji. Yichio nemisaala chio MWAMI yaraaka omwene.

¹⁷Imwo nimwo omwamanyonyi kombokhanga ebitsu biako, ne ebitsu biamanakha bili mumisaala chiemirinje.

¹⁸Ebichusu biamenya mubikuli ebirambi, ne amacheneli kebisanga mutsinyanga

¹⁹Walomba mwesi khulwokhumanyia emiesi; eliuba liamanya inyinga yokhuyela.

²⁰Walomba obutukhu, ne mbuba esiilima sietsinyama tsiomubulimo tsiosi tsirul'langa mwo esioba.

²¹Etsisimba tsimbuukha tsihumanga olwa tsihimanga, nzirunanga ebiokhulia ebia Nyasaye ahaananga.

²²Olwe eliuba lirulanga natsio nitsikalukha okhweyalisia mulwanga lwatsio.

²³Ne abandu barula esioba okhukhola emilimo chiabwe, ne balatsilil'la okhukhola emilimo okhwola mukolooba.

²⁴OMWAMI, ibe walomba ebindu ebinji! Wabilomba biosi munjila yobusitsa okhusila. Esibala siayitsulamwo ebilombe bibio.

²⁵Eliho inyanza, ingali khandi imbambukhu, omwene yimu ebindu bimenyangamwo, ebimoolanga ebioranyala okhubasia tawe, ebikali nende ebitititi.

²⁶Emeeli yel'lemanga khunyanza, khandi munyanza imwo, Lewiatsani asinangamwo, okunyama kwomumaatsi okwa walomba kula.

²⁷Yibi biosi bieletanga khuibe okhubihelesia ebiokhulia, olwa biba mbienya okhulia.

²⁸Obihetsanga ebiokhulia biosi, ne bilia; obihetsanga ebiakhulia nabio nibikura.

²⁹Olwobikhupanga omukongo, ne biyungubala, olwobihinianga emiiya chiabio, ne bifwa, ne bikwa olukhuukhi olwa bialombwakhwo.

³⁰Ne olwobifuranga mwo emiiya, ne biba ebilonje, ma ahaana obulamu obuhia khusibala.

³¹Oluyali lwo OMWAMI lumenye inziayo! OMWAMI asangal'le yibio biosi ebia yalomba!

³²OMWAMI ahenganga khusibala ne nasio nisitechela; ne olwatilanga khusikulu, ne omwosi kurulakhwo.

³³Nanyembele OMWAMI mubulamu bwanje bwosi; oluhono lwasimenyele musibala, namwembele Nyasaye tsinyembo tsiokhumwitsoomia.

³⁴Makano OMWAMI ayanzisibwe nende olwembo lwanje, sichila obuyanzi bwanje burulanga khuye.

³⁵Aboni bosi berwe okhurula musibala; ne ababi bosi baralolekhakhwo tawe. Helesia OMWAMI oluyali, ibe mwoyo kwanje, witsoomie OMWAMI.