Read lunyore ETSISABURI 105 Bible Online

ETSISABURI 105 - lunyore bible

ETSISABURI 105

¹Mukhupile OMWAMI embwo, muribule akobukhongo bubwe; mubool'le abamahanga ako MWAMI yakhola.

²Mwembe tsinyembo tsiokhwitsoomia OMWAMI, mubole khukebindu biokhuchenya ebia yakhola.

³Musangale sichila ifwe khuli abaabe, ne yabo bosi abamwekayakayanga basangale.

⁴Mutsie khu MWAMI khulwo khukhaaba obukhonyi; ma mumwekayakayenje khasotso.

⁵Inywe abolwibulo lwa Aburahamu, omurumikhili wo MWAMI, inywe abolwibulo lwa Yakobo owo MWAMI yali okhwela! Mwitsul'le akemilimo emilahi echiamakana echia yakhola, akamangalimwa aka yakhola nende obukhalachi bwesiina obwayahaana.

⁷OMWAMI niye Nyasaye wefwe; amalako kaake karumikhanga khusibala siosi.

⁸Alalinda indakano yiye khulwe inziayo, ne amasubisioke alaketsul'la khulwe tsinzibulo elefu ndala.

⁹Alahesia indakano yosi eya yalomba nende Aburahamu, nende kosi akayasubisia Isaka.

¹⁰OMWAMI yalomba indakano nende Yakobo, nayo yakhamenye inziayo.

¹¹Yamubool'la mbu, “Ndakhakhuhelesia esibala sia Kanaani, silabe omukabwa kukwo.”

¹²Abandu ba Nyasaye bali amabalo matititi, khandi bali abacheni musibala sia Kanaani.

¹³Bachendananga okhurula musibala silala okhutsia musindi, okhurula mwihanga elala okhutsia mulindi.

¹⁴Nebutswa Nyasaye siyahuchil'la omundu wosi okhubasandia tawe; khulwo khubasoola, yabasomela abaruchi naboola:

¹⁵“Murakhasalisia abarumikhi belwa banje tawe; murakhatumba khubaroobi banje tawe.”

¹⁶OMWAMI yaruma inzala musibala siabwe, khandi nabukula ebiokhulia biabwe biosi.

¹⁷Nebutswa OMWAMI yaruma omundu mulala imbeli wabwe, naye niye Yosefu, owali niyakusibwa okhuba omuhambe.

¹⁸Ebilenje bibie biali nibiabohwa muminyololo, khandi niyabohwa nende esibia mwikosi lilie,

¹⁹okhwola olwa aka yali niyarooba kahesikha. Ling'ana lio MWAMI liamukobokhela okhuba owatooto.

²⁰Ma omuruchi we Misiri namuboholola; OMWAMI wamahanga yamulakhuula.

²¹Yamukhola okhuba omukhongo wobwami bubwe, khandi namukhola okhuba omuruchi welihanga lilie liosi,

²²namuha obunyali khubemeli bomuruchi bosi, nende obunyali okhwibal'la abachetsihi babe.

²³Kho Yakobo natsia Emisiri, na namenya musibala yisio.

²⁴OMWAMI yahelesia abandu babe abaana abenji, ma nabahelesia tsingufu okhuyomba abasuku babwe.

²⁵Yakhola Abaamisiri okhubihil'lwa abandu baabe, nende okhubakatilisia abarumikhi baabe.

²⁶Kho yaruma Musa omurumikhi uwe, nende Haruni, owayali niyela.

²⁷Bakhola amang'ana kobunyali bwa Nyasaye, nende akamangalimwa musibala sie Misiri.

²⁸Nyasaye yaruma esiilima khusibala sie Misiri, nebutswa Abaamisiri sibalonda lilako lie tawe.

²⁹Yakalukhania amaatsi komumichela okhuba amatsahi, ma khandi niyeera tsisutse tsiosi.

³⁰Yetsusia amasele musibala siabwe, kata munyumba mwomuruchi mwetsulamwo amasele.

³¹Nyasaye yalaka tsisi nende tsinda okhwitsa mubwinji okhumamia esibala siabwe siosi.

³²Yaruma amachina keifula nende tsimbeni khusibala siabwe, musilenje siefula;

³³yakhupa emisabibu nende emikhuyu chiabwe, khandi nafunaka emisaala chiosi.

³⁴Yalaka tsisiche okhwitsa, ne nitsitsa, ne tsiali mutsimilioni etsiorabala;

³⁵tsialia obulimo bwosi musibala, khandi nitsilia ebiraakwa biosi.

³⁶Yera abasiani bambeli okhwibulwa mutsinzu tsiosi tsia Bamisiri.

³⁷Yemel'la Abaisiraeli okhurula Emisiri, nibachingile efetsa nende etsahabu, ne bosi bali bobulamu obulahi nende tsingufu.

³⁸Abaamisiri bali nibabaria, ne basangala olwa batsia.

³⁹Nyasaye yafuunikha abandu baabe nelilumbesi, ne omul'lo kwakhosia obulafu mubutukhu.

⁴⁰Basaba, naye naleera ebisindu, yabahelesia esiokhulia okhurula mwikulu ma nibekura.

⁴¹Yekula olwanda ne amaatsi nikarulamwo; nikabir'ra musitsiimi singa omuchela.

⁴²Niyetsul'la indakano yiye inzienukhu khu Aburahamu omurumikhili uwe.

⁴³Kho yamala niyemel'la abelwa baabe okhurula Emisiri, bemba nibakhupa liyoka liobusangali.

⁴⁴Yabahelesia esibala siabandu bandi, nalekha nibabukula emikunda chiabwe.

⁴⁵Kho abandu baabe, babe abanyala okhufumila amalako kaake, nende okhukhola akalakanga. OMWAMI yetsoomibwe!